Utilisateur:Renard Migrant/L’atre perillous

Édition du ms. 1433 fr. de la BnF

Malheureusement, non-permise dans l’espace principal, parce que le manuscrit est tellement fautif, que j’ai dû le modifier selon les deux autres manuscrits (Chantilly et 2168 fr. de la BnF). Renard Migrant (d) 28 mars 2019 à 15:05 (UTC)

Me dame me commande et prie
Que une aventure li die
Qui avint au boin chevalier
Et je ne puis mie laissier
Quant me dame l’a commandé
Puis qu’il li plaist et vient a gré
Si oiés comment il avint
A une Pentecouste tint
Li Rois une feste mout grant
Ne remest chevalier errant
De le mer dusqu’en Cornouaille
Ne damoisele qui riens vaille
Qui a chele court ne venist
Que li Rois grant honnor lor fist
Car mout leur donne riches dons
Quant venu furent li barons
Et asamble le samedi
Aprés nonne avint il ainsi
Si com s’aloient deduiant
Que il virent venir errant
Toute seule une demisele
Bien achesmee et bien bele
Mout par iert de grant apareil
D’un mout riche samit vremeil
Yert se reube freke et nouvele
De ses lorains et de se sele
Et de pierres qui y sont mises
Et mout noblement sont assises
Et de son autre achesmement
Deviser or plus longuement
Ne me veul pas entremetre
Car grant paine il couverroit metre
Ele iert bien et bel atournee
Ainsi en la sale est entree
Que onques son frain ne retint
Dusques que devant le Roy vint
Frans Rois fait ele Dix vous saut
Chil qui gouverne bas et haut
Le chiel le mer et le tere
De mon pais vous vieng requerre
Que vous me creantés .I. don
Ja ne vous querrai desraison
Ne outrage ne vilenie
Li Rois boinement li otrie
Que volentiers tel don ara
Dites fait il que chou sera
Car vous l’arés sans repentir
Pour quoi je le puisse furnir
Sire dist ele vostre merchi
Or oyés dont que je vous di
Je veul demain boutelliere estre
De vostre coupe le plus bele
Et vous servir ent au mengier
Et si veul que .I. chevalier
De chaiens tout le miex prisiés
Et chil qui mix iert enseigniés
Me garde et deffende et honnourt
Tant comme g’iere en vostre court
Que jou n’i aie vilenie
Car jou n’i vaurroie mie
Remanoir sans mout boine garde
Li Rois mout boinement l’esgarde
Bele fait il vostre serviche
Ferés tout a vostre devise
Ne je ne sai mie jugier
Qui est le mieudre chevalier
De ma court et de ma maisnié
Tant estes preuz et enseignié
Que vous l’avés dit pour aucun
Et si vous plaist nommés le non
Liqués vous volés que che soit
Je commanderai orendroit
Que mout bien vous garde et deffende
Et que jammais a el n’entende
Tant com chaiens sejournerois
Sire fait ele n’est pas drois
Que j’en doigne a nului le pris
Ains en est seur vous le fais mis
Et le don m’en avés donné
J’en cuideroye avoir mal gré
Se pour moi seule le faisoie
Ja Dix fait li Rois ne me voie
Quant j’en sai le meilleur eslire
Mais je vous veul prier et dire
Que me creantés une rien
Se vous veés que che soit bien
Sans eslire vous veul baillier
En le garde a .I. chevalier
Preus et bel et courtois et sage
Et si ne fust de men lignage
J’en deisse une grant parole
La puchele qui n’iert pas fole
Li respont Sire dites moi
Qui il est ains que je l’otroi
Bele fait il chou est Gavain
En se garde serés demain
Et plus et tant com vous plaira
Sire fait ele quant je ving cha
Me fu forment Gavain loé
Et je m’i otroi de mon gré
Je ne vous demant se li non
Ainsi li est greés le don
Com la cose vous est contee
Et Gavains l’a tantost menee
A mout grant joie a son hostel
Et sachiés que mout li fist bel
Que nus n’i seut que entreprendre
Car mout durement fist entendre
A servir a une puchele
De se seur qui mout estoit bele
Qui li portoit grant compagnie
Mout menerent joieuse vie
Chele nuit jusqu’a l’endemain
Au grant jour leva Gavain
Et les pucheles toutes trois
Puis alerent a tel harnois
Oir au moustier le serviche
Car li Rois est ja a l’eglize
Et la Royne et les pucheles
Quant Gavains ot les damoiseles
Il est de sont ostel alés
Quant le serviche fu finés
Si s’en revinrrent tuit ensemble
A le puchele che me samble
Si com il li fu creantee
Fu le maistre coupe livree
Car les tables furent ja mises
Atant commencha li serviches
Mout grans et mout biaus et mout riches
Car li Rois Artus n’iert pas niches
Et sachiés qu’il fu mout plenier
Mais il ne m’est ore mestier
De dire qu’il fist ne comment
Fors tant comme chi en apent
De le couppe sert le meschine
Lés le Roy seoit le Royne
Et .V. rois de Gales aprés
Gavain et Tors le fil Arés
Et Erec seoit d’autre part
Et Quarradoc Brimbras lo quart
Aprés sont les autres assis
Maint chevalier y ot de pris
Et mainte cointe demisele
Maint hanap et mainte escuele
Ot devant aux d’or et d’argent
N’orent pas mengié longuement
Quar n’orent qu’un mes eu
Quant .I. chevalier ont veu
Venir par mi le porte errant
Et sachiés qu’il fu trop grant
Sous chiel n’eust plus bel de lui
Mais trop estoit grant a anui
Mout par iert bien et bel armés
Ainsi est en le sale entrés
Fors de le lanche qu’il laissa
Que dehors le sale apuya
Tant fu orguelleus le vassal
Onques ne retint son cheval
Desi qu’il vint devant le Roi
Et si vint par si grant desroi
Que son frain hurta a le table
Onques wissier ne connestable
Ne contredit de nule cose
Quant esgarde les eut longue pose
Sans che que mot ne leur sonna
Vers le puchele s’en tourna
Si l’a par les espaulles prinse
Puis si l’a devant soi assise
Desus le col de son destrier
Rois fait il cheler ne te quier
Cheste damoisele est m’amie
Si l’ai en mainte court syevie
Puis que l’euch emprise a amer
N’onques mais ne le poi trouver
En tout la u je l’osaisse prendre
Mais je sai le vostre a si tenvre
Et de boins chevaliers widie
Je di pour chou qu’il lor anuye
Quant je di li le saisine ai
Que ja par eux ne le perdrai
Ains l’emporterai sans dangier
Que ja par cors de chevalier
De chix qui sont chaiens assis
N’en iert vers moi son escu pris
Sire Rois dist il je m’en vois
Le haute voie vers le bois
Qui me menra en men pais
Savés pour quoi jel vous devis
Par ou je m’en doi repairier
Se il a chaiens chevalier
Qui par savoir ou par folie
Nule rien que jou chi vous die
Veulle desdire par bataille
Ne die pas que je m’en aille
Par une autre voie fuiant
Oyant tous ensanle m’en vant
Que par ychele m’en irai
Ne ja du petit pas n’istrai
Devant chou qu’il n’avesperra
Je veul que chil qui me sievrra
M’ait a aise s’il ne se faint
Ains que je viengne au bos m’ataint
A chest mot a sa voie emprise
A sa lanche vient si l’a prize
Car il ne le veut pas laisier
Le petit pas de son destrier
S’en est issus hors de la porte
L’ainsi faitement emporte
Le damoisele vers son pais
Gavains fu iriés et et pensis
Qui lés le Roy sist au mengier
Ne se seut mie conseillier
Lequel li est plus honneravle
Ou salir par desus le tavle
Pour tost sievir le chevalier
Ou atendre tout le mengier
Que lei serviches fu finé
Longuement a de chou pensé
C’onques ne but ne ne menga
Au derrain se pourpensa
Que le souffrir li ert plus bel
Car son cheval iert tant isnel
Que tost l’ara aconseu
Et Keus qui tout chou a veu
S’a ses compagnons apelés
Seigneur dist il or entendés
A servir cheste court a droit
Car il m’estuet sievrre orendroit
Chel chevalier qui tel fourfait
A veant tous ses barons fait
Qui par orguel et par desroi
A saisie devant le Roi
Le damoisele a sen mengier
C’onques n’i ot nul chevalier
Qui desdeist de nule rien
Une chose sachiés vous bien
C’onques mais au Roi che n’avint
Puis que il primes feste tint
Nule si grant descouvenue
Que chu fali ne se remue
En qui garde li Rois mist
.C. dehais ait qui primes dist
Qu’en li eust boin chevalier
Atant s’en va apareillier
A son hostel delivrement
Quant armés se fu richement
Seur le boin destrier est montés
Puis est el grant chemin entrés
Par ou le chevalier s’en va
Devant li a tere garda
Si avoit choisi les esclos
Atant se met ens es galos
Pour ataindre le erraument
N’ot pas chevauchié longuement
Quant .I. tertre le vit monter
Atant commencha a crier
Estés estés Sire vassal
Le damoisele et le cheval
Enmenrai jou ensamble o moi
Et vostre cors rendrai au Roi
Si fera de vous se justiche
Mar fu le demisele prinze
Devant li si estoutement
Se mort ou prison ne vous rent
Je ne me pris une genele
Chil descendi la damoisele
Si guenchi arriere son frain
Puis li a dit es che Gavain
Qui me sieus par si grant desreu
Par foi fait ainz ai non Queu
Le senescal au Roi Artus
Et chil li respont en maleurs
Car vous ne queroie je mie
De le vostre chevalerie
N’est il pas grant los en me tere
Atant va l’un l’autre requerre
C’onques n’i eut autre tenchon
Queus le feri tout a bandon
Desus le blouque de l’escu
Que treué li a tout et fendu
Mais li aubert l’a garanti
C’onques maile n’en desmenti
Et l’empaint bien se lanche froisse
Et le feri par tel angousse
Qu’il abat lui et son cheval
Et chay le pendant d’un val
Que mout fu navrés et blechié
Si eut le destre brach brisié
Par entre l’espaulle et coste
Sen cheval saut sus si s’aroute
Tout le chemin par la ou vint
Et chil a Queu nul plait ne tint
Ains le laissa yleuc gesant
A sa puchele vient errant
Si l’a montee devant li
Bele fait il si com je qui
Danz Queuz ne vous enmaine pas
Lors s’en va vers le bos le pas
Demenant grant joie s’amie
Au Roi et a sa compagnie
Me couvient hui mais repairier
Qu’encore seoit au mengier
De l’aventure mout pensis
Veant tous a .I. coutel pris
Si l’afiche par mi .I. pain
Puis y apoia si se main
Que li coutiaus froissa en deus
Des chevalier n’i ot .I. seus
Qui enquerre ost demander
Quele acoison li fait penser
Et li Rois s’est apercheu
Si set devoir qu’il ont veu
Comment li coutiax est froissiés
Seigneur dist il mout sui iriés
De cheste mesestanche d’ui
Si ai encore gregneur anui
De la meprison de Gavain
Je quidoie estre bien chertain
Que ja n’eusse nul encombrier
Pour le cors d’un seul chevalier
Dont Gavains ne me deffendist
Et s’a une autre avenist
Que le puchele en garde eust
Par malvaistié qui en li fust
Si deust bien Gavains emprendre
Du grant fourfait lui a deffendre
Et deffendre le pour m’onour
Mout me poise qu’a si boin jour
M’en est tel anui avenu
Lors dist Yder li fis nu
Sire dist il ne vous irés
Li senescaus y est alés
Qui bien vengera cheste honte
Et li Rois dist chou est nul conte
Or croist et double mon anui
Tant a grant proeche en chelui
Et tant est fors et sorquidiés
Que ja par Queu n’iert encombrés
Mout il puet avoir vaisselage
Onques mais en tout mon aage
Plus outrageus de lui ne vi
Et Gavain dit Sire merchi
Vous avés dist vostre plaisir
Mais je ne sai pas tressalir
Par dessus le table au mengier
J’en quidaisse avoir reprouvier
Se jou l’eusse tressalie
Tant estes de grant seignerie
Et tant vous a Dix fait haut homme
Que se l’empererés de Romme
Vous venoit chaiens manechier
Et vous seissiés au mengier
Ne mais que pis ne vous feist
Que pour fourfait que il deist
Ne se devroit nus desrengier
Et quant venroit aprés mengier
Si alast chil qui vous plairoit
Et a qui le chose afferroit
Vengier vostre honor et le son
Je sai mon cheval a si bon
Que je l’arai mout tost ataint
Ne quidiés pas que il en maint
Le damoisele sans calenge
Ja puis Dix honnor ne me doigne
Quant pour autre rien le laissai
Se je de riens mespris en ai
Je suis tout prés de l’adrechier
Atant est salis du mengier
Si a les armes demandees
Deus vallés les ont aportees
Qui l’ont mout vistement armé
Puis el boin destrier est monté
C’onques estrief n’en fu requis
Et quant il ot son escu pris
Et on li ot baillié se lanche
De l’errer se haste et avanche
Gavains oirre vers le forest
A grant merveille li desplest
Quant il ne voit ne loins ne prés
Estés vous poignant a eslés
Le destrier Queu le seneschal
Gavains connut bien le cheval
S’il saisi au destroit d’un mont
Auques eut escorchié le front
Si que tous jours venoit sanant
L’archon de la sele devant
Fu tous quassés et esmiés
Et le frain fu tous depechiés
Si qu’il n’avoit fors le chavestre
Diex fait Gavains si grant proeche
A chil qui si vous abati
De chou fu auques amati
Qu’il crient que Queu soit mors ou priz
Hé ! Dix dist il tant ai mespris
Et tant m’est hui mesavenu
Quant pour moi a le Roi perdu
Le chevalier qu’il amoit tant
Il m’iert touz jours mais mis devant
En touz lieus ou serai trouvés
Si m’iert laidement reprouvés
Je ne di pas que che soit tors
Qu’il est par ma deffaute mors
Que la puchele en garde avoie
Lors garde loins en mi la voie
A chel grant doel que il demaine
Vit Queu lever a mout grant paine
De la ou il l’avoit laissié
Lors a son cheval eslaissié
Si est venus poignant a lui
Sire dist il de vostre anui
Sui mout irés et abosmé
Car je quit que vous m’en restez
Que il vous estes venus par moi
Malvais couart che li dist Queu
Il m’est ore avenu par vous
Mout estes fiers et orguellous
Dedens la cambre la Royne
N’est mie povre ne chetive
Chele a qui vous degniés parler
Qui ileuc vous orroit vanter
De hardement et de proeche
Ne diroit pas que par pereche
Qui en vous soit fust au Roi faite
Une cose est qui mout dehaite
De vilenie a son mengier
Par le cors d’un seul chevalier
Mout vous ai hui veu restif
Sire fait Gavains pas n‘estrif
Que je n’en aie mout mespris
Mais j’ai chi vostre cheval pris
Sire montés se il vous plaist
Et jou irai vers le forest
Pour ataindre le chevalier
Qu’il m’estuet morir ou vengier
Le grant anoi que il m’a fait
Et Queuz li dist .C. dehais ait
Qui ja de vo main le prendra
Ne qui ja tant vous prisera
Que il vous doie nul guerredon
Gavains n’ot soing de sa tenchon
Si poinst delés lui a. I. saus
Puis va vers le forest les saus
Et les grans galos efforchiés
Me Sire Queuz s’est esforchiés
Tant que il vint a son cheval
Puis l’acoste devers le val
A mout grant paine y est montés
Si est en son pais alés
A tout se grant mesaventure
Et Gavains sieut a grant aleure
Le chevalier qui erre a plain
Et qui ja ot passé le plain
Et fu en la forest entrés
Quant aprés se fu aroutés
S’entre el chemin el bos entra
Une grante pieche ainsi erra
C’onques ne vit ne prés ne loing
Atant oy a grant besoing
De trois damoiseles le cri
Qui disoient a Dieu merchi
Ychés chaitives que feront
Car les plus dolentes du mont
Sont au jour d’ui che poons dire
Bien pueent les pucheles dire
Que tout leur secours perdu ont
Pour le grant duel que eles font
A Gavains son chemin laissié
Si vint a eles tout eslaissiés
El chemin les trouva d’une lande
Douchement les enquiert et demande
Quant il lor ot son salut fait
Pour quoi eles sont en tel dehait
Et pour quoi font issi grant duel
Sire fait l’une le mien veul
Fussons nous toutes .III. ochises
Chest grant duel que nous sommes vives
Quant nous avons tel perte faite
Que jammais ne sera retraite
Ne par bouche d’omme contee
Atant chiet a tere pasmee
Si est recommenchiés li deuls
Il a regardé derrere euls
Si vit gesir .I. damoisel
Mout grant et mout gent et mout bel
Et qui mout bien iert atournés
Mais il avoit les eux crevés
Yleuc trestout nouvelement
Encore en ot le vis sanglant
Mout par en fu Gavains iriés
Tant iert bel et bien tailliés
Que bien paroit de haute gent
Si quidoit bien a enscient
Que tout chu duel fust pour li fais
Bele fait il icest fourfait
De chest vallet que je chi voi
Coment fu il fait et pour quoi
Grant talent ai que je le saiche
L’autre respont ja Dix ne plaiche
Que jou vive mais longuement
Quant l’onnor et l’afaitement
Le largueche et le courtoisie
Et la flour de chevalerie
A ychi veu morir ensanble
A ychest mot li cuers li tramble
Si que toute descoulouree
Chai delés l’autre pasmee
Gavains a mis l’autre a raison
Bele fait il par guerredon
Vous requier et pri par serviche
Que soit fait a vostre devise
Que me dites se vous poés
Dont chest duel vient que vous menés
Le damoisele a respondu
Sire pour chou que j’ai veu
Que vous avés si bel parlé
Vous iert de chief en chief conté
Et la dolour et l’acoison
Sire le duel que nous faison
N’est pas si grans comme il devroit
Car se trestout le mont savoit
Le grant damage et le dolour
Qui avenue est hui chest jour
Si en feroit il autretant
Car le damage est si trés grant
Quant il sera par tout seu
C’onques tel duel ne fu veu
Menre est li duels que li damages
Chil qui tant iert et biaus et sages
Et qui avoit du mont le pris
Est en cheste forest ochis
Orendroit ichi devant vous
Bien poés savoir a estrous
Que chest chil de coi je vous di
Bele fait il je ne le vi
Ne je n’en puis estre chertain
Sire dist ele ch’est Gavain
Le niés au riche Roi Artur
Le boin chevalier le seur
Qui tant iert prisiés et amés
Hui esroit trestous desarmés
Par cheste forest en deduit
Sans compaignie et sans conduit
N’avoit arme avec li portee
Fors escu et lanche et espee
Et si esroit sans compagnie
Deuz chevaliers que Dix maudie
Qui de viés l’avoient hai
L’orent des ichi parsievi
Quant il fu issus de chu val
L’un laissa courre le cheval
Si vint mout radement a lui
Enbuchié si furent li dui
Et li tiers a li se mella
Tant longuement l’estours dura
Que Gavain en vint el dessus
Li doi ne vaurrent souffrir plus
Que il avoit el bois laissiés
Ains i vindrent tout eslaissiés
Pour aidier a lor compagnon
Gavain mirent en tel randon
Qu’il ne se pot deffendre d’eus
Qu’il furent .III. et il iert seus
Et si furent mout bien armés
Chel vallet que vous la veés
Qui de grant hardement est plain
Il poinst pour aidier a Gavain
Sen pooir fist de lui aidier
Mais ne li pot avoir mestier
Car chiex ierent et grans et fors
