Ballades (Charles d’Orléans)/Ballade XII
Ce que l’ueil despend en plaisir,
Le cueur l’achette chierement,
Et, quant vient à compte tenir,
Raison, president sagement.
Demande pour quoy et comment
Est despendue la richesse
Dont Amours deppart largement.
Sans grant espargne de liesse.
Lors respond Amoureux Desir :
Amours me fist commandement
De Joyeuse Vie servir,
Et obéir entièrement ;
Et, s’ay failly aucunement.
On n’en doit blasmer que Jeunesse
Qui m’a fait ouvrer sotement.
Sans grant espargne de liesse.
Pas ne mourray sans repentir,
Car je m’en repens grandement ;
Trouvé m’y suis pis que martir,
Souffrant maint doloureux tourment ;
Désormais en gouvernement
Me metz et ès mains de Vieillesse,
Bien sçay qu’y vivray soubrement.
Sans grant espargne de liesse.
Le temps passe comme le vent,
Il n’est si beau jeu qui ne cesse,
En tout fault avoir finement,
Sans grant espargne de liesse.