| ◄ Laisse CLXXXII | Laisse CLXXXIII | Laisse CLXXXIV ► |
Rolland reçuit li don e li honor ;
Genoila soi par devant son seignor.
Le roy le driçe e pués li dit ancor :
« Oieç », dist il, « li grand e li menor ;
« Je faiç cestui, qe sui emperaor,
« Roys de quant tient Marsille li Aumansor
« E mantinant, a nom li Creator,
« Encoroner le vuel sens nul demor. »
Rollant l’oï, duplia le color.
« Grand merci, syre », ce dist li pugneor.
« Quand de la enprise c’avons feite des hor
« Serons a chief, celui meïsme jor
« Prendrai corone e recevrai ma uxor.
« Se je non sui avant tiel servior
« A ceste graçe qe ele, por sa douçor,
« Moi die : « Prend — n’avoir nule paor —
« Ce c’as meris de ta juste sudor »,
« Ja ne prendroie d’Espaigne un cheitis bor,
« Car le bon serf qe n’aime desenor
« Ne qiert merit se il n’a feit son labor ;
« E hom orgoilos, syre, feit gran follor
« Q’en l’altrui ort plante fruit ni aubor,
« Car au collir ça en ont li pluisor
« Englotis fruit de trop agre sapor.
« L’incoroner soie mis en demor
« Tant qe por grace de force e de valor
« Meris l’avrai si qe bon çubleor
« Non soit de mal en cort reporteor. »