A che valut poi ses effors
Car il estoit tous desarmés
Au vallet ont les iex crevés
Et Gavain ont tout detrenchié
Sire le duel et le pitié
Que nous avons et le grant ire
Loiaument le vous poons dire
N’est pas pour chestui seulement
Ains nous vient le grant mautalent
Du boin chevalier qui est mort
Lors commencha .I. duel si fort
Que nus ne le porroit retraire
Lasse fait il que porrons faire
Hay ! mort tant par es avere
Nous n’avons fors cest seul frere
Et si avons chestui perdu
Ha mors dolente que fais tu
Quant orendroit ne nous ochis
Ch’est te coustume de tous dis
Qu’a cheli qui ta venue aime
Et a sen besoing te reclaime
Ne veus secourre ne aidier
Tu as mort le boin chevalier
Dont tous li mons sera en paine
Ahi ! mors tant par es vilaine
Qui les boins prens tous a eslais
Et si lais vivre les malvais
En ti n’a raison ne mesure
De ches .III. lasses n’as tu cure
Qui si vivent en grant despit
Et Mesire Gavains li dit
Bele fait il ne vous mouvés
Pour noient vous desconfortés
Car je vieng de la court tout droit
Si i vi seoir orendroit
Au mengier Monseigneur Gavain
Sachiés de voir qu’il est touz sain
Quant de le court me departi
Et li vallés li respondi
Biau Sire il est mors a estrous
Amis dist il que savés vous
Comment en estes vous chertain
Je fui fait il vallet Gavain
Anten a .I. tournoiement
Si sai trés bien a ensient
Que ch’est chil qui est decopés
Biauz amis car le me moustrés
Je conneusse bien le cors
Sire dist il il sont ja hors
De le forest qui l’ont ochis
Quant il en eurent le chef pris
Trestous les membres li coperent
Les pieches o els emporterent
Dont n’i remest ne poing ne pié
Si sont ja bien .III. lieues alé
Et le cors qu’il en ont porté
En lors pais a sauveté
Ore ne doutent mais nului
Se Gavains ot ire et anui
Du vallet qui si iert destroit
Et des pucheles que il voit
Pour lui si grant duel demener
Il ne fait mie a demander
Pour le vallet est touz desvés
Car hom qui a les eux crevés
Vit tous jours puis a grant anui
Si set de voir que ch’est pour lui
Que on li a tout chest mal fait
Et du chevalier qui s’en vait
Qui emporte le demoisele
Pour qui son duel li renouvele
Si qu’il ne set que il fera
Lequel aventure il sievrra
Le premiere ou le desraine
Vis li est que le premeraine
Doit il premierement fournir
Et si s’en puet sains revenir
Sans peril et sans encombrier
Si doit a l’autre repairier
Et vengier le s’il onques puet
Amis fait il esrer m’estuet
A Dieu soiez vous commandé
Mais sachiés bien de verité
Que se je fusse anchois venus
Dedens fust perchiés mes escus
Et mon auberc rout et faussé
Et jou par mi le cors navré
Que on vous feist chest anui
Mais ja ne sarés qui je sui
Devant chou que jou revenrai
Ne ja nul jour ne finerai
Puis que ge serai repairiés
Amis serai mors ou vous vengiés
Les pucheles a Dieu commande
Poignant s’en va par mi le lande
Tant qu’en son droit chemin entra
Mout grant pieche ainsi esra
Tant que le forest eut passee
De l’autre part de la valee
Vit loins le chevalier esrer
Il commencha a avesprer
Et Gavains poinst tant son cheval
Qui fu de l’autre part le val
Lors vint devant li .I. chastel
Tout clos de pierre et de quarrel
Dont le mur ot .C. piés de haut
Le chastel ne doutast assaut
Tant par est bel et bien fremés
Il vit bien qu’il iert avesprés
Tant qu’il ne pooit sans meskief
De la bataille traire a kief
Pourpensa soi qu’il souffera
Et que demain se combatra
Au chevalier qu’il poursievoit
Car a enscient set et voit
Qu’el chastel se herbegera
Et il meismes y gerra
Pour atendre ileuc se bataille
Ainsi quide faire sans faille
Mais mout li avint autrement
Car li chevaliers erraument
Dedens le premier huis entra
Et li solaus lors esconsa
Si furent les portes fremees
Il a les rues trespassees
Tant qu’il vint amont el chastel
Devant le tour en .I. prael
Seoit li Sires o sa gent
Chil le salue boinement
Aprés li a l’ostel requis
Et il li dist biaus dous amis
Vous l’arés bien et volentiers
Lors sali sus .I. chevaliers
Qui descendi la damoisele
Li Sires ses vallés apele
Pour le chevalier desarmer
Aprés li a fait aporter
.I. bliaut et .I. mantel gris
Quant il ot delés lui assis
Si li enquiert mout boinement
Son estre et son contenement
Dont il vint et quel part il va
Et li chevaliers li conta
Onques ne l’en deigne mentir
A Gavain m’estuet revenir
Qui encore erre par le plaine
Ne li caut mais que il viengne
A estre de jour herbegié
Tant a erré et chevauchié
Qu’il est venus jusqu’a le porte
Par le vile qu’il voit si forte
A mout le chastel esgardé
Puis a le portier apelé
Si durement qu’il l’entendi
Et li portiers li respondi
Biau Sire pour noient criés
Car le soleil est esconsés
N’i ara mais porte ouverte
Ne le matin par nule perte
Devant che qu’il sera grant jour
Car li Sires de cheste tour
Et li clerc et li chevalier
Et li bourgois et esquier
Ont tuit communaument juré
Que ja pour homme qui soit né
N’iert les guichés desveroulliés
Puis que li solaus iert couchiés
Et sera levés l’endemain
Amis che a dit Gavain
Traveilliez sui et si est tart
Car me di donques de quel part
Je porroie .I. hostel querre
Amis fait il en cheste terre
De grans .X. lieues environ
N’a il ne borde ne maison
Ne ne vous sai conseil donner
Toute nuit porriés errer
Par mi bruieres et par mi bois
Amis fait Gavains je m’en vois
A Dieu soiés vous commandé
N’ot pas le trait d’un arc alé
Quant il coisi une capele
De pierre estoit et haute et bele
Yleuc quida tout asseur
Reposer li mais il iert dur
Gavains chele nuit herbegier
Mais se onques li fu mestier
D’estre preus or l’en iert gregnor
C’onques mais de si grant paor
Jor de sa vie n’escapa
Dessi c’a le capele va
Si est en l’autre descendu
Sa lanche osta et son escu
Si l’apuia a le capele
Du boin destrier osta le sele
S’il fourbi bien et conraa
De l’herbe paistre li laissa
Puis s’est assis sur .I. tombel
Atant oi .I. damoisel
Venir le trot de son ronchin
Devers le bois le grant chemin
Il est du chimentire issu
Si li demande qui es tu
Qui si tart trespasses par chi
Et li vallés li respondi
Puis dist dame sainte Marie
Tenés moi en sens et en vie
Glorieus Sire deffen mon cors
Que jou n’isse de men sens hors
Et que diables ne m’asolt
Gavains mout grant merveille en ot
Quant il l’oi parler ainsi
Pour noient estes esbahi
Amis dist il ne vous troublés
Le vrai Dieu que vous reclamés
Deffende et vous et moi de mal
Chil guenchist vers li son cheval
Quant il l’oi de Dieu parler
Tantost il ala demander
Qui il iert et de quel pais
Et chil li dist biaus dous amis
Je sui Gavains le niés le Roy
Pour quoi eustes vous de moi
Paour quant je vous apelai
Sire dist il je vous dirai
Que che est l’Atre perillous
Qui mout asaut maleurous
Ou vous avés vostre hostel pris
Chascune nuit je vous plevis
Et ne tenés mon dit a fable
Souvent herbergent li diable
Ou .II. ou .III. je ne sai cans
Mais passé a plus de .C. ans
Qu’il n’i herbegua chevalier
Ne nul homme de nul mestier
C’on ne trouvast au matin mort
Arivés estes a mal port
S’autre hostel de chest de querés
Mais se vous croire me volés
Je vous herbegerai mout bien
Car chou chastel laiens fu mien
Si le donai a .I. chevalier
Et avec ma seur a mouillier
Encor se dormoient trestuit
Hui quant j’alai en mon deduit
Pour berser en chele forest
Chest .I. deduit qui mout me plaist
Orendroit .I. chierf i feri
Trestoute jour l’ai poursievi
Tant que l’ataint mon liemier
Au deffaire et a l’escorchier
Me sui longuement demouré
Veés chi com je l’ai troussé
S’en arons orendroit mout tost
Assés en essiau et en rost
Sire dist il pour Dieu vous pri
Que vous ne remanés ychi
Se vous vostre cors avés chier
Mais venés laiens herbegier
La u vous arés mout boin hostel
Et Gavains dist amis n’oi tel
Je ving ore a le porte errant
Si me respondi .I. sergant
Que je crioie pour noient
Et m’aficha mout durement
Des que couchiés est le soleil
N’i metroit pas homme l’orteil
Sont tantost les portes barees
Ne ja ne seront desfremees
Ains sera levés grant matin
Par foi fait il che est le fin
De che vous dist il verité
Mais nous venrons ja au fossé
Ens jeterai ma venison
Et nous meismes i saurrons
Puis irons vers le mur amont
Mes vallés qui la dessus sont
Qui or ne sont pas asseur
Aront tost trait devers le mur
Le venison et vous et moi
Amis fait il Gavains quel conroi
Seroit de nostre cheval pris
Sire fait il par chest pais
Le lairons paistre toute nuit
Li miens en est mout trés bien duit
Ja des murs ne s’eslongera
Li miens fait Gavain que fera
Qui ne connoist pas le pais
Sor le m’avoient leus ochis
Ou aucune beste sauvage
Il me seroit tout mon aage
Qu’il ne porroit estre chelé
En me contre reprouvé
Que jou ne l’aroie seul laissié
Comme couart par malvaistié
Si l’aroient estranlé leus
Chertes n’i remanrra seus
Ains prendrai o lui bien et mal
Se vous fait il pour un cheval
Vous y laissiés de gré morir
Vous vous porrés pour fol tenir
Amis dist il che est l’estrous
Je n’irai pas ensamble o vous
Quant mon cheval n’i enterroit
Mais or vous pri s’estre pooit
Que vous me creantés .I. don
Dont je rendrai le guerredon
Se je puis escaper de chi
Et chil respont jel vous otri
Seur le loiauté que jou ai
Que se jou puis jel vous dourrai
Amis dist il or entent donc
.I. chevalier qui trop est lonc
S’est herbegiés en chel chastel
Sachiés qu’il ne m’en est pas bel
Si emporte une damoisele
Grant et gent courtoise et bele
Que il prinst hui par son desroi
En ma garde a le court le Roy
Mout par en ai esté mari
Trestoute jour l’ai poursievi
Mais onques ataindre nel poi
Onques si grant courous mais n’oi
Comme s’il le gardoit hui mais
Pour m’amor en prenés tel fais
S’il onques puet estre a nul fuer
C’a nuit mais le gart vostre suer
Si m’arés mout servi a gré
S’il en faisoit se volenté
Je n’aroie jammais honnor
Et demain quant il iert grant jour
Si en soit tout en pais saisi
Se faire le poés ainsi
Ne me caut puis quel part il aille
Car lors venrai a ma bataille
Et chil li dit che iert bien fait
Les grandismes galos s’en vait
Car plus demourer n’i osa
Au fossé vint si apela
Ses vallés qui dedens estoient
Et qui mout grant peur avoient
Qu’il ne fust mort ou afolé
Sa venison jete el fossé
Et il meismes i sali
Son cacheour ad cans guerpi
Quant le harnois en ot osté
Tout en a avec li porté
Le harnois et le venison
Dont n’i ot autre arestison
Vistement l’ont seur le mur trait
Au seigneur le nouvele en vait
Que li vallés estoit venus
Et il est encore acourus
Hors du castel par une rue
Liés et joians de sa venue
Le dame meismes i keurt
Et toute le gent de le court
N’i remest ne huissier ne gaite
Onques tel joie ne fut faite
Pour le cors d’un seul damoisel
Com en fist pour li el chastel
Car a enscient savoient tuit
Qu’il estoit alés en deduit
En la forest pour archoier
Si cremoient qu’au repairier
Pour che que tant a demouré
L’eust le diable encontré
Qui gardoit l’Atre perillous
Pour lui furent si peurous
Qu’il n’en y a nul si hardi
N’en soit du tout acouardi
Lors s’en sont en le sale entré
Et li vallés a esgardé
Le chevalier qui se seoit
Et le puchele que il voit
Dont Gavains li fist le priere
Auques le connut a le chiere
A le maniere et au sanlant
Du chevalier qui trop iert grant
Lors mist a raison le seignor
Sire fait il si grant dolor
N’avint onques che sachiés vous
La hors en l’Atre perillous
Ne si grant mais n’i avenra
Comme en cheste nuit avenra
Bien doit tout le monde plourer
Car el monde n’avoit son per
De largueche de courtoisie
Et pour se grant chevalerie
N’est il de riens plus orguellous
Maudit soit l’Atre perillous
Quant il onques s’i herbega
Quant li Rois Artus le sara
Tout en destruira le pais
Car li boins Rois poosteis
Nous demandera tout par droit
Sen neveu qu’il pert orendroit
Il le pert ch’est mout grans damages
He Dix si grant duel sen lignage
En ara quant il le saront
Et trestoute le gent du mont
Qu’il le connoissent nis d’oir dire
Aront de se mort duel et ire
Car trop iert prisiés et amés
Sire dist il or escoutés
Par quel fourfait et par quel tort
Et l’acoison pour quoi est mort
Chel chevalier que jou la voi
Vint orains a le court le Roi
Quant il seoit a son mengier
Cheste puchele vint des ier
Presenter au Roi sen serviche
A le court demeure en tel guise
Et de le coupe serviroit
Et que Gavains le garderoit
D’encombrier de honte et d’anui
Orains le saisi devant lui
Chel chevalier par son orguel
Par mi le forest de Carduel
L’a Gavains toute jour sievi
En l’Atre perillous le vi
La u j’ai grant pieche o lui esté
Si m’a de chief en chief conté
Com il l’a sievi toute jour
Je li priai par grant amour
Qu’il venist chaiens herbegier
Mais il ne vaut pour son destrier
Venir i pour nule priere
Et se vous avés m’amor chiere
Ne riens nule que faire puisse
Gardés que bon ami vous truise
Car une cose vous demant
Et chil respont je le vous creant
Quanques vous oserés requerre
Nis se ch’estoit toute me tere
Sire dist il vostre merchi
De cheste puchele vous pri
Que me suer le gart anuit mais
Et le matin l’ara en pais
Li chevaliers qui l’amena
Messires Gavains m’en pria
Que fust anuit hors de se garde
Et chil fierement le regarde
Puis li a dit chou n’iert ja fait
Mal .VC. mile dehais ait
Qui en tantes cours l’a sievie
Et qui en fist tele estoutie
Devant le Roi seur sen mengier
Orains veant maint chevalier
S’anuit le garde nus fors moi
Et tout ainsi le vous otroi
Tant comme estre puisse seur piés
Li Sires iert bien afaitiés
Qui li pria mout douchement
Que il l’otroit sans mautalent
Le dame li pria aprés
Et toute le gent du palés
Que il l’otroit si fera bien
Et chil respont che ne vaut rien
Je ne le feroie pour homme
Li vallés dit chou est la somme
Que se mon plaisir ne m’est fait
Que je sui chil qui s’en revait
A Monseigneur Gavain arriere
Si li dirai que sa priere
Nu peut estre par moi furnie
Il est plus bel que je le die
Et que je aille arriere lui
Quant je en foi faire li dui
Pour prendre avec lui bien et mal
Qu’il me tenist pour desloial
Quant li Sires voit et entent
Que chil a de chertes l’emprent
Et qu’il s’en veut aler arriere
Amis fait il se par priere
Ne puet estre vostre boin fait
J’en ferai anchois .I. fourfait
C’ui mais issiés de chest castel
Vassal dit il il est plus bel
Que le me bailliés par amor
Si en arés gregneur honnor
Que vous soit par forche tolue
Que ja ne vous iert mais rendue
Se on le vous tant par mellee
Et s’el m’est par amor livree
En pais le rarés le matin
Chil set et voit que ch’est le fin
Que pour droit nient a che s’esforche
Car rendre li couvient par forche
Si qu’il ne puet aler par el
Sire dist il en vostre hostel
Me herbegai par boine foi
Or entreprenés vous vers moi
Qui dites que ja m’iert tolue
Ou par amor vous iert rendue
Le puchele que je tant aim
De traison ja .I. rain
Nus ne vous en porroit deffendre
Amis je vous ferai entendre
Car au Sire estre l’estuet
Et qu’autrement estre ne puet
Se vous a raison entendés
Le puchele que vous portés
N’est pas vostre ains l’avés toloite
Dont est raison fine et droite
Que ne doit pas o vous couchier
Que la hors a .I. chevalier
Qui gist anuit a le capele
Et vous suit pour le damoisele
Qu’il dit que il se combatra
Et que demain desrainera
Que vous estes a tort saisi
Et s’il le puet prouver ainsi
Dont arés vous a mout grant tort
De lui ne joie ne deport
A grant tort ariés eue
Joie ne soulas de sa drue
S’il le puet vers vous desraisnier
Sire che dist le chevalier
Il n’est pas pour son dit prouvé
Bien m’eust ataint et trouvé
Ains que chaiens fusse venu
S’il y eust son preu veu
Car j’esroie mout belement
Et le cheval n’est mie lent
Seur il quoi il m’aloit poursievant
De droit sui nient alés plaidant
Fait li Sires que ch’est l’estrous
Je le prendrai ja veant vous
Ou ele iert par moi livree
Chil set trés bien que par mellee
Ne le puet il mie deffendre
Si li vient miex par amor rendre
Qu’estre laidis et perdre la
Sire fait il puis qu’ainsi va
Que rendre le m’estuet en fin
Et que je l’arai le matin
Je soufferrai a mout grant paine
Le dame le prent si l’enmaine
En se cambre qui mout iert bele
Entre lui et le damoisele
Il mengierent mout liement
Li Sires a toute se gent
Mengierent en le sale tuit
A grant joie et a grant deduit
Fors seulement le chevalier
A chelui despleut le mengier
Quant il n’i vit le damoisele
Par le vile en va le nouvele
Que Gavains estoit herbegiés
Puis que le soleil fu couchiés
La hors en l’Atre perillous
Mout par en furent angoussous
Clerc et bourgois et chevalier
Tout le pueple va au moustier
Prier Dieu qu’il le gart de mort
La oissiés .I. duel si fort
Qu’il ne porroit estre conté
Li plusor sont as murs alé
Pour escouter che que sera
Et comment si esploitera
Mesire Gavains s’est assis
Seur .I. tombel de mabre bis
Entre le mur et le canchel
Tant par iert riche le tombel
Que je n’en os dire l’entaille
Car je mout crien que je n’i faille
Ne si fu pas sis longuement
Quant desous li esmouvoir sent
Contremont et sourdre le lame
Grant merveille ot quant n’i vit ame
Qui la abit ne tant ne quant
Et le lame se va sourdant
Que l’espiez li ostent de tere
Il va .I. autre siege querre
Car cheli ne li gree pas
N’eut pas alé plus de .IIII. pas
Quant le tombel fu tout ouvert
Et qu’il y vit tout en apert
Une damoisele gesant
Et se leva tout en estant
Tout veant Monseigneur Gavain
Et il leva se destre main
Si seigna sen kief et sen vis
Et quidoit bien en sen avis
Puis l’eure qu’il onques fu nés
