Ballades (Charles d’Orléans)/Vidimus de la ditte obligation
par le duc d’Orléans.
À ceulx qui verront ces presentes,
Le bailli d’Amoureux Espoir
Salut plain de bonnes ententes.
Mandons et faisons assavoir
Que le tabellion Devoir,
Juré des centraux en amours,
A veu nouvellement, à Tours,
De Vaillant l’obligacion
Entiere de bien vraye sorte,
Dont en fait la relacion,
Ainsi que ce vidimus porte.
À double queue, par patentes,
En cire vert, pour dire voir.
Oblige, soubzmettant ses rentes.
Cueur, corps et biens, sans decevoir,
Soubz le seau d’autruy vouloir,
Pour recouvrer Joyeux Secours,
Qu’il a desservy par mains jours ;
Faisant ratifficacion,
Ledit notaire le rapporte
Par sa certifficacion.
Ainsi que ce vidimus porte.
Et deust il mettre tout en ventes,
Des biens qu’il pourra recevoir,
Veult paier ses debtes contentes,
Tant qu’on pourra apparcevoir
Qu’il fera trop plus que povoir,
Combien qu’ait eu d’estranges tours
Qui lui sont venuz à rebours ;
En soit faitte informacion.
Car à Léaulte se conforte
Qu’en fera la probacion,
Ainsi que ce vidimus porte.
Pour plus abreviacion.
De l’an et jour je me déporte,
On en voit declaracion,
Ainsi que ce vidimus porte.