Ballades sur plusieurs sujets/Ballade I
Je, qui suis Dieu des amoureux,
Prince de joyeuse plaisance,
À toutes celles et à ceulx
Qui sont de mon obéissance,
Requier qu’à toute leur puissance
Me viengnent aidier et servir.
Pour l’outrecuidance punir
D’aucuns qui, par leur janglerie,
Veulent, par force, conquérir
Des grans biens de ma seigneurie.
Car Garanciere, l’un d’entr’eulx.
Si dit en sa folle vantance,
Pour faire le chevalereux,
Qu’avant yer, par sa grant vaillance,
Luy et son cueur, d’une aliance,
Furent devant Beauté courir.
Je ne luy vy pas, sans faillir.
Mais croy qu’il soit en resverie.
Car si près n’oseroit venir
Des grans biens de ma seigneurie.
Il dit qu’il est tant douloreux,
Et qu’il est mort sans recouvrance ;
Mais bien seroit il maleureux
Qui donneroit en ce créance.
On pcul veoir que celle penance,
Qu’il lui a convenu souffrir,
N’a fait son visage pallir
Ne amaigrir de maladie,
Ainsi se moque, pour chevir,
Des grans biens de ma seigneurie.
Sur tous, me plaist le retenir
Roys des heraulx pour bien mentir ;
Cfst office je luy ottrie,
C’est ce que lui veuil departir
Des grans biens de ma seigneurie.