Ne qui seut connoistre biautés
N’eut il si trés bele veue
Si fu si richement vestue
Mi partie de deuz samis
Qu’il en fu auques esbahis
L’un vert et l’autre vremeil
Gavains fait ele mout me merveil
Que vous avés peur de moi
Damoisele fait il je voi
Chou que je onques mais ne vi
Se j’en sui .I. peu esbahi
Ne vous en devés merveillier
Il n’a si hardi chevalier
El roiaume le Roi Artur
Qu’il fust mie bien aseur
Si vous avoit trouvé ainsi
Sire fait ele je vous di
Que je sui cose de par Dé
Et Dix vous a chi amené
Pour geter moi hors de prison
Je sai pour voir se par vous non
Que jammais n’iere hors a nul jour
D’ire de paine et de dolour
Mais je n’en istrai anuit par vous
Bele de l’Atre perillous
Me dites fait il tout le voir
Car j’ai grant talent de savoir
De chest nom comment il l’ot primes
Si veul savoir de vous meismes
Des quant et pour coi et comment
Vous estes si soutievement
Ele respont Sire mon pere
Prist femme aprés le mort me mere
Qui mout fu de lui au dessus
Mout fu bele mais jel fu plus
Si eut de moi mout grant envie
Par caroy et par sorcherie
Et par trayson m’engigna
Si faitement m’ensorchera
Que j’en issi hors de mon sens
Com fole alai tout .I. lonc tans
Que je ne soi que je faisoie
Seule aloie .I. jour une voie
Si encontrai che fu la somme
.I. diable en sanlant d’omme
A raison me mist erraument
Bele dist il chest tourment
Et de le grant enfermeté
La u vous avés lonc tans esté
Se vous vouliés estre moie
Hui en chest jour vous gariroie
J’oi de garir mout grant talent
Si li creantai esraument
A faire de tout son plaisir
Et paine mesist a moi garir
Onques puis n’och point de chu mal
Puis me montai seur mon cheval
Et m’aporta dessi que chi
Des ichel tans que je vous di
Ay puis esté ensanle o lui
Mout ai vescu a grant anui
Car trestout son plaisir faisoie
Chascune nuit et si gesoie
Chascun jour seul en chest tombel
Et nepourquant que mout m’iert bel
A son sens et a son pooir
Me faisoit il trestout avoir
Tous m’acomplissoit mes aviax
De beles robes et joiax
Et de viande a mon plaisir
Mais je vausisse miex morir
Que estre soie tant le hayoie
Quant chascune nuit le veoie
Venir si lait et si hideus
Pour che est l’Atre perillous
Que ch’iert chi tous jours son hostel
Sire dist ele or n’i a el
A lui combatre vous couvient
Car je sai de voir que il vient
Et qu’il n’est mie loins d’ici
Or ne soiés mie esbahi
Ayés en Dieu boine esperanche
Se vous avés ferme creanche
Mar le douterés ja de rien
Le crois vous le connissiés bien
Dont je voi l’ensengne lassus
Quant vous onques en serés plus
Angousseus de vostre bataille
Regardés le sans nule faille
Et prenés ileuc vostre alaine
Et des deuz pars de vostre paine
Serés maintenant alegié
Se vous n’avés de moi pitié
Biau Sire si l’aiés de vous
Car sachiés bien tout a estrous
Qu’il vous ochirra ou vous lui
Ne jammais n’istrai hors d’anui
Se vous anuit ne m’en hostés
Biaus dous Sire or vous atournés
Et montés seur vostre cheval
Car li traitres desloial
N’est pas loins demie lieuee
Lors a Gavains se teste armee
Si est seur sen cheval montés
Le puchele au cors achesmés
De l’armer se haste et avanche
Sen escu li baille et se lanche
Estes vous le diale au mur
Or soiés fait ele seur
Ens est entrés par mi le porte
Putain fait il vous estes morte
Et vostres lechierres honnis
Vilainement iert departis
A court terme chest parlement
Mar vit le vostre acointement
Chele respont comme courtoise
Chertes fait ele mout me poise
Que j’onques fu vostre putain
Mais veschi Monseigneur Gavain
Qui mout est prisié et amé
Et j’ai bien me creanche en Dé
Qui li sera anuit aidant
Si n’ier jamais vostre soignant
Quant chil seut que Gavains fu
A merveille fu irascu
Car bien set que mout iert prisiés
Si se sont tantost eslaissiés
Tant com cheval pueent randir
Si le fierent en tel air
Des lanches deseur les mameles
Que les .II. volent en asteles
Onques pour chou ne s’aresterent
Si durement s’entrecontrerent
Des chevaus des cors des escus
Que il se sont entrabatus
Aux et les chevaus tout ensamble
Gavains de maltalent trestramble
Si est tantost en piés sailli
Et chil ne fu mie esbahi
Ains a mis le main a l’espee
Atant commenche le mellee
C’onques hom si dure ne vit
Mout doutent l’un l’autre petit
Au sanlant que chascuns d’aux fait
Au diable le sanc li vait
Si fiert par sous le hiaume amont
Qu’en plusieurs lieus le quasse et font
Gavains fierement le rechoit
Bien li paie quanqu’il li doit
Car il le fiert tout abandon
De quanques il peut de randon
Ains que l’assaut fust departis
Mout par fu grans li fereis
Li diables le fiert du brant
Amont seur le hiaume luisant
Que le checle en a rompu
Le cop si glacha seur l’escu
Si l’en abat plus d’un quartier
Gavains le fiert du branc d’achier
Si durement el hiaume amont
Les boines pierres qui i sont
Esmeraudes safir topache
Abat devant li en le plache
N’i remest ne or ne esmal
Qu’il l’abate contreval
Le cop desus le hanke
De le brongne qui tant iert blanke
A abatu le destre pan
Il sont touz deus en grant ahan
En grant angousse et en grant paine
Chascuns d’aus mout forment se paine
De l’autre grever et laidir
Li diables ot grant air
Mout grant proeche et mout grant forche
Gavains recule jusqu’a le porte
A l’entree de le capele
Gavains che dist le damoisele
Dont ne creés vous bien en Dé
Le glorieus de maisté
Vesla l’ensengne de le crois
Gavains a entendu et vois
Et le parole a le mechine
Seure li keurt par tel ravine
Qu’il le recule .XV. piés
Mout par fu li diables iriés
Qu’il voit que refuser l’estuet
Seure li keurt si tost qu’il peut
Si li fist .I. autre envaye
Deseur le hiaume qui reflambie
Le fiert devers le destre part
Du hiaume li abat le quart
Et des mailes de l’aubert chent
Le cop seur l’espaulle descent
Si qu’il l’a en .II. lieus navré
Ferant ferant l’en a mené
Tant qu’el porche l’a embatu
Gavains tint le branc esmolu
Si se deffent si comme il puet
Au diable le sanc li muet
Si li a fait le tiers assaut
Le sanc qui des plaies li saut
L’a mout grevé et afebli
Longuement se combat ainsi
Et se deffent a mout grant paine
A poi qu’a son talent nel maine
Li diables qui grant forche a
Mais Gavains mout bien s’efforcha
Pour le puchele qui plouroit
Et nepourquant mestier li oit
Chou qu’il ot adossé les huis
Qu’il ot en la teste et el pis
Et es espaulles mainte plaie
Le puchele forment s’esmaie
Qui si afeblier le voit
Lasse fait ele che que doit
Que li diables a si grant vertu
Ha boin chevalier que fais tu
De le crois dont ne te souvient
A Gavain se forche revient
Se proeche et son hardement
Seure li keurt mout radement
Quant il ot le crois apelee
Tel cop li donne de l’espee
Qu’il l’a a genous abatu
De chief en chief li a fendu
Que le moitié en chiet a tere
Et autrefois l’ala requerre
Quant il vit que il l’ot grevé
Et seur ton tombel reculé
Qui iert derriere ses talons
Li tombiaus iert et haus et lons
Il l’a empaint droit par dessus
Que vous en diroie je plus
Si durement par dessus chiet
Qu’il n’a pooir qui se rehet
Au keir que li autres fist
Et au grant branle que il prist
Est le hiaume en tere ferus
Si que les las en sont rompus
Et qu’il vola loins en le plache
Gavains en vit nue le faiche
Si fiert du branc par mi le vis
Si qu’il a tout le nés pris
La faiche et demi le menton
Puis le refiert tout abandon
Si qu’il en a le teste prise
Lors s’est le damoisele assise
Qui mout a grant peur eue
Puis dist icheste sourvenue
Soit de Dame Dieu benoite
Longuement ai esté destroite
En grant dolor et en grant ire
Bien puet trestout le monde dire
Que chest chi le boin chevalier
Et chil qui tous jours seut aidier
Aus damoiseles au besoing
Bien ont oi l’estor de loing
Et les assaus et les chembiaus
Chil qui estoient aus querniaus
Bien sevent que l’un est vaincu
Mais ne sevent lequel che fu
S’ont de Gavain mout grant paour
Ainsi souffrirent jusqu’au jour
En tel ire et en tel pensé
Et il a son chief desarmé
Si s’est couchiés lés le capele
El devant a le damoisele
Tantost comme il fu adjournés
Et que li solaus fu levés
Poinst le vallet a le capele
N’ot chevalier ne damoisele
Ne bourgois en tout le chastel
Ne keure aprés le damoisel
Pour Monseigneur Gavain veoir
Si ont grant talent de savoir
Comment ot le nuit esploitié
A grant mervelle furent lié
Quant sain et sauf l’orent trouvé
Et a mervelle ont esgardé
Le diables qui ert ochis
Pour chou qu’ot gasté le pais
S’en ont grant joie demenee
Le nouvele est par tout alee
Que li diables est ochis
Et si sevent bien trestuit
Que l’atre avoit sen non perdu
Li chevaliers levés se fu
Si demanda se damoisele
Quant il ot fait metre se sele
Et il se fu mout bien armés
Si est seur sen cheval montés
Et le puchele devant lui
Ainsi chevauchent ambedui
Le grant chemin vers son pais
Et Gavains a a raison mis
Le vallet qui a lui revint
Biaus amis dist il que devint
Le puchele et le chevalier
Sire dist il seur son destrier
Estoit montés quant je ving cha
Et si sai bien que il s’en va
Le grant chemin vers se contree
Mais bien fu ersoir achievee
Le priere que me feistes
Et tout ainsi com vous deistes
Le garda me suer toute nuit
Si le remist en son conduit
Luy quant il se fu armés
Biaus amis dist il or pensés
Et de moi et de mon destrier
Que nous eussons a mengier
S’iert vostre bonté parfaite
Mout ai anuit male nuit traite
Si ne mengai des ier matin
Chil est montés seur son ronchin
Qui iert grant et fort et isnel
Si s’en va poignant au chastel
Deus de ses vallés apela
Pain et vin assés leur bailla
Et grant plenté hastes rostis
Et .I. pasté de .II. pertris
Assés lor bailla .I. et el
Blans doubliers et hanas et sel
Si lor bailla avaine et fain
Puis revint poignant a Gavain
Qui l’atendoit au chimentire
De che ni a il plus que dire
Fors qu’il mengierent liement
Gavains commencha erraument
A metre sen frain et se sele
Sire che dist le demisele
Pour Dieu et pour honnor vous pri
Que ne me laissiés seule ichi
Car mout remaurroie esgaree
Aler veul en vostre contree
Avoecques vous si vous est bel
Sire che dist le damoisel
Menés ent le puchele a moi
Et g’irai querre .I. paleffroi
S’il vous plaist que chevauchera
Car j’ai grant talent des piecha
D’aler m’ent en vostre serviche
Biaus amis a vostre devise
Veul je fait il que tout soit fait
Et chil querre .I. paleffroi vait
Vistement arriere au chastel
C’onques ne veistes plus bel
Ne plus cointement atourné
Le paleffroi fu amené
Si est le puchele montee
A Gavain a se teste armee
Si monta seur le sor cheval
Et puis oirre aprés le vassal
Tuit .III. ainsi faitierement
Chevauchié ont bien longuement
En tel guise com je vous di
Tant qu’il vient aprés miedi
Et qu’il virent le chevalier
Biens loins devant aus chevauchier
Et il l’ont bien reconneu
Et au destrier et a l’escu
Qui iert d’une colour vermeil
Si reluist contre le soleil
Si l’ont pour chou mix avisé
Qu’il l’avoit arriere geté
Pour le puchele qu’il portoit
Le damoisele grant duel ot
Que Gavains trouva el sarcu
Plus devint vermeille que fu
Quant ele vit que che iert chil
Sire fait ele est chou chil
A qui vous vous devés combatre
Se trois l’assaloient ou quatre
Si aroient il mout a faire
Ains que riens li peussent faire
En Bretagne n’a chevalier
Plus outrecuidié ne plus fier
Ne plus douté en son pais
Maint boin chevalier a ochis
Par fourfait et par estoutie
Se vous poés sans vilenie
Et sans grant blasme retourner
Je vous os bien dire et loer
Que vous laissiés cheste bataille
Onques ne feistes sans faille
Nule riens nis chele d’ersoir
Que vous deussiés tant cremoir
Comme vous deussiés chestui
Tant ai oi parler de lui
De se forche et de se valeur
Que je n’ai mout trés grant peur
Et Gavains dist ja Dix ne plaiche
Que je m’en fuie ainsi de plache
Tant com je soie sain ne vif
Ne qu’il ait ainsi sans estrif
Le demisele qu’il emporte
Miex vaurroie fait ele estre morte
Que vous perdissiés veant moi
Par forche nis le petit doi
Car de dolour m’avés jetee
Et je dout tant cheste mellee
C’onques mais si grant peur n’oi
Sire par le diable s’oi
Qui il est et de quel valour
Il a dusques a nonne de jour
Le forche de trois chevaliers
Les plus hardis et les plus fiers
Que on puisse en nul lieu trouver
Quant le soleil doit decliner
Des qu’il est nonne en avant
Se va .I. poi afebloiant
Petit a petit afeblie
Desi a l’eure de complie
Mais tous jours est fors et hardis
Ja ne sera tant afeblis
Che sachiés vous seurement
Qu’il n’ait forche ne hardement
Contre le melleur chevalier
Qui vers li ost armes baillier
Une autre cose vous en di
Si sarés miex qu’il est ainsi
Vostre mere si fu mout sage
Auques vous dit de son courage
Je sai bien qu’ele fu faee
Si vous dist vostre destinee
Et vous acointa sans mentir
Quant il vous devoit avenir
Mout vous pria que preuz fussiez
Et ja nul jor que vescussiés
Ne seriés vaincu ne mort
Pour nul homme qui tant fust fort
Mais ele vous dist de chestui
Que vous gardissiés bien de lui
Qu’ele ne doutoit se li non
Et je vous dirai ja son non
Si porrés miex par che savoir
Se je vous di menchongne ou voir
Bien sai qu’ele le vous nomma
Ainsi vous dist et devisa
Qu’il n’avoit plus fel chevalier
Plus outrequidié ne plus fier
Ne plus fort en toute Bertaigne
Ch’est Esenor de le montagne
Tant vous dist ele de chestui
Que s’il vous couvenoit a lui
Combatre qu’ele ne savoit
Ainz iert en doute qui vaintroit
Bele dist il ch’est verité
Ainsi com vous l’avés conté
Le me dist ele et devisa
Mais ja tant Dix ne me harra
Que je m’en aille arriere ainsi
Miex veul estre mort ou honni
Car le mort est tost trespassee
Et le honte a longue duree
Car chascuns le dit et reconte
Et je ne porroie sans honte
Che veés vous bien retourner
Tant m’estuet aprés li aler
Que il m’ochirra ou je lui
Mout dout fait ele vostre anui
Mais quant autrement ne puet estre
Et vous savés si bien son estre
Sen contenement et sa vie
Et savés bien qu’il afeblie
A l’abaissement du soleil
Se volés croire men conseil
Ja a lui ne prendrés mellee
Desi que nonne soit passee
Bele fait il je vous querrai
Aprés nonne m’i combatrai
Si com vous le m’avés loé
Toute jour ont ainsi erré
Tant qu’il vinrent a une haie
Et chil qui point ne se deslaie
Qui grant pieche l’avoit passee
Fu entrés en une valee
Si que Gavains en ot perdue
Une grant pieche le veue
Et que il ne vit ne ne sot
Quel part le chevalier erroit
Lors se commencha a haster
Puis le vit devant lui errer
Bien loins par mi une campagne
Il esgarda aval le plaigne
Si vit devant li .I. chastel
Onques si bien clos ne si bel
Si riche ne si bien assis
N’ot mais veu a son avis
Lors quida bien de verité
A chou qu’il estoit avespré
Que le chevalier qu’il sievoit
El chastel se herbegeroit
Si vit trés bien que prés ne loins
Tant estoit le chevalier loins
Ne l’ataindroit il ainz l’ostel
Vallet dist il or n’i a el
Je voi bien que chu chevalier
S’ira ja laiens herbegier
Et nous comment le porrons faire
Chil qui iert franc et deboinaire
Li respondi Sire mout bien
Mar vous esmaierés de rien
Tant com je soie sains ne vis
Chest chastel et tout chest pais
Et chest grant forest fu moie
A une autre seur que j’avoie
Donna trestout a mariage
A .I. chevalier preu et sage
Creantai tout le contree
O ma seur qu’il a espousee
Si quit bien que chu chevalier
S’ira ja laiens herbegier
Et nous irons a .I. bourgois
Qui est riches sage et courtois
Qui fu hom men pere or est mien
Qui vous herbegera mout bien
Car che ne seroit mie bel
Que nous alissons el chastel
Pour nul besoing prendre l’ostel
Avec vostre anemi mortel
Va dont fait il sans demourer
Faire l’ostel appareillier
Que delivre et bel le truisons
Le vallet fiert des esperons
Le ronchin qui mout tost le porte
Lors vit entrer par mi le porte
Le chevalier qu’aloit sievant
Il va les rues trespassant
Tant qu’il est venus au seignor
Chis Diex dist il vous doinst honor
Biau Sire qui pour nous sauver
Se laissa en le crois pener
Amis dist il et Dix vous gart
Traveilliés estes et si est tart
Bien est saison de herbegier
Et je vous ferai sans dangier
En chest chastel mout boin hostel
Sire dist il je ne quier el
Le vostre mout grant merchi
Lors est un chevaliers salli
Qui le damoisele descent
.I. damoisiaus sen cheval prent
Et deuz le keurent desarmer
Or m’estuet du vallet parler
Qui estoit au bourgois venu
Et quant le bourgois l’a veu
Mout en a grant joie menee
Sire dist il vostre jornee
Est parfaite che sachiés vous
Herbegiés est a estrous
Ja mar prier vous en ferés
Demain tout a loisir irés
Vers vostre seur el chastel
Sire che dist le damoisel
Je sui herbegiés voirement
Mais or montés delivrement
S’irons encontre .I. chevalier
Que ja main chaiens herbegier
Si li faites mout grant honor
Que onques son per ne mellor
N’iert trouviés en toute Bretaigne
Des les pors jusqu’en Alemagne
N’en a nul si bien entichié
Si vous devés faire mout lié
De che que vous est avenue
Si grant joie de sa venue
Mout en fu li hostes joianz
Tantost apele ses serganz
Si leur commande a aprester
Le seir le fu le souper
Si delivrement et si bien
Qu’il ne se peust blasmer de rien
Puis est montés seur .I. destrier
Grant et fort isnel et legier
Si s’en sont de la vile issuz
Et Gavains estoit ja venus
Desi qu’as portes du chastel
Mervelles les apela bel
Le bourgois c’avecques li maine
En le sieue chambre demaine
Isnel le pas les fist descendre
Il avoit fait tapis estendre
Et keutes pointes a seir
Si y mena Gavain seir
