Iconologie (Cesare Ripa, 1643)/I/Acte vertueux
Acte vertvevx. III.
Ovt ce que les actions vertueuſes ont de plus grand
& de plus illuſtre eſt compris dans ce Tableau. C’eſt
la peinture d’vn homme, qui n’a rien d’extraordinaire ;
& en qui la fleur de l’aage, la beauté, l’agréement,
& les iuſtes proportions de toutes les parties du corps ſont le
Chef-d’œuure de la Nature. Il a ſur la teſte vne Couronne de
rayons, comme celle d’Apollon, & vne guirlande d’Amaranthe.
Sous le manteau Imperial, qu’il porte retrouſſé ſur ſes eſpaules,
& qui eſt tiſſu de fin or, eſclattent pareillement des
armes dorées. Dans la teſte d’vn effroyable ſerpent qu’il vient
de combattre, il enfonce de la main droite le fer d’vne lance,
& tient vn Liure auecque la gauche, foulant de l’vn de ſes
pieds vne teſte de mort.
Par cét Embleme il eſt demonſtré ; Que la principale de toutes les actions humaines eſt celle qui ſe fait par les Armes & par Lib. 2. Reth. l’eſtude des bonnes Lettres. Or pource qu’au rapport d’Ariſtote, c’eſt en la fleur de ſon aage que l’homme s’acquiert la vraye connoiſſance des vertus, pour cette meſme raiſon vne parfaite virilité s’attribuë à ce Herôs que nous dépeignons. Quant aux aduantages de la taille, de l’agréement, & de la beauté, qui ſe remarquent par tout ſon corps, ils ſont à mon aduis des ſignes euidens & des coniectures indubitables des belles qualitez de Lib. 2. Eth. ſon ame. Ariſtote le teſmoigne ainſi, quand il dit, que l’exterieur eſt vn indice certain de l’interieur ; & tel eſt encore le ſentiment de Virgile, lors qu’il nous aduiſe,
Æneid. 5.
Que la vertu de l’Ame eſclatte dauantage,
Quand elle rejalit des traits d’vn beau viſage.
La Couronne reſplendiſſante qui luy enuironne la teſte, ſignifie que comme par la force de ſes rayons le Soleil eſclaire tous les lieux par où il paſſe ; ainſi vne action vertueuſe ne ſe peut cacher, & rend ſon autheur illuſtre, en quelque part du monde qu’elle ſoit faite.
Virgil. 10. Æneid.
La Vertu la plus haute, & la plus eſtimée,
Eſt celle par qui l’homme accroit ſa Renommée,
Par ſes propres exploicts, etc.
A la Couronne de noſtre Herôs n’eſt pas jointe ſans raiſon vne guirlande d’Amaranthe, à cauſe que cette fleur ne perd iamais ſa naturelle beauté, & que la rigueur de l’Hyuer, pour violente qu’elle ſoit, n’eſt pas capable de luy nuire, ny de ternir Plin. l. 21. 8. tant ſoit peu l’eſclat de ſa viue couleur. Le Vertueux tout de meſme ne degenere iamais de ces nobles qualitez qui le mettent dans l’eſtime des honneſtes gens. Au contraire, quand il n’eſt plus au monde, ſes belles actions l’y font reuiure, & conſeruent precieuſement ſa memoire, pour la rendre venerable aux ſiecles futurs.
Les grandes preuues de ſa Vertu ſont figurées par les armes qu’on luy donne, pource qu’en quelque temps que ce ſoit, il les employe à combattre le vice ſon ennemy, qui eſt ce venimeux ſerpent, auquel il eſcraze la teſte. Par où il eſt encore monſtré, Qu’il faut ſçauoir joindre l’effect à la volonté en matiere Cic. Off. 1. de vertu, puis qu’il eſt veritable qu’elle conſiſte en l’action, & Senec. de Rep. que c’eſt vne Maiſtreſſe incorruptible, qui ne peut ſouffrir les approches d’vn Amant, s’il n’eſt genereux & honneſtre homme.
La riche tiſſure de ſon manteau Imperial nous enſeigne, ce me ſemble, Qu’il eſt difficile que les perſonnes de baſſe naiſſance, & qui viuent mecaniquement, puiſſent faire des actions illustres, puis qu’à vray dire elles ne ſont communes qu’aux grands courages, & à ceux qu’vn Genie particulier a ſeparez des ames vulgaires.
Et d’autant que l’exercice des Lettres n’eſt pas moins capable d’immortalizer vn homme que celuy des Armes, c’eſt pour cela qu’on luy fait tenir vn Liure de la main gauche, & vne teſte de mort ſous le pied, pour nous apprendre que ceux qui excellent en l’vne & en l’autre de ces nobles profeſſions ne voyent iamais le fleuue d’oubly,
Et que malgré Charon, qui les prend dans ſa barque,
Leur nom & leur vertu triomphent de la Parque.