Ballades (Charles d’Orléans)/Obligation de Vaillant
Present le notaire d’Amours,
Sans alléguer decepcion,
En renonçant tous droiz d’Amours,
Coustume, loy, condicion.
De tresléalle entencion
À vous servir, sans me douloir,
Passe ceste obligacion
Soubj le scel de vostre vouloir
De cueur, corps, biens, sans nul recours,
Vous fais renunciacion,
Presens, advenir, à tousjours ;
Et vous metz en possession.
Ne nulle part, ne porcion
N’y aura ; et, pour mieulx valoir,
Le jure en ma dampnacion
Soubz le scel de vostre vouloir.
Et quant je feray le rebours,
Pour recevoir punicion,
Me soubjmetz, sans estre ressours,
À vostre juridiction ;
Et à bon droit et action,
Pourrez de vostre plain povoir
Me mettre à execucion
Soubz le scel de vostre vouloir.
En l’an de ma grant passion,
Mettant toutes à nonchaloir,
Feis ceste presentacion,
Soubz le scel de vostre vouloir.