Devant euz iert le fu mout grant
Tantost acourent li servant
Pour lui desarmer erraument
Mervelles le sert boinement
Le damoisele au chief bloi
Or vous souffrés fait il .I. poi
Ne sui pas encor desarmés
Lors a son vallés apelés
Amis fait il va tost et cour
Lassus amont en chele tour
Et si fait tant par ton pourcas
Que chil n’ait joie ne soulas
De le puchele qu’il enmaine
Pour moie amor y met grant paine
Que te seur cheste nuit le gart
Et si li di de moie part
Que si ne le veut creanter
Qu’il n’i a fors du remonter
Car je m’en combatrai anchois
Qui le gart mais seur mon despois
La vallet vistement i court
Alé s’en ierent de la court
En le sale ou il se seoit
Et quant li chevaliers le voit
Mout par l’ont tuit bel apelé
Et Escanor l’a regardé
Si l’a mout bien reconneu
Puis li dit mal soiés venu
Sire fol gars mal afaitiés
Jamais nul jour ne serai liés
Dusques de vous vengiés me soie
Se hors de chaiens vous tenoie
Je m’en vengeroie mout bien
Qui de m’amie mal gré mien
Ersoir de partir me feistes
Seignor fait il ainz ne veistes
Si fol garchon ne si forfait
Trestout lor a conté le plait
Com le nuit devant l’ot servi
Et li Sires li respondi
Sire ja Dix le fil Marie
Ne vous doinst forche ne aye
De lui empirier ne grever
Or laissons fait il chou ester
Qu’il morra encor de mes mains
Li vallés qui n’iert pas vilains
Le respondi trestout en pais
Sire dist il je n’en puis mais
Se me haés pour chest meffait
Seigneurs dist il de chel forfait
G’en sievrrai vostre jugement
Se je fais le commandement
Monseignor avec qui je sui
Je le fis ier si ferai hui
Ja pour manache ne lairai
Sire dist il je vous dirai
Comment chest estrif est monté
De chief en chief le verité
Com il saisi par son desroi
Le puchele a le court le Roi
Et comme Gavains l’a sievi
Et comment il se combati
A l’aversier el chimentire
Onques riens n’i laissa que d’ire
Comme il l’a servi toute jour
Lors mist a raison le seignour
Sire dist il je vous requier
Que se vous m’avés de riens chier
Que vous .I. don me creantés
Ainsi dites che que volés
Ja de riens ne contredirai
Non ferai je tant que vivrai
De riens que je puisse furnir
Biens vous devroie a gré servir
Qui me donnastes chest chastel
Sie che dist le damoisel
Mesire Gavains m’en pria
De chele damoisele la
Que me seur le gart anuit mais
Si soit rendue tout en pais
Le matin a chu chevalier
Et je vous veul forment prier
Que vous ainsi le faites faire
Lors ne se puet Escanor taire
Quant le parole ot entendue
Me veus tu dist il de ma drue
Comme ersoir faire departir
Miex vaurroie je orendroit morir
Que jammais tant com je vis soie
Soit en garde fors en la moie
Sire dist il se vous creés
Chel garchon que vous la veés
Vous en arés honte et anui
Quant par vostre priere sui
Herbegié en vostre maison
Se on me faisoit se bien non
Il vous seroit a mal tourné
Par foi fait il ch’est verité
Jou meismes vous herbegai
Mais au vallet creanté ai
Que jou feroie se priere
Or ne sai en nule maniere
Lequel je puisse mix laissier
Sire che dist le chevalier
Chest honnor et fine raison
Que vous gardés de traison
Car vous en seriés restés
Se j’estoie de riens grevés
Par vous ne par vostre seu
Se g’i avoie mal eu
Vilenie ne encombrier
Vous en ariés reprouvier
A tous les jours de vostre vie
Et li Sires ainsi l’otrie
Et li dist qu’il soir aseur
Car se che iert le Roi Artur
Ne li consentiroit il mie
Que il li feist vilenie
Tant comme il fust en son chastel
Amis fait il au damoisel
Je ne l’en puis pas dessaisir
Si nel veut de son gré souffrir
Ne je ne doi pour nule perte
Faire traison si aperte
Par vous ne par vostre conseil
Par foi fait il mout me merveil
Que vous ne faites tout le mien
Soit tors soit drois ains que le sien
Mais quant faire ne le volés
Li chevaliers est tout armés
Qu’il poursieut pour le damoisele
Encore n’osta ne frain ne sele
Si est a l’ostel d’un bourgois
Et il se combatra anchois
Qu’a nuit outre son gré le gart
Et je li di de soie part
C’orendroit remont si s’atourt
Car ja sera en vostre court
Che sachiés vous tout a estrous
Le bataille par devant vous
Lors keurt pour Gavain a l’ostel
Li Sires dit or n’i a el
Escanor quant Gavains cha vient
A lui combatre vous couvient
Mais je vous lo c’autrement aille
Laide seroit cheste bataille
Et vilaine s’or iert par nuit
A mal seroit tenu je quit
Se ne le metés en respit
Et li chevalier li ont dit
Que che seroit grant vilenie
Il est plus bel qu’il baut s’amie
En le garde a le dame hui mais
Et le matin l’ara en pais
Le dame meismes l’en prie
Et si li pramet et otrie
Que loiaument le gardera
Et le matin li rendera
Creanté l’a a mout grant paine
Le dame le prent si l’enmaine
En se cambre dedens le tour
Si li a fait mout grant honnour
Comme de boire et de mengier
Et de biau lit a li couchier
Li hostes qui grant joie en a
.I. de ses vallés apela
Va fait il et si di Gavain
Qu’il se herbert jusqu’a demain
Car li chevaliers a livree
La damoisele sans melle
En le garde a le dame hui mais
Et chil i keurt tout a eslais
Si est chiés le bourgois alés
Mesire Gavains iert montés
Tout prest pour aler a le court
Chil li a dit qu’il se demourt
Et qu’il s’aaise bien et repost
Amis dist il ains que je ost
Mes armes me di verité
Se Escanor a creanté
Le demande que je li fis
Et chil li dist je vous plevis
Qu’il l’agrea a Monseignor
Alee s’en est en le tour
O madame est que je le vi
Gavains qui pas ne l’en crei
Que miex en veut estre envoié
Tantost son vallet y envoié
Pour savoir se ch’est verité
Si comme chil li ot conté
Lors keurt le vallet a le tour
La damoisele et sa serour
Trouva deseur .I. lit seant
Puis revint a l’ostel courant
Si li a dit que ch’ert bien voir
Atant s’ala Gavains seoir
Si l’ont si serjant desarmé
En maint lieu ot le vis hurté
Si que li sans en iert salis
S’en estoit .I. poi enlaidis
Que du sanc que de sa suour
Li Sires ot une serour
Bele courtoise et deboinaire
A qui il ot fait le baing traire
Pour baignier monseignor Gavain
Mout par l’ot fait bel et a plain
Si qu’il iert ja tout apresté
Lors l’ont en la chambre mené
Si l’ont bagnié et coustei
Mout trés douchement l’a servi
Le seur a l’oste a son pooir
Et si poés trés bien savoir
Que chele qu’il ot amenee
S’est de lui servir mout penee
Quant baignié fu a grant loisir
Et il se veut du baing issir
Lors li aporta par franchise
Le seur a l’oste une chemise
Et unes braies de chainsil
Plus blanches que fleur en avril
Quant fu vestus et atournés
Lors fu li mengiers aprestés
Si a on l’iaue demandee
A aise lés le cheminee
Est assis Mesire Gavain
Si fist devers se destre main
Seoir l’oste et le damoisele
Qu’il amena de la chapele
De l’autre part prés de se coste
Fist aseir le seur sen hoste
Son vallet qu’il aime forment
Puis orent mout plenierement
Pain et vin et char et pisson
Oysiaus rostis et venison
Et quant il lor vint a plaisir
Mout les fist bien l’oste servir
A grant joie et a grant deduit
Mout i ot grant plenté de fruit
Tantost comme il orent mengié
Pour che qu’il furent traveillié
Firent lés le fu son lit faire
Je ne vous porroie retraire
L’onnour que li bourgois li fist
Que mout grant entente y mist
Et chascun le sert et a aise
De quant qui quident qui li plaise
Ainsi dormi et reposa
Et Escanor s’apparella
Au matin quant il vit le jour
Mout li anoie le sejour
Et mout li estoit de sa drue
Que il avoit ainsi perdue
Chele nuit et chele devant
Vistement l’arma .I. sergant
Si li mist son frain et sa sele
Il demanda sa damoisele
Et le dame l’i amena
A Gavain le nouvele en va
Qu’Escanor qui point ne se targe
A ja pendu au col le targe
Si est piecha hors de le porte
Avoec s’amie se desporte
Quant Gavains l’ot mout li desplest
Vistement saut sus si se vest
Puis a ses armes demandees
Pour che que ierent trop usees
Li a li bourgois aporté
Qui mout le veut servir a gré
Hiaume a visiere de Senlis
Et haubert de mailles faitis
Et cauches blanches si treslites
C’onques ne veistes plus riches
Mout fu clere et trenchant l’espee
Qui avoec li fu aportee
Et li escus nouviax et frés
Si iert d’un mout riche orfreis
La guiche et trestoutes les armes
Onques Gavains si riches armes
N’ot mais vu en son aé
.I. destrier fort et desiré
Rade isnel et amanevis
Le melleur de tout le pais
Li ont amené en le plache
Et Gavains dist ja Dix ne plache
Que chest serviche soit perdu
Et Dix me doinst encor vertu
Et pooir qu’en tel lieu vous truise
Que guerredonner le vous puisse
Car mout m’avés fait grant honor
Sire fait il je vous honor
Pour Monseigneur que je chi voi
Et pour vous qui je cuit et croi
Que prodomme estes et vaillant
Je ne vous sai aler offrant
Mais prenés chaiens sans dangier
Tout chou qui vous ara mestier
Que de tout vous met abandon
Mout a chi fait il riche don
Je ne vous osaisse requerre
Je ne quit que en nule terre
Si grant honor faite me fust
A homme c’on ne conneust
Et j’en avoie grant mestier
Mais de l’espee et du destrier
Ne veul je pas vostre merchi
Je l’ai grant et fort et hardi
Espee doree trenchant
Mout par est le guerredon grant
Que je doi encor du sourplus
Armer m’estuet or n’i a plus
Mout me dout de trop demourer
Grant paine a mis a li armer
Le vallet et les damoiseles
Atant furent mises les seles
Si sont les chevaus amenés
Mesire Gavains est montés
Que onques estrief n’i requist
Et li vallés son escu prist
Quant il fu montés et sa lanche
Li hostes le sert et avanche
Gavains a le puchele montee
Chele qu’il orent amenee
Puis se mirent tost a la voie
Et li boins hostes les convoie
Tant que il vinrent vers le bois
Sire dist il je m’en revois
A Dieu soiés vous commandés
Lors est Gavains el bois entrés
Tout le chemin que cheli oirre
Et Gavains le choisi a l’oirre
Ou il aloit baisant s’amie
Et Mesires Gavains s’escrie
Que consentir ne le veut plus
Vassal fait il metés le jus
Trop l’avés longuement portee
Ja plus ne l’arés sans mellee
Trop en avés esté saisi
Et Escanor li respondi
N’en blamés nului se vous non
Car par saint Ladre d’Avalon
Bien eussiés m’ataint des ier
Se trop n’est lent vostre destrier
Car je n’erroie fors le pas
Mais je ne quit ne ne croi pas
Que ja par vous en soit emprise
Vers moi en bataille nule guise
Je ne vous en depri de rien
Une chose sachiés le bien
Que j’envoiai de mon pais
Le damoisele o le cler vis
Toute seule a le court le Roi
Puis y alai par grant desroi
Prendre le veant maint baron
Pour avoir raisnable acoison
De m’i combatre encontre vous
Et Gavains dist che est l’estrous
Ja arés de moi le mellee
Quant vous tant l’avés deSiree
Le damoisele iree estoit
Et li vallés pour che qu’il voit
Que le bataille iert si matin
Sire fait il en chest chemin
N’iert pas cheste bataille bel
Je sai prés de chi .I. prael
En une lande bel et grant
Si seroit mout plus avenant
Que alissiés si vous plaisoit
Et je jugeroit par droit
Faire vostre bataille el pré
Trop vous seroit mal atourné
S’ele estoit chi en ches charieres
En chest marcais en chest roieres
Escanor dist ch’est verité
Il n’iert ja par moi trestourné
Et la u Gavains veut que jou aille
Tous jours demeure le bataille
S’en a le vallet joie grant
Amis fait il or va avant
Nous te sievrrons desi que la
Et chil en une sente entra
Si sont tant par le bois alé
Qu’il sont trestuit ensamble entré
En la lande qui mout iert bele
Lors descendi la damoisele
Escanor sor l’ombre des carmes
Puis remet entour li ses armes
Et Gavains s’est appareilliés
Puis s’est l’un vers l’autre eslaissiés
Et si se sunt entreferus
Que des espiés croissent les fus
Et que il volent en tronchons
Ains ne se murent des archons
Quant Gavains ot la lanche fraite
Vistement a l’espee traite
S’il va ireement requerre
Gavains fait il de ma terre
N’est pas coustume ne usage
S’un chevalier a par outrage
Vers .I. autre bataille emprize
Qu’il le requiere de tel guise
Espee traite desi la
Que l’un des .II. keus sera
Ains s’entressaient a jouster
Et font tant lanches aporter
Et joustent comment qu’il lor griet
Tant que l’un d’aux a tere chiet
Che dient chil de Normendie
Que si bele chevalerie
N’a el siecle com de jouster
Faites des lanches aporter
S’iert plus bele le bataille
Je pri chu vallet qu’il y aille
Qui a ronchin fort et isnel
Vistement arriere au chastel
Si nous aport .I. fais de lanches
Amis fait il car nous avanches
Merveilles t’en sarons boin gré
Et chil y est mout tost alé
Qui mout volentiers s’en travaille
Et veut comment que li plais aille
Desi qu’a nonne delaier
Et il s’alerent ombroier
Chascun d’euz o sa damoisele
Son escu son elme et sa sele
Osta chascun d’euz pour laissier
Rafrechir soi et son destrier
Ainsi la demourerent tant
Que li vallés revint poignant
Qui a .VI. lanches aportees
Grosses et longues et quarrees
Qui mout li ont fait grant rancune
Mais si trés grosse en y ot une
Grosse et quarree de quartier
Qu’il n’avoit si boin chevalier
Si grant ne si fort ne si dur
El roiaume le Roy Artur
Ja tant ne se penast de poindre
Qu’il le depechast pas a joindre
Gavains les lanches esgarda
D’une chose se pourpensa
Dont tout le mont doit prisier
Va fait il a chu chevalier
Si li porte de moie part
Ches .VI. lanches et si esgart
Lesqueles .III. il aime plus
Si m’en aporte le sorplus
Et je veul qu’il en ait le cois
Et chil par de costé le bois
Y va poignant toute une sente
Toutes les lanches li presente
De par Gavain en tel maniere
Que les .III. les renvoit arriere
Et les .III. a soi en retiengne
Il ne veut pas coi qu’il aviengne
Car bien voit qu’il est prés de nonne
Se Dix aventure li donne
Que par armes vaintre le puisse
Que chil nule acoison n’i truise
Ne qu’il die pas que che fust
Pour che que l’onneur en eust
Des lanches ainz veut miex par tant
Que Escanor coisisse avant
Ahi Gavains dist Escanor
Tretous autres si comme l’or
Touz les autres metaus sourmonte
N’est il de nul chevalier conte
Qu’ait boines teches avers vous
Mout par devés estre joious
Qui tant avés honeur et pris
Que nis a vos drois anemis
En couvient bien par forche dire
Je meismes en ai grant ire
De che que onques pourcachai
Cheste bataille que j’en ai
Si ne di je pas pour doutanche
Mais qui destourbe et desavanche
Chevalier si bien entichié
Il en doit estre mout irié
Des lanches les .III. grosses prent
Et les autres au vallet rent
Si li prie forment et dit
Que de soie part le merchit
Gavains de son riche present
Si se ratourt delivrement
Et mont et lache se ventaille
Et si reviengne a se bataille
Grant chose a en faire l’estuet
Car nus d’euz laissier ne le puet
Sans honte quant il l’ont empris
Le vallet si fu mout pensis
Que de Gavain grant paour a
Et Gavain si s’appareilla
Si est seur le cheval monté
Estés les vous amdeuz el pré
Mout furent ambedui vassaus
Ains laissent courre les chevaus
Si se fierent en mi le pis
Des lanches si que les esclis
En volerent et haut et loins
Et les froisserent jusqu’a poins
Puis a chascun .I. autres prize
Si se fierent en tel guise
Que les lanches toutes .II. froissent
Jusqu’a poins esclichent et croissent
Au desrain prist Escanor
Se grant lanche ch’iert son tresor
Et son estui que il ot fait
De li quide il tout a fait
Pour che que valoit autre quatre
Par sa forche Gavain abatre
Et Gavains le sieue reprent
Si laissent courre vistement
L’un d’eux vers l’autre le destrier
Escanor le feri premier
Pour le longueur que se lanche ot
Mais onques froissier ne le pot
Et Gavains se tint si trés bien
C’onques ne canchela de rien
Ains li est volee des poins
En mi le pré se lanche loins
Si qu’el chai seur .I. busson
Gavains le feri abandon
Dessus la boucle de l’escu
Que troé li a et fendu
Si que la lanche depecha
Onques de point ne se garda
Vistement ont lor tour repris
Si s’entrevienent vis a vis
Quant chascuns ot sakié s’espee
Gavains commenche le mellee
Si le fiert seur son hiaume amont
.I. cop si grant et si parfont
Que Gavains tout s’esmerveilla
Mout par fu dure et mout dura
Le bataille des deux vassaus
Des escus des cors des chevaus
Se sont mainte fois encontrés
Mais il ierent si bien armés
Et li cheval si boin estoient
Que poi meffaire se pooient
A Monseigneur Gavain avint
A une fois que il y vint
Pour lui grever et assalir
Qu’il le feri par tel air
.I. cop si dur et si pesant
Amont seur le hiaume luisant
Si descendi dessus l’escu
Dusqu’en la boucle l’a fendu
Si qu’il n’en pot son branc ravoir
Et chil par forche et par pooir
Se parti tantost de Gavain
Si li est volés de la main
Se Gavains douta le mellee
Quant il ot perdu s’espee
Nus hom ne s’en doit merveillier
Il esperonne son destrier
Par devant Escanor s’avanche
Si saisi vistement la lanche
Qui iert caeue a Escanor
Il ne le rendist pour nul or
Qui est desi en Andioche
Le boin destrier ariere broche
Si retourne comme hardi
Pour requerre son anemi
Endementres qu’il le requiert
Se pourpensa que si le fiert
A che qu’il a mout grant vertu
Sor le hiaume et sor l’escu
Que sa lanche toute froissa
Ou que des poins li volera
Si n’iert ja comment qu’ele chiee
Que durement ne l’en meschiee
Car a enscient set et voit
Se sa lanche perdue avoit
Qu’il ne porroit armes trouver
A deffendre ou a prouver
Dont il peust faire nul bien
Lors se pourpensa d’une rien
Qu’il ne li puet faire nul mal
Si ne fiert par mi le cheval
Lors esperonne le destrier
Et chil qui tint le branc d’achier
L’a mout fierement atendu
Par mi le cheval l’a feru
A encontre par mi le pis
Si que li fers en est salis
Par mi le senestre costé
