Les Œuvres de François Rabelais (Éditions Marty-Laveaux)/Gargantua/14
Comment Gargantua feut institué par un Sophiste en lettres latines.
Chapitre XIIII.
es propos entenduz, le bon homme Grandgousier fut rauy en admiration, considerant le hault sens et merueilleux entendement de son filz Gargantua.
Et dist à ses gouvernantes, Philippe roy de Macedone congneut le bon sens de son filz Alexandre, à manier dextrement vn cheual. Car ledict cheual estoit si terrible et efrené que nul ausoit monter dessus : Par ce que à tous ses cheuaucheurs il bailloit la saccade : à l’vn rompant le coul, à l’aultre les iambes, à l’aultre la ceruelle, à l’aultre les mandibules. Ce que considerant Alexandre en l’hippodrome (qui estoit le lieu ou l’on pourmenoit et voultigeoit les cheuaulx), aduisa que la fureur du cheual ne venoit que de frayeur qu’il prenoit à son vmbre. Dont montant dessus le feist courir encontre le Soleil, si que l’vmbre tumboit par derriere, & par ce moien rendit le cheual doulx à son vouloir. A quoy congneut son pere le diuin entendement qui en luy estoit, & le feist tresbien endoctriner par Aristoteles, qui pour lors estoit estimé sus tous philosophes de Grece.
« Mais je vous diz qu’en ce seul propos que j’ay presentement davant vous tenu à mon filz Gargantua, je congnois que son entendement participe de quelque divinité, tant je le voy agu, subtil, profund et serain, et parviendra à degré souverain de sapience, s’il est bien institué. Pour tant, je veulx le bailler à quelque homme sçavant pour l’endoctriner selon sa capacité, et n’y veulx rien espargner. »
De faict, l’on luy enseigna un grand docteur sophiste nommé Maistre Thubal Holoferne, qui luy aprint sa charte si bien qu’il la disoit par cueur au rebours ; et y fut cinq ans et troys mois. Puis luy leut Donat, le Facet, Theodolet et Alanus in Parabolis et y fut treze ans six moys et deux sepmaines.
Mais notez que cependent il luy aprenoit à escripre gotticquement et escripvoit tous ses livres, car l’art d’impression n’estoit encores en usaige.
Et portoit ordinairement un gros escriptoire pesant plus de sept mille quintaulx, duquel le gualimart estoit aussi gros et grand que les gros pilliers de Enay, et le cornet y pendoit à grosses chaines de fer à la capacité d’un tonneau de marchandise.
Puis luy leugt De modis significandi, avecques les commens de Hurtebize, de Fasquin, de Tropditeulx, de Gualehaul, de Jean le Veau, de Billonio, Brelinguandus, et un tas d’aultres ; et y fut plus de dix huyt ans et unze moys. Et le sceut si bien que, au coupelaud, il le rendoit par cueur à revers, et prouvoit sus ses doigtz à sa mère que de modis significandi non erat scientia.
Puis luy leugt le Compost, où il fut bien seize ans et deux moys, lors que son dict precepteur mourut ; et fut l’an mil quatre cens et vingt, de la verolle que luy vint.
Après, en eut un aultre vieux tousseux, nommé Maistre Jobelin Bridé, qui luy leugt Hugutio, Hebrard Grecisme, le Doctrinal, les Pars, le Quid est, le Supplementum, Marmotret, De moribus in mensa servandis, Seneca De quatuor virtutibus cardinalibus, Passavantus cum Commento, et Dormi secure pour les festes, et quelques aultres de semblable farine. À la lecture desquelz il devint aussi saige qu’onques puis ne fourneasmes nous.