Les Chroniques de Sire Jean Froissart/Livre I, Partie I/Chapitre CXCIV
CHAPITRE CXCIV.
Le jour de Pâques et le terme vint : le roi Édouard tint une grand’fète et cour à Bervich : tous les princes, les seigneurs et chevaliers d’Angleterre y furent, et aussi grand’foison de la communauté du pays ; et furent là par l’espace de trois semaines sans chevaucher plus avant ; car bonnes gens s’ensoignèrent entre le roi Édouard et le roi d’Escosse, par quoi il n’y eut point de guerre adonc ; et fut une trêve prise, jurée et accordée à tenir deux ans ; et le firent les Escots confirmer du roi de France. Par ainsi se défit cette grosse chevauchée, et départit le roi anglois ses gens, et leur donna congé de raller en leurs hôtels ; et il même s’en vint à Windesore ; et envoya adonc messire Thomas Hollande et messire Jean de Hartecelle[1] à Bayonne, atout deux cents armures de fer et trois cents archers, pour garder les frontières contre les François.
Or vous parlerons de l’armée messire Robert d’Artois et de sa compagnie, et comment ils arrivèrent en Bretagne. En ce temps échurent Pâques si haut, que environ Pâques closes on eut l’entrée du mois de mai[2] ; de quoi, en my ce mois, la trêve de messire Charles de Blois et de la comtesse de Montfort devoit faillir. Si étoit bien messire Charles de Blois informé du pourchas que la comtesse de Montfort avoit en Angleterre, et de l’aide et confort que le roi d’Angleterre lui devoit faire. Donc messire Louis d’Espaigne, messire Charles de Grimaut, messire Othon Dorie étoient établis sur la mer à l’encontre de Grenesé, à trois mille Gennevois et mille hommes d’armes et trente-deux gros vaisseaux espaignols tous armés et tous frétés ; et ancroient sur la mer attendant leur venue. D’autre part, messire Gautier de Mauny et les seigneurs de Bretagne et d’Angleterre qui dedans Hainebon se tenoient, étoient durement émerveillés de leur comtesse et de ce qu’elle demeuroit tant, et si n’en oyoient nulles nouvelles ; non pour quant moult bien supposoient qu’elle ne séjournoit mie trop à son grand aise ; et ne se doutoient d’autre chose sinon qu’elle n’eût aucun dur rencontre sur mer de ses ennemis : si ne savoient que penser.