Lors s’est d’Escanor acosté
Au chair que le cheval fist
Par le bort de l’escu le prist
Si li a du col esrachié
Puis en a son branc hors sachié
Mout fu chil iriés quant le voit
Son cheval mort et lui chaoit
Mout vistement en piés resaut
Gavains dist il de chest assaut
Ne sui je pas ne mors ne pris
Se vous estes de vostre pris
Vers moi durement empirié
O moi serés par tans a pié
Se le branc d’achier ne me faut
Gavains set bien que si l’asaut
A che qu’il est et grant et fort
Ja li ara son cheval mort
Miex le veut il requerre a pié
Car durement seroit irié
S’il veoit mort le gringalet
Poignant s’en vient a son vallet
Tout de son gré est descendu
Son cheval li baille et l’escu
Qu’il ot a Escanor toloit
Puis revient arriere tout droit
El pré la u Escanor l’atent
Et chil plus de demi arpent
Vint encontre les menus saus
La veissiés mout durs assaus
Menuement recommenchier
Et sous les espees d’achier
Fausser mout souvent les haubers
Tout en devient vermeil li fers
Que plus iert blans que une flor
La veissiés mout dur estor
Entre les .II. vassaus ferir
Et sachiés que tout lor desir
Se grieve l’un l’autre et encombre
Le damoisel qui iert en l’ombre
Et les pucheles font grant doel
Lasse fait chascune mon voel
Seroie je orendroit morte
A mervelle se desconforte
Chele qu’Escanor amena
Pour le grant paour que ele a
Chai a le tere passee
Et quant ele fu relevee
Si commencha tel doel a faire
Que nus ne vous saroit retraire
Lasse fait ele maleuree
Si je en estrange contree
Perch si faitierement ichi
Mon soulas mon cuer mon ami
Dont vin jou chi en mal eur
J’ai oy dure ch’est bien seur
Que de fourfait ne vient nul bien
Le tort est mon ami et mien
Car il estoit en son pais
Riche manant et posteis
Et jou de tous bien aaisié
Si fu par fourfait envoyé
Toute seule a le court le roy
Puis vint mes amis aprés moy
Prendre moi veant maint baron
Pour avoir raisnable acoison
De combatre soi a Gavain
Il quidoit bien estre chertain
Se il Gavain vaintre peust
Que en tout le siecle n’eust
Chevalier qui l’osast atendre
Le duel de chele n’est pas mendre
Que Gavain prinst el chimentire
Lasse fait ele ne sai que dire
Se je en tel guise pert chi
Le boin chevalier le hardi
Qui m’a getee de tel paine
Et qui a tel honnor me maine
Ensamble o lui en sa contree
Lasse dolente et esgaree
Remaurrai chi a grant martire
Et le damoisel par grant ire
Ront les chaveus et crie et brait
Onques si grant doel ne fu fait
Pour seul .III. gens comme il demainent
Et les .II. chevaliers se painent
D’aus ochirre ch’est grant damage
Mais Gavains a grant avantage
Pour l’escu qui au col li pent
Et nepourquant bien se deffent
Escanor qui ne doute mie
Par samblant vaillant une aillie
Gavains ireement li vint
De le boine espee qu’il tint
Deseur le checle le feri
Si qu’il li trencha et rompi
Tous les las quierent el pré
Et le hiaume a tere volé
Puis le refiert tout de rechief
Chil se deffent a mout grant grief
Et nepourquant tel cop li donne
Seur le hiaume que tout l’estonne
Et que le cop est descendu
Si durement deseur l’escu
Qu’il li embati dusque el heut
Escanor qui forment se deut
Et qui mais ne sait dont deffendre
Merchi li crie et se veut rendre
Mais Gavains ne le veut recheuvre
Qu’il crient qu’il le veulle decheuvre
Pour che qu’ainsi li meskeoit
Et crient se de lui revenoit
Au dessus qu’il ne l’ocheist
Pour che que sa mere li dist
Que ja ne doutast se li non
Che li a mis en souspechon
Et tant le het de tout son cuer
Qu’il ne le feroit a nul fuer
Qu’il li escapast vif ne sain
Lors le refiert trestout de plain
A descouvert par mi le vis
Que tout par deseure en a pris
Tout le nés et une des faiches
El col en parurent les traches
Dusc’as espaulles l’a fendu
C’a chu cop l’a mort abatu
Lors il vint le vallet courant
Et chele grant joie menant
Que Gavains o lui amena
Et chele grant duel demena
Qu’Escanor avoit amenee
Fors que Gavains l’a confortee
Qui pour li courut esraument
Et mout li prie douchement
Qu’ele l’oublit si se confort
Bele fait il se je l’ai mort
Ne me doit estre a mal retrait
Car che fu tout pour son fourfait
Qu’il vous esmut de sa contree
Pour pourchacier cheste mellee
Or soiés donques toute aperte
Bien vous restorrai cheste perte
Se volés croire men conseil
De nule rien ne me merveil
Se vous avés ire et pesanche
Mais de che soiés a fianche
Que je vous enmenrai o moi
A grant joie a le court le Roi
Si y arés mout grant honnor
A vostre cois arés seignor
Lequel que vous vaurrés eslire
Sire fait ele ne sai que dire
Fait iert vostre quemandement
Quant en vostre merchi me rent
Faites ent tant au chief du tour
Que preu j’aie et vous honnor
Lors s’appareille de l’errer
Le damoisele fait monter
Que Gavains o lui mena
Sor .I. boin paleffroi qu’ele a
Gavains monta seur .I. destrier
Et li vallés qui iert legier
Et qui mout volentiers le fist
Le damoisele Escanor prist
Si le mist deseure son ronchin
Atant se metent au chemin
Lors enmena le damoisel
Herbergier el premier chastel
La orent boin ostel et riche
Car li Sires n’iert mie niche
Qui d’aus grant joie demena
Pour le vallet qu’il amena
S’orent grant joie de Gavain
Le chevalier n’est pas vilain
Qu’il fist au matin atourner
Quant il vit que deurent lever
.I. paleffroi mout richement
Tout fu frés sen achesmement
Li lorain le frain et la sele
S’il donna a la damoisele
Que chil portoit seur le ronchin
Puis se remirent au chemin
Or oirre Gavains mout plus bel
Que li porte le damoisel
Son escu son elme et sa lanche
Gavains qui de l’errer s’avanche
Tant vint et hasta se journee
Qu’il s’aprocha de sa contree
Une gaudine et puis .I. bruel
Puis trespasse tant qu’a Carduel
A .VII. petites lieues vint
Une aventure li avint
Iloec dont ne me doi pas taire
Car il oy crier et braire
Une puchele a grant besoing
Qui iert en la forest si loing
C’a grant paine en oy le cri
Vallet dist il as tu oi
Che que j’oi et chil respont
Et les damoiseles si font
Qu’eles ont grant pieche atendu
Et Gavains lor a respondu
Par foi fait il je ne lairoie
Pour riens el monde que je voie
Que je n’aille la pour savoir
Quel acoison i puet avoir
De plourer qui si se demente
Et je quit bien que cheste sente
Me menra trestout droit a li
Vallet et tu m’atendes chi
Entre ti et ches damoiseles
Tant que je saiche ches nouveles
Pour coi chele est en tel esmai
Et quant je le voir en sarai
Je revenrai ichi tout droit
Et sachiés que ch’iert orendroit
Se autre acoison ne me tient
Biaus amis et se che avient
Que je tele aventure truise
Que tost revenir ne m’en puisse
Tout chu grant chemin t’en iras
Droit a Cardoeil et si diras
A la Royne de par moi
Que ches pucheles li envoi
Et si li di de moie part
Que pour l’amor de moi les gart
Et bel les apiaut et honnourt
Tant que reviengne a le court
Et s’ele demande nouveles
Ne de toi ne des damoiseles
Qui eles sont bien porras dire
Volentiers fait li vallés Sire
Ja de riens ne l’en iert menti
Gavains des esperons feri
Le gringalet chele part droit
Ou la puchele oy avoit
Et quant il ot grant pieche alé
Et il eut .I. tertre avalé
Si a le puchele veue
De le robe qu’ele ot vestue
Qui tant iert avenant et bele
De son lorain et de sa sele
Du paleffroi qui tant iert riche
Si com li contes vous afiche
Qui plus iert blans que une flor
Du frain et de son autre atour
Qui trestout vaurroit deviser
Et bien y saroit aviser
N’a si boin clerc dusc’a Paris
Ja tant y mesist sen avis
Qu’il desist ja pour nule paine
Tout le voir en une semaine
Qu’il n’i trespassast quel que soit
Mesire Gavains mout bien voit
Que nus hom ne li faisoit mal
Il esperonne son cheval
SI est venus tout droit a li
Chil Dix dist il qui ne menti
Bele vous doinst joie et honnor
L’acoison de vostre dolor
Pour quoi vous faites doel si grant
Vous requier et pri et demant
Che me dites s’il ne vous poise
Chele qui iert sage et courtoise
Li respondi mout volentiers
Sire dist ele .I. chevaliers
Biaus et preus et courtois et sages
Qui m’amena en ches boscages
M’amoit par amor et je lui
L’acoison de mon grant anui
Vous conterai geuy matin
Quant nous esrions chu chemin
Entre moi et mon ami chier
Si y oismes .I. doel trop fier
Que une puchele menoit
Ainsi le fist ainsi li ploit
Qu’en chest chemin chi me laissa
Le bai de Guascongne eslaissa
Pour aler s’aventure querre
En cheste pieche de chi de terre
Me dit bien que je l’atendisse
Mais ains que de li me partisse
Me bailla .I. sien esprevier
Qu’il amoit plus et tenoit chier
Que riens en chest siecle vivant
Bien savoie qu’il l’amoit tant
Qu’il ne pooit plus amer rien
Fors seul mon cors che me dist bien
Que seur toute rien li gardaisse
Et je comme chetive et lasse
De grant folie m’entremis
L’esprevier a disner empris
Que d’oisiaus mout petit savoie
Tout ainsi que je le paissoie
D’un oiselet qu’il avoit pris
Li espreviers qui iert soutis
S’esbati si m’est escapés
Mes amis en sera desvés
Quant il venra si sui traie
Par mescheanse et par folie
Jel connois tant a orguellous
A si felon et a estrous
Que jou dout que jammais ne maint
Ne je n’ai qui l’oisel reclaint
Se .I. autres ne s’entremet
Et Gavains li dist et pramet
Que son esprevier li rendra
Ne ja de li ne partira
Desi qu’ele en soit resaisie
Le damoisele l’en merchie
Qui de la promesse a grant joie
Sire fait ele Dix vous en oie
Que l’esprevier puissiés reprendre
Car se vous le me poés rendre
Dont m’avés vous toute garie
Ne ja n’iert mais jour de ma vie
Que de tout men cuer ne vous aim
Bailliez moi fait il le reclaim
S’irai l’esprevier apeler
Mout s’entremet du reclamer
L’oisel qui siet el chaisne haut
Mais che nule riens ne li vaut
Car il n’en fait samblant ne chiere
Il va avant il va arriere
Mais tout ichou ne li vaut rien
Et de che li va auques bien
Que l’esprevier point ne s’eslonge
Qu’il est atachiés par la longe
Quant il voit que riens ne li monte
Mout vistement el chaisne monte
Ne mais que il s’est desarmés
Quant il fu el chaisne montés
Atant es vous le chevalier
Les armes vit et le destrier
Si demande qui eles sont
Au meilleur chevalier du mont
Fait le puchele et au plus prous
Bien le vous os aatir a tous
Fors vous seul que je n’i met pas
Conté li a isnel le pas
Com il l’avoit yleuc trouvee
Seule pensieve et esplouree
Pour le perte de l’esprevier
Lors li respont le chevalier
Putain fait il vous i mentés
N’est pas ainsi l’afaire alés
Mout va autrement le besoigne
Je sai mout bien com chil s’ensoigne
Qui se malvaisté veut couvrir
Me cuidiés vous pour fol tenir
Et menchongne prover a voir
Je puis a enscient savoir
Que mainte fois l’ai esprouvé
Que mout a tost femme trouvé
Chou que doit dire a son besoing
Pour men conte que je aloing
Ne veul lor malvaistié escrire
Assés m’en avés oi dire
En autre lieu si m’en irai
Au chevalier qui sans delai
Prinst son palefroi par le frain
Et le cheval a l’autre main
Que Gavains avoit amené
Puis s’est vers chele trestourné
Si li dist qu’en sa compagnie
N’iert il jammais jour de sa vie
Iloec le laira toute sole
Jammais nel servira de bole
Trop l’en a servi longuement
N’onques mais si apertement
Son barat ne sot ne ne vit
Et Mesire Gavains li dist
Sire dist il ne quidiés mie
Que je pour vostre vilenie
Venisse cha onques n’avint
Onques seulement ne me vint
Encouragé ne en pourpens
Ja n’arrai tant perdu de sens
Que je tel outrage requiere
Or oiés de che ma priere
Que en pregniez mon escondit
Et je vous jurrai sans respit
Quant vous plaira mout volentiers
Moy onzime de chevaliers
C’onques vostre honte ne quis
Ne jou parole ne li dis
Se vous l’aviés toute oye
Dont ele fust par vous haye
Ne dont vous a moy ne a li
S’eussiés mal gré jel vous di
Et li chevaliers li a dit
Ja n’en arai vostre escondit
Mout pris poi vostre serement
Je sai mout bien comment chil ment
Qui de tel barat se ensonne
Atant o les chevaus s’enlonge
Si qu’il ne sorent qu’il devint
Et Mesire Gavains revint
A le damoisele o le cler vis
Quant il ot l’esprevier repris
Si l’a douchement confortee
Or ne soiés pas esfraee
Me damoisele fait ichil
Qui d’autres hommes valoit mil
Pour amor honor et franchise
Car sachiés bien que sans faintise
Arés mon conseil et m’aye
Ne jammais nul jour de ma vie
Ne vous guerpirai jusqu’a tant
Que che soit par vostre creant
Pour aventure qui m’aviengne
Sire fait ele Dix vous maintiengne
Et gart d’autre mesaventure
A vo grant ire et grant dolor
Que pour bien faire et pour honor
Vous est ainsi mesavenu
Car vous n’estiés cha venu
Fors pour moi conforter de m’ire
Bele fait il n’i a que dire
Du desconforter n’i a rien
Une fois mal et l’autre bien
Couvient a prodomme avenir
Ne ja ne li doit avenir
S’il puet autre fois honnor faire
Qu’il se doie pour che retraire
Quant Gavains ot prises ses armes
Qui gesoient desous les carmes
D’eleuc s’en part plus n’i sejourne
O la damoisele s’entourne
Ne set quel part ne en quel terre
Aventure veut aler querre
Si ne set comment ne queles
Mais volentiers les quisist teles
S’il onques faire le peust
Que il la verité seust
Ou li chevaliers est alé
Qui son cheval en a mené
De chou est il en grant pourpens
Lors commencha .I. si lait tens
De noif de pluye et de grelle
Qui tout keoient pelle et melle
Tounoirres et grelles et espars
Qui cheoient de toutes pars
Si qu’il ne set que faire puissent
Ne de quel part plus prés il truisent
Chastel ne bourc ne herbegage
Car seulement .I. hermitage
N’a il en toute le forest
Sire fait ele si vous plaist
Par ou je ving jehuy matin
Je vi orains seur chest chemin
Prés de chi une crois couverte
Et se nous poions sans perte
Desi qu’a le crois parvenir
Nous porriens mout bien garir
A l’ayde du Creator
Bele fait il il n’i a tour
Fors de l’aler delivrement
A le crois vinrent erraument
Si se mucherent ambedui
Mout y souffrirent grant anui
Entre le puchele et Gavain
Car toudis dusc’a l’endemain
Dura chele tourmente ainsi
C’onques d’ileuc nus d’aus n’issi
N’il n’i mengierent ne ne burent
A la nue tere se jurent
N’il n’i orent nule riens plus
Parler ne vous sai du sourplus
S’il y orent autre delit
Mais sachiés vous bien que lor lit
Fu mout dure et mesaiesié
L’oré qui n’iert pas acoisié
Lor fist grant mal et grant contraire
Et Gavains qui ne puet plus faire
A la puchele de soulas
La tint toute nuit en ses bras
Ainsi qu’il vit devers l’oré
Et si tint son escu doré
Derrier son dos pour le tourmente
Qui si le destraint et tourmente
Et si a l’esprevier assis
Qu’il avoit el chaisne repris
Amont seur les las de la crois
Qui estoit mout biax et mout drois
Ainsi furent la toute nuit
Et mout grant paine ambeduit
Souffrirent tant que il fu jour
Par le plaisir au Creator
Si fist biau tans et cler et pur
Et li niés au boin roi Artur
Fu forment iriés et pensis
Mout par se tint a entrepris
De le puchele qui fain a
Ch’est li tiers jours que ne menga
N’il n’en puet prendre nul conroi
Mais le grant paour et l’effroi
Qu’ele a eu du grant orage
Li taut du mengier le courage
Si qu’ele a le fain oubliee
Bele fait il si vous agree
Que vous plaist il que nous fachons
Ja conseil et secours n’arons
Pour demourer chi en chest bois
Sire fait ele a vostre cois
Je ferai tout vostre plaisir
Mais je ne sai lequel coisir
Le sejourner ou l’esmouvoir
Car nous n’avons nul estouvoir
Pour coi nous puissons sejourner
Et grant mal me fera l’esrer
Que je ne sai lequel emprendre
Puchele fait il en l’atendre
Voi ge nostre grant encombrier
Atant es vous .I. chevalier
Qui le chemin venoit vers eus
Le chevalier n’iert mie seus
Qui paroit bien preus et vassal
Faisoit amener .I. cheval
A .I. escuier devant li
Ensamble vinrent ambedui
Entre Gavain et le puchele
Et il wida tantost la sele
Du palefroi des qu’il le vit
A soi meismes pense et dit
Qu’il ont d’ayeue grant mestier
Et se pense que d’aux aidier
Pour che qu’il sanlent boine gent
Seroit mout grant afaitement
Vers aux va plus tost que il puet
Et Mesires Gavains s’esmuet
Et le puchele contre li
Aux lever couvient ambedui
Et chil boinement les salue
Biau Sire de vostre venue
Fait Gavains nous iert grans mestiers
Dites moi fait li chevaliers
S’il vous plaist comment vous errés
Qui vous estes et dont venés
La u vous avés anuit geu
Et s’avés mengié ne beu
Puis qu’entrastes en la forest
Et si me dites si vous plest
Ou vous avés empris chest oirre
Et Gavains li respont en oirre
Si li a ainsi raconté
Com je vous ai ychi conté
Et chil qui bien iert enseigniés
S’est de la mervelle seigniés
C’ainsi lor est mesavenu
Puis que je sui a vous venu
Et vous m’avés conté vostre estre
De miex fait il vous en doit estre
Je vous aiderai se je puis
Mais je vous en demant et priz
Anchois que vous alés .I. don
Que me doingiés en guerredon
Au jour que jou demanderai
Et Gavains dist jel vous dourrai
Volentiers a vostre plaisir
Mais que je le puisse furnir
Et chil li dist ne quidiés mie
Que je faiche tel vilenie
Que je don vous demant pour rien
Que ne puissiés aramir bien
Car che seroit trop grant fourfait
Et Gavains dit dont iert il fait
Quant vous ainsi le demandés
Et chil dist dont me commandés
Tout en travers vostre plaisir
Chil mien cheval poés saisir
A vostre oes car je le vous doins
Bien ai veu vostre besoins
Dont vous estes mout esmaiés
Pour che me plaist que vous l’aiés
Et si veul que cheste puchele
Qui me sanle courtoise et bele
Ait pour son besoing que je voi
De moie part chest palefroi
Ainsi comme il est atournés
Il m’iert mout bien guerredonnés
