Ballades sur plusieurs sujets/Ballade II
Cupido, Dieu des amoureux.
Prince de joyeuse plaisance,
Moi, Garencieres, tressoingneux
De vous servir de ma puissance,
Viens vers vous, en obéissance.
Pour vous humblement requerir
Que vous veuilliez faire punir
Un homme de mauvaise vie,
Qui, contre raison, veult tenir
Le droit de vostre seigneurie.
C’est un enfant malicieux,
Où nul ne doit avoir fiance.
Car il en a jà plus de deux
Deceues, ou païs de France,
Dont vous deussiez prendre vengeance,
Pour faire les autres cremir ;
C’est le prince de Bien Mentir,
Ainsné frère de Janglerie,
Qui, contre raison, veult tenir
Le droit de vostre seigneurie.
Oncques Lucifer l’orgueilleux
Ne fist si grant oultrecuidance.
Quant il emprist d’estre envieux
Sur le Dieu de toute puissance.
Il me semble que, par sentence,
Vous le deussiez faire bannir
De vostre court, sans revenir.
Lui et sa faulse compaignie,
Qui, contre raison, veult tenir
Le droit de vostre seigneurie.
Prince, s’on doit avoir vaillance
Pour mentir à grant habondance
Et pour faulseté maintenir,
Vous verrez icellui venir
À grant honneur n’en doubtez mie,
Qui, contre raison, veult tenir
Le droit de vostre seigneurie.