◄ Laisse CLXXXIII | Laisse CLXXXIV | Laisse CLXXXV ► |
Fu delaiés cist encoronament.
Frans en la ville pristrent aubergement
E grand partie dehors en remistrent ;
Bien sunt servis trestuit comunalment.
A l’endemain, por le comandament
Dou roy de Rome, tuit la Païne gent,
Homes e femes, pristrent baptiçament ;
Prestes e cleires mout se en asterent ;
Dix jor ont pris iluec baptiçament.
Baordés i ont e tornoiés sovent ;
Ces convertis mout se deletoient
Don biel plaixir e del conteniment
Qe nos François d’amor li fesoient ;
Por lor voloir jamés s’en partisent ;
E des baron vos di ben ensement.
Mais li emperere, plein d’aut entendiment,
Avoit son cor mis sor autre talent.
As fenestre ert a un avesprement
E voit Rollant chevaucher bellement,
Li doçes per avec lui solement,
Gardand les dames qe as baucons estoient.
A l’emperere en est pris mal talent ;
Croule le cief e dist : « Trop malement
« Feisons scenblant d’ostoier longement.
« Se devrons guere mener sifa itement,
« Ja roys Marsille, a cui Espaigne apend,
« Non perdra mais de sa tere un arpent ;
« Mais, por san Jaches, il ira autrement. »