A mon besoing et en lieu mis
Puis que vous le m’avés pramis
Je ne vous en redout de rien
Et Gavains dist vous dites bien
Je vous en rench .VC. merchis
Ne devés pas estre escondis
Quant si bel don m’avés donné
Qu’il ne vous soit guerrdonné
Se je pooie en lieu venir
Vous y porrés bien avenir
Fait li chevaliers mout par tans
Et je sai bien mien ensiens
Ne remaurra se jel demant
Que je n’aie mon couvenant
Mais je requier s’il ne dessiet
A le puchele qui la siet
Et a vous qui je veul prier
Que me doigniés chel esprevier
Que je voi seur ses las seoir
En entente de miex avoir
Mout me sambleroit le don grant
Savés pour coi jel vous demant
Se je jammais vous revoie
Et l’esprevier o moi avoie
Que par li vous ramembreriés
Que guerredon me deveriés
Pour che le vous ai demandé
Et Gavain a lors quemandé
A le puchele qui li baut
Sire fait chil se Dix me saut
Se je peusse autre conroi
Pour le grant bien que en vous voi
Prendre de vous en nule guise
Ge i eusse paine mise
Mais sachiés bien que je ne puis
Et Gavains dist je ne vous ruis
Nule riens plus que fait m’avés
Et chil li dist vous ne savés
Qui je sui ne ja ne sarés
Desi atant que vous arés
Pooir de mon guerredon rendre
Lors fist sen esquier descendre
Comme sages et bien aprins
Et quant il ot d’aux congié prins
Si est montés seur le ronchin
Arriere trestout son chemin
A par mi le forest tenu
Ainsi comme il estoit venu
Et Gavains prinst le palefroi
La u il avoit riche conroi
Comme de lorain et de sele
Si a montee la puchele
Et il est el cheval montés
Puis s’est pensés de grant bontés
Que li chevaliers li a faites
Par maintes fois les a retraites
Et pourpensees en son cuer
Et si doute que a nul fuer
Che l’en fait auques esmaier
Ne le puisse il a gré paier
Ainsi comme il li est avis
Et le damoisele au cler vis
En est en joie et en souhait
Du secours que Dix li a fait
Car mout estoit desavoiés
Mais ore les a Dix avoiés
De boins chevax bien atournés
Lors s’en sont ensemble tournés
Si oirrent une voie plaine
Si com aventure les maine
En tel guise com je vous di
Oirrent dusqu’aprés miedi
Qu’il n’ont ne mengié ne beu
Lors ont .I. chevalier veu
Armé mout bien et mout a droit
Qui venoit vers eus trestot droit
Li chevaliers lor dit en haut
Biau Sire fait il Dix vous saut
Et vostre bele compagnie
Chevaliers Dix vous beneye
Fait Gavains et vous doinst honor
Ainsi ai erré toute jour
Et il li respont a droiture
Ne sai quel part en aventure
Lors a .I. carbonnier veu
Que il n’a gaires conneu
Venir vers eux le grant chemin
Deus asnes maine et .I. ronchin
Si venoit mout grant aleure
Gavains li demande a droiture
Nouveles se il les savoit
De quel part il trouveroit
Plus prés hostel a herbegier
Sire che dist le charbonnier
Chi prés est la Rouge Chité
Mais ne vous viengne a pensé
Ne pour besoing ne pour destroit
Que vous ailliés ja la endroit
Qu’il y a .I. malvais trespas
Gavains li dit isnel le pas
Biaus amis dist il dites moi
Quel li trespas est et de quoi
Vous m’avés ainsi devisé
Sire le Roi de la chité
Est mout outrecuidiés et fier
Si n’a nul si boin chevalier
Des les pors dusqu’en Alemaigne
Chi devant a une fontaine
Le trouverés ja tout armé
Car ainsi l’a acoustumé
Les .IIII. jours de la semaine
Vient tous jours a chele fontaine
Avoec li une puchele
Onques homme ne vit si bele
De li ne vous sai plus conter
Mais qui bien seust deviser
Tout son atour et sa biauté
Dire peust en verité
C’onques ne fu si bele femme
Car ele est tant et bele et gente
N’ot pas le quart de sa biauté
Et sachiés bien de verité
Quel le puchele iert en grant paine
Car toute nue en le fontaine
Qui mout estoit froide et obscure
Veulle ou non jusc’a la chainture
L’a fait entrer ens encor plus
Si qu’il en pert tout par le desus
Le teste et toute le poitrine
Plus blanche que n’est flor d’espine
Ainsi est ilec toute jour
En le fontaine a le froidour
Ne ja hors de l’iaue n’istra
Devant chou qu’il avesperra
Dont s’en retrait et si remonte
Il est nul si haut roi ne conte
Se il parloit ne poi ne grant
Qu’il ne morust des maintenant
C’a lui le couvenroit combatre
Et sachiés que .I. et quatre
Se sont a li ja combatu
Qu’il a tous ochis et vaincu
Tout decopés et detrenchiés
De chiaus et du pais plus prisiés
Qui fussent en tout le regné
Or sont si tuit espoenté
Et tant en ont veu morir
Qu’il n’en osent mais plait tenir
Quant matés les a et vaincus
Si fait fichier en peus agus
Qu’il a fait fichier en estant
Le chief et le hiaume luisant
Il ne puet estre si prodom
Qu’il ait ja autre raenchon
Que li Rois l’a juré ainsi
Et vous le verrés ja ichi
Se vous alés en la chité
Il ne puet estre trestourné
Que n’ailliés par devant le Roy
Biau Sire prenés bien le conroy
De vostre vie garandir
Se par yloec volés venir
Vous morrés ja en fin sans faille
Je n’en passerés sans bataille
Se en parlés ne tant ne quant
Et Gavains li dist maintenant
Amis trop m’en avés conté
A Dieu soiés vous commandé
Mais itant sachiés bien de voir
Que je irai la pour veoir
Le puchele et le chevalier
Chil qui a fait les peus drechier
Seur le chemin par son orguel
Si li dirai que savoir vel
Si li plaist et vient a talent
Son estre et son contenement
Car mout volentiers le saroie
A chest mot se met a la voie
Si se parti du carbonier
Tant esperonne le destrier
Qu’il ot passee le montagne
Lors a veue la fontaine
Qui sist mout prés de le chité
Et vit le chevalier armé
Sor .I. destrier fort et hardis
Onques en trestout le pais
N’en ot .I. si trés bel veu
Et sachiés bien que son escu
Sanloit estre de cuir tané
Mais tant fu fort et bien ouvré
Que mout vous seroit fort a dire
Car n’est pas legier a descrire
S’armeure qui tant est riche
Si com li contes nous afiche
Il n’i ot seur le point de blanc
Ains iert plus rouge que nul sanc
Lanche roide grosse et quarree
El fer devant bien acheree
Espee fourbie et trenchant
De coulor rouge flamboiant
Et fu es estriers affichiés
Es vous Gavains tout eslaissiés
Si salue le damoisele
Qui estoit a mervelle bele
Puis li dist Monseigneur Gavain
Qui de grant franchise fu plain
Sire fait il pour quel meffait
Faites a ma dame si lait
Et si vielment le demenés
Vassal se savoir le volés
Dites liquele le vous die
Et vous ferés grant courtoisie
Se vous l’en poés geter hors
Mais vostre vie et vostre cors
Y couvient remanoir en gages
Dist Gavains vous dites outrages
Si vous convenroit adrechier
Aler le veul ore prier
Se il li plaist qu’ele me die
Par amor et par courtoisie
Pour quoi et des cant et comment
Il vous fait souffrir chest torment
Chest grant anui et cheste paine
Chele qui iert en la fontaine
Li respont Sire volentiers
Sachiés bien que chis chevaliers
Est Rois de la Rouge Chité
Mais tant est fel et sorquidié
Qu’il ne crient nul homme vivant
L’autre an m’aloie deduiant
Avoec li en .I. vergier
Il dist qu’il n’avoit chevalier
El roiaume le Roi Artur
De chou iert il bien asseur
Qu’il ne conquisist par bataille
Et je li dis sans nule faille
Comme chetive et mal senee
Que on disoit en ma contree
Que chil de le Tavle Roonde
Erent tuit li mellor du monde
Et Mesires me respondi
Damoisele si com je qui
Il n’i a nul meillor de moi
Je di Sire je quit et croi
De mellors en y a assés
Mout est chil fol et sourquidiés
Qui quide estre tout le mellor
Et d’un roiaume et d’une honnor
Il me respondi par afit
Damoisele a mout grant despit
Me tenés ore bien le sai
Et de che mie ne m’esmai
Car chou avons assés veu
Sansons fortin qui tant preu fu
Fu decheus par sa moullier
Femme veut tous jours mix prisier
Autrui que le sien par nature
Vis li est qu’ele a la resture
De trestous chiaus de la contree
Si s’en tient mout a enganee
Et s’il iert le melleur d’un ost
Tant le honniroit ele plus tost
Or sachiés bien de verité
Trop avés le cuer escaufé
Quant vous m’avés si despisié
Si veul qu’i vous soit refroidié
Pour che que vous m’avés blasmé
Jusqu’a tant que aiés trouvé
Qui me puisse d’armes oster
Et par forche vaintre et mater
Ou tout mors ochire en bataille
Iert seur vous prise si grant taille
De le semaine .IIII. jours
Vous ferai entrer voiant tous
En le noire fontaine obscure
Sans point de nule vesteure
Serés ileuc tout en estant
Dusques a soleil esconsant
Loiaument le jur et plevis
Et si mandés a vos amis
Se vous vous i fiés de riens
Car je quit et croi et sai bien
S’aucun venoit par son desroi
Qui vausist desraignier vers moi
C’a tort vous faiche chest anui
Se je vieng au dessus de lui
Chest jugement est tous seus
Que prés de vous en peus agus
En ferai les testes fichier
S’il en y venoit .I. millier
Entre tant que la creature
Qui iert en l’iaue a le froidure
Parloit a Monseigneur Gavain
Li Rois qui n’estoit pas vilain
A le damoisele apelee
Que Gavains avoit amenee
Si li prie qu’ele li die
Par amour et par courtoisie
Qui est chest chevalier armé
Qui tant est fol et sourquidié
Qui est venus par estoutie
Voiant moi parler a m’amie
Mout grant talent ai de savoir
De son estre trestout le voir
Chele respont mout franchement
Sire fait ele se Dix m’ament
Je ne vous sai dire son non
Ne le savés par mon chief non
Comment va dont pour saint Thumas
Chele li conte isnel le pas
Com il l’avoit el bois trouvee
L’aventure li a contee
Onques ne l’en deigna mentir
A Gavain m’estuet revenir
A qui chele de le fontaine
Conte son anui et sa paine
Qu’ele a plus de .III. ans soufferte
Mais plus l’en poise de le perte
Des nobles chevaliers de pris
Qu’il a par bataille conquis
Et quant il les avoit vaincus
Si fait fichier des peus agus
Le teste y met o l’iaume cler
Chi devant en voi .I. ester
Ou il n’a encor riens fichié
Ne mais qu’il y a apoié
Che veés vous bien .I. escu
Il fu au derrain vaincu
Che saichiés bien chertainement
Que li peus vostre teste atent
Il atent qu’ele y soit fichié
Si com le chose est prononchié
Des qu’il iert yleuc ferus
.I. autre pel iert embatus
Delés cheli qui atendra
Tant que .I. autre revenra
Sire or sachiés de verité
Que mon estre vous ai conté
Se vous l’avés bien entendu
Et Gavains li a respondu
Gavains dist damoisele lors
Issiés de le fontaine hors
Par un couvenant que orrés
Que vous jammais n’i enterrés
Tant com je soie sains ne vis
Ele a erraument ses dras pris
Qui ierent prés de le fontaine
Le chevalier a longue alaine
Li escrie mout fierement
Mar veistes chest parlement
De che soiés trestout chertain
Vassal chou li a dit Gavain
Manechiés tant com vous plaira
Je sui chil qui ja ne fuira
Pour vous ne pour vostre manache
Ains serai trouvés en le plache
Tous appareilliés de deffendre
S’est qui estour me veulle rendre
Veés me chi tout apresté
L’un d’eus a l’autre deffié
Si s’alerent entreferir
Tant com cheval les puet ramir
Et fierent par mi les escus
Grans cops des fers trenchans agus
Que les escus perchent et croissent
Les lanches esclichent et froissent
Et si volerent en asteles
Ains l’un d’aus ne se mut des seles
Le Roi de la Rouge Chité
Fu mout dolent et abosmé
Quant voit qu’il ne l’ot abatu
Il trait le boin branc esmolu
Si fiert Gavain ireement
Amont en l’iaume qui resplent
Qu’il li fent jusqu’a capeler
A poi qu’il ne le fist verser
Mais bien se tint qu’il ne chai
Et Gavains ra lui envai
Si l’a si radement feru
Amont au plus haut de l’escu
Que par le boucle l’a copé
Et que du boin auberc saffré
En a mil mailes abatues
Le branc descent au cop qui rue
Par entre l’archon et le Roi
Le feutre et trestout l’aroi
Li trencha tout rouondement
Et le boin destrier ensement
Si que li Rois est trebuchié
Entre les deus tronchons a pié
Mais mout fu tost en piés saliz
N’estoit pas des armes falis
Puis dist vassal par saint Amant
Chest cop ne fu mie d’enfant
Ains ne m’ama ne ne tint chier
Qui seur moi vint tel cop lanchier
Mais quant de moi departirés
Ja mar costre coupe en batrés
Or soiés franc et afaitié
Si descendés o moi a pié
Se ne faites tant vous veul dire
Vostre cheval ferés ochirre
Si ferés mout plus que vilain
Adont se pourpense Gavain
Que de che li dist il bien voir
Qu’il puet a enscient savoir
A che qu’il est trop fort et fier
Ja li ara mort son destrier
Par tant descendi a le tere
Si va son anemi requerre
Mais chil si bien se deffendi
Que Gavains tout s’en esbahi
Qu’il li avoit tel cop donné
Amont seur le hiaume gemé
Qu’il en embati contreval
Fleurs et bericle et esmal
Desseur l’escu le cop descent
L’escu jusqu’a le boucle fent
Et le haubert lés le costé
Est tout trenchié et decopé
Dix fu bien a Gavain garant
Qu’el poing tourna arrier le branc
Si ne li fust el poing tourné
Jusqu’el foye l’eust copé
Chil l’a empaint de tel vertu
C’a poi qu’il ne l’a abatu
Mais Gavains pas ne s’en esmaie
Quanqu’il li doit mout bien li paie
Une envaye li a faite
Seure li keurt l’espee traite
Et chil l’a mout bien requelliz
Mout par fu grans li fereis
Qu’il font seur les hiaumes gemés
Toute le gent de le chitez
Il sont a grant eslais venu
N’i remest jone ne chanu
Homme ne femme droit ne tort
Grant ne petit feble ne fort
Qui aler puisse qu’il n’i voise
En le chité ot mout grant noise
Et grant bruit par toutes les rues
Car les grans gens et les menues
Clers et bourgois et chevaliers
Dames pucheles esquiers
Y keurent tous communaument
Pour veir lor contenement
Le campagne ont avironné
Et li Rois lor a quemandé
Si chier com cascuns a sa vie
Qu’il n’i ait .I. seul qui mot die
Pour riens qu’il oye ne qu’il voie
Car a mes .II. mains l’ochirroie
Ja ne seroit de tel renon
Ne vaurroie que traison
Fust a li faite plus qu’a moi
Et je li jur bien et otroi
Se il se puet de moi deffendre
Ja ne li estuet garde prendre
D’autrui ne soit ja en freour
Grant paour ont de lor seignour
Trestuit li baron du rengné
Le Roy de la Rouge Chité
Si dist a Monseignor Gavain
Com chil qu’il n’estoit pas vilain
Vassal fait il que vous est vis
Contre le gent de mon pais
Qui vienent ver le bataille
Je vous afi et jur sans faille
Ne soiés ja en nul effroi
Que n’avés garde fors de moi
Ychi pour nul meschaement
Tous sui el dessus de ma gent
Qu’il n’i a conte ne baron
Qui pour le barbe du menton
Ne pour le nés ne por le dent
Trespassast mon commandement
Et je vous ai asseuré
Loiaument plevi et juré
Gavains respont vostre merchi
Couvrés vous dont je vous deffi
Et je vous dist le chevalier
Mais Gavains le feri premier
Amont seur l’iaume rougoiant
L’escu li trenche par devant
Si qu’il li trencha les enarmes
Et chil qui mout savoit des armes
En paint son cop de tel vertu
Que l’aubert a tout derompu
Et trenchié par dessus l’aissiele
Que rés a rés de le mamele
Li trencha le char du costé
Laidement fu le Roi navré
Le sanc l’enkeurt a grant randon
Aval dessi qu’a l’esperon
Quant li Rois se senti blechié
A grant merveille fu irié
Mais ne fu pas espoventé
Il tint le boin branc acheré
Ou il se fie durement
En li a pris son hardement
Gavain feri de tel air
Que tout en fait l’escu croissir
Et le branc en fist enbraier
En l’iaume jusqu’au chapeler
Jusc’au tés li achiers n’areste
De l’os li trenche de la teste
Que mout iert trenchans l’alemele
Mais ne toucha en la chervele
Gavains a sentue le plaie
Qui de riens nule ne s’esmaie
Ains le requiert mout vassaument
Et chil mout trés bien se deffent
Bien escremissent ambedui
Chil fiert Gavain et Gavains lui
Et nepourquant tel cop li donne
Seur le hiaume que tout l’estonne
Et chelui a li referu
Que le moitié de son escu
Li trencha tout roondement
Et de l’aubert .C. mailles prent
Si que le branc est descendu
Deseur le brach tout nu a nu
Si l’a navré jusques a l’os
Que le sanc en defile hors
Que tout contreval le braihier
L’en fait le sanc vermeil raier
Mout sont fier andui li vassal
Si se combatent par ingal
Que nus qui le voir en veut dire
N’en seust le meilleur eslire
Li plus preuz ne li plus hardiz
Plus enprenant ne alentis
Fors tant que Monseigneur Gavain
L’assaloit tous jours premerain
Mout sont lor aubert derompu
Et detrenchié sont lor escu
Si que d’entier n’i avoit tant
Qui lor peust estre garant
A descouvert souvent se fierent
Mout s’entreblechent et enpirent
Ainsi dura cheste bataille
De l’eure de tierche sans faille
Dessi a soleil resconsant
Ambedui ierent si vaillant
Que nus ne puet l’autre grever
Ne conquerre en camp ne mater
Nepourquant mout trés bien l’assaut
Gavains com chil a qui ne faut
Proeche forche ne hardement
Et chelui mout bien se deffent
Qu’il ne doute pas par semblant
Une seule frese vaillant
Gavains fu durement irié
Que la bataille a tant duré
Seure li keurt par mout grant ire
Laidement le bleche et empire
Si l’a de tel air feru
Seur le penne de son escu
Si que le cop en vint glachant
Seur le poing ou il tint le branc
Est descendus li achiers frois
Le pauch et .II. autres dois
Li eust copé tot a net
Mais tant vint l’espee a souhet
Qu’il tenoient encore as ners
Du poing li vole en travers
Le boine espee loing de lui
Mout ot grant ire et grant anui
Quant il se vit ainsi blechiés
Par grant ire s’est efforchiés
Et avoit saisie s’espee
Et a sa guiche retournee
Et prent l’espee a l’autre poing
Si com li ensengne besoing
Et keurt vers li plus que les saus
La veissiez mout durs assaus
Menuement recommenchier
Chil fiert Gavain du branc d’achier
Et Gavains a lui referu
C’a poi qu’il ne l’a abatu
Le Roy de son escu se keuvre
Et chil Gavains son cop rekeuvre
Et quida ferir de rekief
A descouvert par mi le kief
Mias chelui tint l’espee traite
Une envaye li a fait
Dont Gavains deut estre grevé
Se Dix ne l’en eust gardé
