Ballades (Charles d’Orléans)/Ballade XIII
Je, qui suis Fortune nommée,
Demande la raison pourquoy
On me donne la renommée
Qu’on ne se puet fier en moy
Et n’ay ne fermeté ne foy ?
Car, quant aucuns en mes mains prens,
D’en bas je les monte en haultesse
Et d’en hault en bas les descens,
Monstrant que suis Dame et maistresse.
En ce, je suis à tort blasmée,
Tenant l’usage de ma loy
Que de long temps m’a ordonnée
Dieu, sur tous le souverain Roy,
Pour donner au monde chastoy.
Et, se de mes biens je despens
Souventesfoiz, à grant largesse,
Quant bon me semble, les suspens,
Monstrant que suis Dame et maistresse.
C’est ma manière acoustumée,
Chascun le scet, comme je croy,
Et n’est pas nouvelle trouvée,
Mais, fays ainsi comme je doy.
Me mocquant, je les montre au doy
Tous ceulx qui en sont mal contens ;
En gré pregnent joye ou destresse,
Qu’ayent l’un des deux me consens,
Monstrant que suis Dame et maistresse.
Sur ce, s’advise qui a sens,
Soit en jeunesse ou en vieillesse,
Et qui ne m’entent, je m’entens,
Monstrant que suis Dame et maistresse.