Amont seur le hiaume d’achier
Qu’il le couvint agenouillier
Puis va Gavains par tel angousse
Fiert son escu qu’il li defroisse
Fiert et refiert tout abandon
Vint cops li donne d’un randon
Le hiaume esquartele touz
Et le ventaille de dessous
Li avoit hors du chief tiree
Le teste li eust copee
Mais chil qui se senti matés
Li dist merchi vaincu m’avés
Puis qu’il ne puet estre autrement
Tenés m’espee je le vous rent
Mais Gavains ne la rechut pas
Ains en a juré saint Thumas
A bien poi que ne vous ochi
Ha ! Gentiex chevalier merchi
Trop grant mesproison feriés
Se vous hui mais m’ochiés
Quant en vostre merchi me rent
Gavains li a dit esraument
Prison vous couvient afier
Et le matin sans demourer
Entre vous et vostre puchele
Qui est franche courtoise et bele
Vous rendrés a le court le Roi
Et si li dites de par moi
Que de vous li fais un present
Et a la Roine ensement
Conterés tout le mellee
Ainsi comme ele est alee
A li et au boin Roy Artur
Et chil respont a beneur
Vostre plaisir en ferai tout
Ja mar en serés en redout
Que je mout volentiers n’i aille
Le verité de le bataille
Si com faite l’avés vers moi
Conterai je mout bien au Roi
Mais vostre non savoir vaurroie
Que dirai je qui m’i envoie
Quant a le court serai venu
Biaus amis j’ai mon non perdu
Je suis le chevalier sans non
N’en sarai plus dit par foi non
Ytant dites en cheste voie
Que chil sans non vous y envoie
Si vous apele et honourt
Tant que je reviengne a le court
Dites bien que je revenrai
Quant je men non trouvé arai
Or me dites le vostre non
Brun sans Pité m’apele on
Rois sui de le Rouge Chité
Vous n’estes de rien sournommé
Fait Gavains che sachiés de voir
Mais une cose poés savoir
Anuit mais serés en repos
Et quant li jours sera esclos
Si ferés metre vostre sele
Entre vous et vostre puchele
Si com vous m’avés couvenant
Et chil li affia errant
Qu’il se rendra en sa prison
Les gens qui furent environ
Chevaliers bourgois vavassor
Mout font grant deul de leur seignor
Qui mout laidement iert navré
Et vont tout droit a le chité
Et Gavains dist qu’il s’en ira
Et que plus ne sejornera
A le damoisele quemande
Qu’il trouva el bois en le lande
Qu’ele mont sor son paleffroi
Par foi chou li a dit le Roi
Je vous pri requier par franchise
Se il puet estre en nule guise
Que vegniés o moi herbegier
Tuit l’en prient li chevalier
Et le courtoise damoisele
Qui mout iert avenans et bele
Mais il lor dit que riens ne monte
Il ne remaurroit pour nul conte
Si les commande tous a Dé
Et eux y ont lui quemandé
Mais li Rois li jure et otroie
Demain se metra a la voie
Sans faire plus de demourer
Gavains ne se veut plus targer
A son droit chemin s’en retrait
Et ot mout grant mestier d’entrait
Pour ses plaies medeciner
Chele ne finoit de plourer
Qui aloit en se compagnie
Il li dist bele douche amie
Ne plourés pas je garrai bien
Une chose sachiés vous bien
Onques mais en tout mon aage
Ne vi hom de tel vasselage
Comme est chestui chevalier
Je ne veul o lui herbegier
Car chou n’iert pas drois ne raison
Trop fessise grant mesprison
Se je me herbegaisse o lui
Car trop li ai fait grant anui
Mais de tant sui je mout irié
Que n’avés beu ne mengiés
Ha ! Biau Sire, je n’ai pas fain
Il n’a el monde si boin pain
Dont je mengaisse orendroit pas
Ainsi s’en vont plus que le pas
Ne sai quel part querre aventure
Mais les a coisi a droiture
.I. chevalier armé et fort
Qui .I. chevalier avoit mort
Yleuc trestout nouvelement
Encore en iert trestouz sanglent
Son branc d’achier cler et fourbi
Qui mout iert fort si com je qui
Si le salue franchement
Mais chelui mie ne li rent
De son salu mais li escrie
Vassal fait il n’en menrés mie
La dame ainsi se Dix me saut
Je vous ferai ja .I. assaut
Que vous comperrés mout trés chier
Dont estuet Gavains courouchier
Puis s’entredeffient et fierent
As fers des lanches se requierent
Andui de toutes lors vertus
Qu’il depiechent tous lor escus
Si s’entrefierent vassaument
Chelui le fiert premierement
Sus en l’iaume par tel air
Que il en fait le fu salir
Et Gavains a lui referu
A descouvert seur son escu
Qu’il l’a fendu dusques au foie
Le destrier saut et va se voie
Au travers par mi le forest
A Gavain merveille desplest
Car ne se sot pas conseillier
Qu’il ne veut pas seule laissier
Pour nul besoing le damoisele
Le destrier traine la sele
Fuiant s’en va mout effraés
Et Gavains s’en est retournés
Que le puchele n’ait paour
Chele nuit dessi qu’a grant jour
Ont trestous deuz el bos geu
Et quant il ont le jour veu
S’en sont d’ilec andui tourné
Pour son escu qui fu usé
Qui ne li puet avoir mestier
A pris l’escu au chevalier
Puis montent andui si s’en vont
Trestoute jour chevauchié ont
Dusques bien prés de miedi
Et sachiés que il iert tierz di
Qu’il n’orent mengié ne beu
Lors ont .I. chevalier veu
Anchois qu’il li laissast plus dire
Dites moi fait il biaus dous Sire
Vostre non s’a plaisir vous vient
Si vous plaist savoir me couvient
Qui vous estes et dont venés
Vous me sanlés gens esgarés
Et qu’en chest bos aiés geu
Mout y avés anui eu
S’il est ainsi mauvais ostel
N’i eustes ne pain ne sel
Ne vin ne char ne autre rien
Je m’en sui apercheus bien
Qui vous peust mestier avoir
Se vous eussiés tout l’avoir
C’onques eut le riche soudain
N’eussiés vous por tout .I. pain
Ne un tout seul hanap de vin
Vous estes fait Gavains devin
Ainsi nous est il avenu
Et chil qui iert a eux venu
Li dist frans chevaliers iteus
Ne fu pas ersoir mes hosteus
Ains me vaut bien c’une puchele
Le plus courtoise et le plus bele
Qui soit dusques au port de Romme
Et si fu fille au plus haut homme
Tant qu’ele est dame de chastel
Me fist ersoir tout le plus bel
C’onques nul chevalier eust
Que riens nul qui me pleust
Ne me fu desdit ne veé
Mout fustes dont miex hostelé
A fait Gavains que je ne fui
Ne menjasmes ne ier ne hui
Entre moi et cheste puchele
Qui vausist pas une genele
De riens que on peust mengier
Biau Sire fait le chevalier
Je vous promet bien et otroi
Qu’anchois que vous partés de moi
Ja mar en serés esmaiés
Serés vous mout bien avoiés
D’avoir ostel et bel et cointe
Je veul mout estre vostre acointe
Et en vostre commandement
Mais or oyés premierement
Anchois que plus aiés du mien
Comment je ving primes a bien
Biaus douz Sire il avint jadis
Bien a passé .V. ans ou .VI.
Quant j’estoie encor joulinchel
Aprentis d’armes et nouvel
Que jou amai une puchele
Le plus courtoise et le plus bele
Qui soit desi en Carlion
Hardi me fist comme lion
Amours qui en ses las me mist
Courtoisie enprenant me fist
Tant que je le requis d’amor
Pensis li moustrai me clamor
Au plus sagement que je poi
Ele prisa mes dis mout moi
Et si tint en mout grant despit
Pour quant si m’en prinst un respit
Et dist que se pourpenseroit
Et quant ele me revenroit
Si me respondroit son plaisir
Je ne vauch pas longues souffrir
Ains le reving veoir par tans
Si li priai que du pourpans
Et du respons qu’ele me dut faire
Comme courtoise et deboinaire
Me respondi sa volenté
Quant je me fui mout dementé
Et ma mesestanche contee
Ele ne fu pas esgaree
De respondre raisnablement
Ains me prova mout vistement
A boins et a loiax ses dis
Ains ne furent par moi desdis
Car je vi bien que ch’ert raison
Et ne queroit fors acoison
Par coi je m’en fusse tournés
Amis dist ele se vous m’amés
Et vostre parole est chertaine
Que pour mi soiés en tel paine
Com vous m’avés chi aconté
Dont sai je bien de verité
Que vous ne volés pas me honte
Il n’a fil a si riche conte
En Gales ne en Angletere
Qui m’osast prier ne requerre
Que je l’amaisse en tel maniere
Que jou feisse sa priere
Ne qui eust par son pourcas
De moi ne joie ne soulas
Nis seulement .I. seul baisier
Devant che qui fust chevalier
Et se vous el me queriés
Dont sai je bien que vous iriés
Vers ma honte apertement
Mais je vous di seurement
Que se vous estes chevalier
Et je vous oi d’armes prisier
Si que li pueples bien en die
Que je devenrai vostre amie
Ja mar en douterés de rien
Je vous en asseurrai bien
Anchois que vous partés de moi
Par chest anelet de men doi
A cheste esmeraude fine
Vous fais de m’amor le saisine
En tel guise com je devis
Et si vous biaus dous amis
Quant je vous fais tel couvenant
Que vous ne me cachiés avant
Que sachiés que par le sourplus
Perdriés le mains et le plus
Mout fui liés quant je tant en oi
De li prins che que prendre poi
Car l’anel du doit li sachai
Par n’anel l’amour atachai
Et par le don qu’ele m’en fist
Et le damoisele me dist
Mout douchement au departir
Que se je voloie goir
De li ne de sa druerie
Que d’orguel et de vilenie
Me gardaisse de tout mal fait
Et jou dis qu’il seroit bien fait
Puis qu’ele l’avoit quemandé
Et quant j’oi congié demandé
Si m’en alai en mon pais
Par men pere et par mes amis
S’oi armes dedens le quinzaine
Et saichiés que je mis grant paine
A pourcachier pris et honor
Tant fis que toute gent d’onnor
Tout li jone et li canu
Dirent qu’il n’avoient veu
Onques mais a nul chevalier
En tant de terme pourcachier
Si grant pris comme je oi fait
Je ne vous puis pas chascun fait
Ne chascune oevre reconter
Mais bien vous os dire et conter
Que j’en souffri mout grant ahan
Et quant il vint au chief de l’an
Si reving a me damoisele
Si li ramembrai le querele
Et le couvant qu’ele me fist
Et me damoisele me dist
Que je avoie trop entrepris
N’estoie pas de si grant pris
De tel los ne de tel bonté
Que jou deusse estre monté
A avoir le sitost conquise
Et se je oi grant paine mise
Le premier an a querre pris
Saichiés de voir que jou ai mis
En l’an aprés tel quatre tans
Quant che vint au chief de deuz ans
Si reving a me dame arriere
Si li ramenbrai ma priere
Et le couvant qu’ele me fist
Et le damoisele me dist
Que je queroie grant fourfait
N’avoie pas d’armes tant fait
Qu’encor le deusse requerre
Le tiers an alai mon pris querre
Si que tout mon pooir i mis
N’onques n’oy de nul pais
Parler ne de nule contree
Ou il eust nule assamblee
De guerre ne a tournoier
Ou je ne fusse le premier
Pour chou que g’i peusse ataindre
N’onques nul jour ne me soi faindre
D’estre courtois et amiable
Que vous feroie longue favle
Tant fui dedens chel an prisiés
Si courtois et si envoisiés
Si biaus et si preus et si gens
Et tant amés de toutes gens
El pais ou iere conneu
Encor il est mout bien seu
Que le parole estoit trop grant
Si fais que vilain qui m’en vant
Mais pour le voir que vous cont
De chief en chief le vous recont
Si com l’aventure m’avint
Et quant au chief des .III. ans vint
Si reving ariere a m’amie
Si li dis de se druerie
M’avoit saisi par .I. anel
Si n’estoit pas seant ne bel
Que plus le me contretenist
Et le damoisele me dist
Que je disoie bien raison
N’i avoit fors une acoison
Que bien ne le deusse avoir
Qu’a enscient pooit savoir
Tout le monde m’a bien dit
N’i avoit mais nul contredit
Que d’armes si grant pris n’eusse
Que par droit avoir le deusse
Mais encore y eut .I. ensonne
Puis me dist che vous en eslonge
C’une chose vous nuist vers moi
Le tricherie que jou voi
Par tout le monde communal
Car tant sont trestuit desloial
Que chascun qui a chief entrait
Et de s’amie ses boins fait
Je n’en voi loial .I. tout seul
Que des qu’il a de li saoul
Que tantost autre ne requiere
Puis me dist qu’en itel maniere
Ne me voloit ele amer
En travers me voloit clamer
A estre siens s’ele estoit moie
Ja de lui saisine n’aroit
Desi qu’ele en fust bien seure
Et je respondi a droiture
Que mar s’en douteroit de rien
Je l’en asseuroie bien
Par serement ou par fianche
Ele dist que par tel seuranche
N’en seroit ele ja seur
Le neveu au boin roi Artur
Gavain le preu et l’enseignié
Qui tant iert amé et prisié
Voloit qu’en plege li livraisse
Oés qu’ele fu fole et lasse
Et dolente et maleuree
Car par trestoute le contree
Yert ja seu qu’il iert ochis
Et je de maintenant li dis
Que dire pas ne li voloie
Sa mort que pas nel connissoie
Si ne soi s’il me plegeroit
Que de riens ne me connissoit
Quant Gavains oi ches nouveles
Del vallet et des damoiseles
Li resouvint donques a primes
Non fais je fait il je meismes
Que en plege le vous demant
Quoi que jou faiche en avant
Ne le connois fors d’oir dire
Mais a tout le mont l’oi eslire
Que ch’est tout li miex entichiés
Li plus loiaus li miex prisiés
Le plus preu le plus amiavle
Qui soit de la Roonde Table
Et quant il est loiaus et preus
Et je l’o afichier de tous
Ne nus hom ne puet contrdire
Nis chil qui seur li ont envie
Ne s’osent de che entremetre
Bien m’os dont en son plege metre
Si vous ainsi me le jurés
Car se vous ne l’en delivrés
Bien sai qui s’en deliverra
Car vostre cors m’en liverra
Si vous ataint veulliez ou non
Car il est de si grant renon
Si courtois et si bien apris
 Se vous aviés vers moi mespris
Ne entrepris de nule rien
Tant est loiaus que jou sai bien
Se par vous en plege l’avoie
Et jou meismeS a la voie
D’aler ent a le court semondre
Qui me venroit chaiens respondre
Et comme pleges contenir
Et se il vous pooit tenir
Par forche tant vous destraindroit
C’amender le vous couvenroit
En sa loiauté tant me fi
Que jel rechevrai bien de chi
Je n’en kier ja aler avant
Et je li dis je vous creant
Que bien savoie qu’il iert mort
Ainsi fusmes a .I. acort
Entre moi et ma damoisele
Or fu ma parole plus bele
Quant ele ot fait tel couvenant
Que vous iroie je contant
Ersoir premierement avint
Que ma besoigne a droit point vint
Et que je jui ensamble o lui
Et Gavains lors li respondi
Dites moi dont ou vous alés
Savoir veul quant vous tant valés
Et vous avés si bele amie
Pour coi si tost l’avés guerpie
Et chil dist je vous dirai bien
Veoir vois le plus bele rien
Qui soit de chi jusques a Tours
Lonc tans l’ai priee d’amours
Si m’en doit hui chest jour respondre
Bien vous devroit or drois confondre
Fait Gavains si di je que je faus
Car laidement avés or saus
A le puchele son serviche
Vous l’avés nouvelment conquise
Et si l’avés .III. ans priee
Et ch’est le premiere fiee
Que en avés eu vos boins
Si devés estre trestous sains
Par le couvent que li feistes
Si qu’a vostre dit li meistes
En plege le boin chevalier
Or alés .I. autre prier
Chi ne voi je nule raison
Car nous n’avés nule acoison
Pour coi en hair le doiés
Pour Dieu vous pri que vous soiés
Vers le damoisele loiaus
Chil qui sont tricheur et faus
Vers cheles qui ne lor meffont
Fussent trestout merkié el front
Pleust a Dieu le tout poissant
Car il en a par le mont tant
Qui font as loiax grant contraire
Et chil dist c’avés vous a faire
De moi ne de ma damoisele
Chele est tant avenans et bele
Si cointe et si noble et si sage
Et si est de si haut lignage
Qui me doit faire mon respons
Que trestous les plus haus barons
Qui soient desi qu’en la mer
Metroient paine en lui amer
Et l’autre m’a tant traveillié
Tant en ai pensé et veillié
Si m’a rendu mon guerredon
Et si m’a de s’amor fait don
Or saichiés bien l’ai deservie
Cat tant l’ai amee et servie
Et tant ai a che entendu
Qu’ele n’aroit mie rendu
De mon serviche la moitié
Et quant j’en ai tant esploitié
Que je qui ai en paine esté
Or ai sor lui le poosté
De faire li courouch avoir
Li veul ainsi faire savoir
La nuit que j’ai pour li souffert
Tel merite a qui ainsi sert
Et Gavains dist gentil franc homme
Pour tous les sains c’on prie a Romme
N’entreprenés ja vers lui tant
Ains li tenés son couvenant
Si ferés bien et que courtois
Il n’a sous chiel si riche Rois
Se il avoit vers li tant fait
Que che ne fust trop grant meffait
Si la deguerpissoit ainsi
Et li chevaliers respondi
De noient vous oi entremetre
Et je ne vous veul rien prometre
Que trés bien tenir ne vous veulle
Il me plaist bien que qu’ele s’en deulle
Quant ele m’a si grant anui fait
Que chou est la somme du plait
Je n’en feroie riens pour vous
Et Gavains dist che est l’estrous
J’aimme tant Monseigneur Gavain
Que je feroie que vilain
Se je souffroie qu’il eust
Repreuche la ou mon cors fust
Ne se il a mort ou a vie
Estoit restés de vilenie
Quant vous pour raison ne pour bien
N’en volés faire nule rien
Ne pour moi qui tant vous en pri
Une chose de voir vous di
Quant vous volés tant entreprendre
Qui vous couvient de moi deffendre
Et chil respont or sui tost pris
Mout m’avés de legier conquis
Qui quidiés que je riens en fache
Pour vous ne por vostre manache
Que vous en diroie je plus
Lors se traient .I. poi ensus
Si l’acesmerent les vassaus
Si laissent courre les chevaus
Si se fierent par tel angousse
Que l’un et l’autre lanche froisse
Mais quant l’uns dut l’autre encontrer
Si s’entrehurtent au hurter
Car il vinrent si radement
Se li contes ne nous en ment
Qui se sont si entreferus
Des chevaus des cors et d’escus
Que euz et les chevax kerrent
Et les chevaliers sus salirent
Tantost com Gavains sus sali
Radement et bien assali
Le chevalier l’espee traite
Tel envaye li a faite
Que chil en est mout esmaiés
Nepourquant bien li a paiés
De tous ses cous les guerredons
Nes a pas recheus en dons
Ains li a bien guerredonnés
Car tes .VII. vins li a donnés
Dont uns autres mout s’esmaiast
Qui en tel guise li paiast
Nepourquant Mesire Gavain
L’outra d’armes au derrain
Si que il ne se pot deffendre
Mais quant il vaut s’espee rendre
Mesire Gavains li dist lors
Que ja s’espee ne son cors
Ne rechevroit en tel maniere
Qu’il ne vaut onques sa priere
Orains por nule riens oir
Et s’il a talent de joir
Ne de son cors ne de son or
Tenir li couvenra l’amor
Qu’a la damoisele a pramise
Et si li dist qu’en itel guise
Comme il dit quant la venroit
Et qu’en sa prison le tenroit
L’en feroit il le seurté
Et chil qui iert d’armes outré
Respondi volentiers biau Sire
Dont vous couvient vostre non dire
Fait Gavains que savoir le veul
Pour conter chest oevre a Carduel
Et chil dist j’ai non Espinogre
En tout le Roiaume de Logre
Ne quidoie je pas trouver
Qui me peust d’armes outrer
Et si est de ainch mon sournon
Or me dites le vostre non
Et de quel tere estes venu
Car s’il m’est ainsi avenu
Que hom qui ne soit de grant pris
M’ait a armes vaincu et pris
Pour coi m’amie dire l’oie
Jammais a nul jour n’aurai joie
Et si m’est ainsi encontré
Que mieudre de moi m’ait outré
Menre en iert men courous et m’ire
Je ne vous puis le mien non dire
Fait Gavains quar je l’ai perdu
Et si ne sai qui le m’a tolu
Or le me couvient aler querre
Mais ne sai quel part n’en quel terre
Si vous couvient o moi venir
Se vous vous volés contenir
A mon plaisir et a mon gré
Et chil respont je le vous gré
Et g’irai mout trés volentiers
Comme chil qui est vostre entiers
Et que par droit avés conquis
Quant nous l’arons fait Gavains quis
Et nous .II. arons tant ovré
Que nous arons mon non trouvé
Je ne vous dirai isnel le pas
Et sachiés bien ne doutés pas
Je vous met bien en couvenant
Que je vous menrai entretant
Se je puis bele compagnie
Onques en toute vostre vie
Chevalier tant ne se pena
Plus bele ne le vous mena
Li chevaliers sans contredit
Tout ainsi com Gavains l’ot dit
A le parole creantee
Et Gavains rechut lors s’espee
Par le convenant qu’il ont fait
Qu’il doit adrechier le meffait
Si com li contes est contés
Lors sont sor les chevax montés
Qui la estoient estraiers
Puis le mena li chevaliers
Au chastel dont il iert partis
Trestout et lor fais et lor dis
Et la damoisele conterent
En quel guise il s’entrencontrerent
Comme il son conte il conta
Et com li estris tant monta
Qu’en la forest s’en combatirent
Et comment il s’entrabatirent
Comment la concorde fu faite
En itel guise l’en a faite
Gavains qui fist sans demourer
Ileuc au chevalier jurer
Que jammais en toute sa vie
Par amours ne par druerie
N’amera femme se li non
Lors veut chele savoir son non
Mais chu li dist che ne puet estre
Car il set ja tant de son estre
Qu’il ne puet a nule riens dire
Et chele li dist biau dous Sire
Vous qui n’avés pas vostre non
Bien sai que vous estes prodom
Et or ne m’estuet pas douter
S’alee me fust clamer
A Gavain le boin chevalier
Que mout ne fust mon droit plenier
Quant onques parler n’en oi
N’onques mais amis ne joi
De nule amour fors de la moie
Ne mais qu’il iert entrés en voie
D’aler .I. autre pourcachier
Or le m’a chi chest chevalier
Par la soie amor ramené
Tant l’a a armes demené
Qu’il m’a chaiens son cors rendu
Et mout trés chier li a vendu
Le fol pensé qu’il ot empris
Mout par est Gavains de haut pris
Si doit a Dieu merchis et grés
Que tant est prisiés et amés
Quant le puchele ot che veu
Que a tere sont descendu
Les paleffrois fist as vallés mout entendre
A euz honnerer et servir
Grant paine mist a deservir
Le bonté Gavains li fist
Qui en aventure se mist
Pour faire li son dru ravoir
Le chastel l’ostel et l’avoir
Li a tout mis en abandon
Si li prie par guerredon
Qu’il en faiche comme du sien
Mout orent ostel bel et bien
Et moutfurent la nuit a aise
Car quanqu’il quide qui lor plaise
Fu fait c’onques n’i ot ensonne
Mais pour mon conte qui n’alongne
Ne veul aconter tous les més
De beles chars de pissons frés
De venison et puis d’oisiaus
Dont li serviches fu mout biaus
De vin de diverse maniere
Mais plus valut le bele chiere
Que la damoisele lor fist
Qui le sien abandon lor mist
Qu’a lor volenté empresissent
Que .XIIII. més ne fesissent
Que vous yroie je contant
Le damoisele lor fist tant
Comme ele pot bien et honnor
Et l’endemain quant il fu jor
Li doi chevalier se leverent
Delivrement et bien s’armerent
Puis se sont a lor voie mis
Et la damoisele au cler vis
Chele qui iert o eux venue
A o eux la voie tenue
Et lor hoste a Dieu commanderent
Arriere en la forest entrerent
Par ou il vinrent chele part
Et se fortune nes depart
Jammais nul jour ne fineront
Si comme il dient ains iront
Amont et aval par la tere
Ou qu’il set le gringalet querre
Et quant il l’aront si bien quis
Qu’il l’aront par armes conquis
S’iront querre les damoiseles
Cheles qui dirent les nouveles
A Gavain qu’il estoit ochis
Si ont devisé et enquis
C’aprés querront chix qui a tort
Se sont vanté que il ont mort
Et quant il trouvé les aront
Par armes lor contrediront
C’onques ne rechut mort par eux
Et si se combatront a eux
Et puis au tierch s’il est trouvés
Quant il les en ara provés
Si dist Gavains che qui querra
Gavain et bien le trouvera
Car bien set qu’il est devenus
Quant el bois furent revenus
Devisent lor oirre et lor oevre
Es vous qui du bois se descuevre
Unz chevaliers en une lande
Des Espagne jusqu’en Irlande
N’en ot .I. si bien atournés
Rade et isnel et sejournés
Iert le cheval ou il seoit
Li chevaliers pas ne veoit
Les deuz chevaliers qui venoient
A merveilles li avenoient
Toutes les armes qu’il portoit
Cauches de fer cauchiés oit
Plus trés blanches que nus argens
Et il iert bel et grans et gens
Et bien paroit delivres et preus
Et sachiés que il ot desous
Son aubert .I. pourpoint vestu
Son haubert iert saffré menu
Si ne pooit riens desmaillier
Si iert tenu a plus legier
De tous chiex qui veu l’avoient
Que ses cauches de fer n’estoient
Mout iert fort et legier et cler
Et si avoit cote a armer
D’un paile de Contenstinoble
Et la chainture iert cointe et noble
Qu’il ot dessus la cote chainte
Car ne s’iert pas s’amie fainte
Qui envoyé li avoit
A faire les oevres adroit
Anuit seroit se je voloie
Deviser tout de chief en chief
Sor le hiaume qu’il ot el chief
Sor le chercle de la visiere
Sor le hiaume ot une baniere
De ses armes mout bien taillié
Que s’amie li ot baillié
Et donnee par druerie
Son cheval iert de Lombardie
Fort et hardi et tost alant
Et sachiés qu’il ot en talant
S’il puet ses anemis trouver
Que il vaurra ja esprouver
Et veir son grant vasselage
Lors li fist son riche courage
Qui a bien li faisoit entendre
L’escu par les enarmes prendre
Si mist se lanche sous s’aissele
Si s’afiche dedens sa sele
Puis a son cheval pourfichié
Et sachiés qu’il ot atachié
Son col d’un riche fremail d’or
Et si avoit pendu .I. cor
A son col dedens son escu
L’escu de geules couvert fu
A .I. lion pendant d’ermine
A sa grosse lanche fraissine
Avoit .I. gonfanon pendant
Si ot chaint le plus riche branc
De tout le Roiaume de Logre
Entre Gavain et Espinogre
Mout boinement esgardé l’ont
Le chevalier dont je vous cont
Venoit grant joie demenant
Et .I. sonnet d’amors cantant
Qu’il avoit nouvelment apris
Lors a par les enarmes pris
Son escu et sa lanche ensamble
En mi le camp si com me semble
A tout geté par mautalent
Et saichiés qu’il ne fu pas lent
De commenchier .I. doel a faire
Comme de crier et de braire
Et de ferir ses poins ensemble
Si qu’a chix qui l’esgarde samble
Qu’il ait grant talent d’estre mort
Sans chou qu’il eust nul confort
C’omme ne femme li feist
Son escu et sa lanche prist
Si est estrains et afichiés
Si a son cheval pourfichié
Mout radement a longue alaine
Se canchon arrier recommenche
Dont il avoit .II. vers chantés
Est chis chevaliers enchantés
Fait Gavains qui si se contient
Et chil la lanche que il tient
Et l’escu regete a le tere
Alas fait it tant je vois querre
Chest aventure a grant meschief
Sen deul commenche derechief
Si fors que nus hum qui veist
Ne fust qui pitié n’en preist
Quant il l’ot longuement mené
A guise d’omme forsené
Tout derechief a pris ses armes
L’escu saisi par les enarmes
S’ira son cheval eslaissié
Et le sonnet qu’il ot laissié
Lors recommencha a chanter
Bien me puis fait Gavains vanter
Que veu ai mainte aventure
N’onques mais en cheste mesure
Ne vi chevalier contenir
Je ne me porroie tenir
Que je n’aille a li por enquerre
Dont il vient et que il va querre
Vers li poinrent par mi le lande
Mesire Gavains li demande
Mais il l’ot salué anchois
Com chil qui iert sage et courtois
Que il li die si li plaist
Dont chele joie et chu deul naist
Qu’il li voit ensamble mener
Car il se porroit bien pener
De querre tant com tere dure
Ains qu’il trouvast tele aventure
Et pour chou li demande et prie
Que l’acoison du duel li die
Et de la joie qu’il demaine
Sire fait il pour nule paine
Qui chi me vaurroit aconter
N’i porroie je demourer
N’a vous longuement chi estre
Que dit vous eusse mon estre
Dont je vieng ne quel part je vois
Car a .I. gué dehors chu bois
Qui est plus de .V. lieues loing
M’estuet ja estre a grant besoing
Mais itant de voir vous en di
Que se je n’i sui ains midi
Que jou arai le tout perdu
Si veul mou miex estre feru
De .II. espiés par mi le cors
Et Gavains li respondi lors
Sire dist il si vous plaisoit
Je sui chil qui o vous iroit
Chele part ou vous iriez
Tant que devisé m’ariés
Et vostre doel et vostre joie
Mout ai grant talent que jou l’oie
Pour savoir cheste grant merveille
Et chil de dire s’apareille
Tout en alant oiés le conte
Si com li chevaliers li conte
Sire dist il jadis avint
Qu’en l’ostel d’un riche homme vint
.I. mien seignor a qui jou iere
Mout nous i fist on bele chiere
Et mout eusmes bel hostel
Je n’oi ainques puis autre tel
Che sachiés vous seurement
Et se je de riens vous en ment
Si soie je honnis anqui
Si vous di je bien que je sui
Qui a vous m’en avou si fort
En grant aventure de mort
Mout fist li Sires grant honnor
Et grant feste de Monseignor
Et de chix qui vinrent o lui
Quant vint au mengier assis fui
Que de seignor acointe estoie
O sa fille se cointoie
Qui iert sage et bien achesmee
N’avoit si sage en la contree
J’estoie chevalier nouvel
Tant parlai seaument et bel
Et tant fu ma parole bele
Et plaisans a la damoisele
Qui de grant biauté iert garnie
Que me donna sa druerie
Je la plevi et ele moi
Que tous jours mais par boine foi
Sans barat de fausse traine
Durast nostre amour enterine
Et qu’ele n’amoit se moi non
Et je li fis autretel don
Que je riens fors li n’ameroie
A ensient jurer porroie
Qu’encore dure l’amor ainsi
C’onques nus de nous n’en issi
Ne ne faussa de couvenant
En tel sens dura l’amor tant
Que une fois nous mesavint
Je ne sai comment chou avint
Comment che fu ne dont che mut
Fors que sa mere s’aperchut
Et qu’ele seut qu’ele m’amoit
A grant merveille li desploit
Si l’a gardee pour moi
Que ne pot puis prendre conroi
Que je peusse parler a li
Si a bien .II. anz et demi
Qu’ele est pour moi ainsi gardee
Or l’a requise et demandee
.I. riche home de chest pais
Par le conseil de ses amis
Et par le pourcas d’un sien frere
Li a creantee son pere
Si l’en doit mener hui chest jour
Et chele en a si grant dolour
C’a poi qu’ele n’est mort d’ire
Mais ele n’ose contredire
Car ses peres l’a commandé
Si m’a priveement mandé
Qu’ele en iert hui chest jour menee
La joie que j’ai demenee
Que veistes premierement
Je vous di bien seurement
Que chou est pour chou que je sai
Que je orendroit le venrai
Et le duel que je fai aprés
Je le fais por chou que jammés
Ne le venrai s’en ai tel duel
C’orendroit morroie mon veul
Sans veir la veul estre mort
Et aprés si me reconfort
Pour seul itant que je bien sai
Que ja orendroit le ferrai
Si trés bien par devant les euz
Que nus ne porroit faire mieuz
Que quant je verrai ja lor gent
Je ferrai si trés durement
Et tant serai preuz et seur
Que nus fors seul le Roi Artur
Que je n’i met pas ne Gavain
Je di que fol et que vilain
Qui m’en vaut mais tant vous en di
Que tant serai preuz et hardi
Que nul chevalier fors ches deus
Qui atant fust asamblé seuz
Ne feroit si bien pour ses euz
Que je ne faiche encore mieuz
Si grant duel ai qu’ainsi l’enmaine
Que nus ne porroit le grant paine
Ne le fais d’armes endurer
Tant comme je porrai durer
Que je soufferrai pour lui ja
Si me plaist trop qu’ele verra
Quar nus hom qui le devroit prendre
Ne porroit s’il n’amoit enprendre
Le fais d’armes que chil emprent
Quant amours le tient et esprent
L’autre duel que je fais emprés
Se je le fais je n’en puis mais
Car j’ai .I. si grant fais empris
Car chevaliers a de grant pris
Avoec le chevalier bien vint
Che me dist chil qui a moi vint
Et qui l’ovre me reconta
Si me dit que chil qui l’escouta
A l’issir ains que partist d’euz
Si sai de voir quant je suis seuz
Et j’ai empris si grant outrage
Que je pourcas mon grant damage
Encor me dist cheli messages
Qui mout estoit courtois et sages
Qu’il vit les .XX. trés bien armés
Or oiés se vous nel savés
Pour coi sont armé si trés bien
C’on ne peut cheler nul rien
Ains est auques l’ovre seue
Que la damoisele est ma drue
Et que je l’ai par druerie
Si doute ma grant estoutie
Pour che qui sevent que je l’aim
Et pour le droit que je y claim
Si doutent qu’il ne garde l’ore
Qu’a .I. mal pas leur core sore
Bien en peussent estre en doute
Se j’eusse une boine route
Car tantost comme la veisse
Si trés grant calenge y meisse
Que bien parust qu’ele fust moie
Et ja soit chou que je seul soie
Si vous di je comment qu’il choie
Que ele iert mout bien calengie
Si sai je bien comment que die
Que je ne soufferroie mie
Ne onques nu fu chevalier
Neis Rollant neis Olivier
Qui peust souffrir tel estor
Que il ne fust au chief du tor
De tant chevaliers mors ou pris
Mais je l’ai en tel guise empris
Che est le fin que j’en morrai
Ou je m’amie en rescourrai
Espinogre fait lors Gavain
Mout est le chevalier vilain
Et mal courtois qui autre voit
D’amours en si trés grant destroit
Si nel secort a son besoing
Sire fait chil pas ne m’en soing
Se vous en volés entremetre
Que mon pooir n’i veulle metre
Car je suis vostres par raison
N’i puet avoir nule acoison
De quanques vous vaurrés emprendre
Que bien n’en veulle mon fais prendre
Ja n’en serai vers vous eschis
Lors li ont ambedui promis
C’a chel besoing li aideront
Et li chevaliers lors respont
Seigneur fait il les vos merchis
Se mes outrages vos ai dis
Que j’ai empris par ma sotie
Comperer ne le devés mie
Ne je de che ne vous requier
Se je mon grant outrage quier
Dont je ne me puis departir
Que vous pas y doiés partir
Car che seroit trop grant damage
Se nul de vous par mon outrage
Que j’ai par mon outrage empris
Iert de chest oevre mort ou pris
Quant ch’oy Monseigneur Gavain
Qui de grant franchise estoit plain
Lors l’en est trop grant pitié prise
Car il set bien que par franchise
Les ensoine il et escuse
Et leur secours pour che refuse
Qu’il crient c’o li ne lor meschiee
Sire fait il comment qu’il chiee
Quant nous l’avons ainsi empris
Nous en serons ou mort ou pris
Ou nous vous rendrons vostre amie
Li chevaliers les en merchie
Qui a merveilles s’esjoi
De la promesse qu’il oi
Seigneur fait il Dix vous en oie
Que rendre me puissiés la joie
Dont j’ai esté lonc tans en paine
Chil qui d’onor faire se paine
Dix li refait au chief du tor
A son besoing bien et honnor
Ne ja n’en iert tant desvoié
Qu’il ne soit mout tost avoié
Quant Dix le sekeurt et avoie
Lors se sont tuit mis a la voie
Or en vont en chele besoigne
Sire se Dix grant bien me doigne
Fait le damoisele a Gavain
Il m’est prise si trés grant fain
Que me verrés ja esragier
Se je n’ai tantost a mengier
Et vous di bien seurement
Que se je n’ai delivrement
Une pieche de pain au mains
Que je mengerai ja mes mains
C’onques riens si grant fain n’en ot
A Gavain merveille desplot
Quant il oy cheste nouvele
Lors a dit a la damoisele
Bele fait il pour Dieu merchi
Nous ne porrions trouver chi
Riens el monde pour nul avoir
Qui nous peust mestier avoir
Et vous savés que par raison
N’i puet avoir nule achoison
Qu’il vous couvient amdeuz aidier
Orendroit a chu chevalier
Car nous li avons couvenant
Si ne seroit pas avenant
Quant couvenanchié li avon
Qu’a tel besoig le faillison
Qu’ainsi fali li averoit
Des que le pople le saveroit
Le reproche en durroit toudis
Gardés qui ne me soit de pis
Et que je n’aie deshonor
Par le franchise et par l’onor
Que vous avés en moi trouvee
Tous jours vous seroit reprovee
Chest oevre s’il estoit seu
Que vous li eussiez veu
Je vous pri qu’il ne vous desplaise
Anchois souffrés cheste mesaise
Tant que cheste ovre soit passee
Ja n’iere si fole provee
Je n’ier ja fait ele si fole
Que j’acorde cheste parole
Ne que je ainsi le vous gré
Iceste parole vous gré
Et que je tous jors miex ne veulle
Autrui anui qui que se deulle
Et qui qu’il desplaise de rien
Que je ne vaurroie le mien
Ne quidiez pas que je m’en faigne
Et que je le fain ne me destraingne
Gavains plus ne di encor
Qui me dourroit .VC. mars d’or
Pour souffrir jusqu’a midi
Seur ma loiauté le vous di
Ne porroie je souffrir mie
Et che sera grant vilenie
Quant je sui chi en vostre garde
Se je muir par vostre mesgarde
Sire dist ele je vous di
Que j’ai autre fois esté chi
Si vi chi devant .I. chastel
.I. petit outre chu vauchel
Il n’i a pas lieue et demie
Onques en toute vostre vie
De beles tors de riches sales
En Engletere ne en Gales
Ne veistes seulement sis
Qui s’i fussent adroit assis
Mais j’ai aillors m’entente mise
Que a dire vous la devise
Si com chele le devisa
Car ele dit et avisa
Mout trés bien quant ele le vit
Et si li a conté et dit
Qui siet dedens .I. plaisseis
Et que le chastel est garnis
De quanqu’il couvient a prodome
Li asnes chiet pour la grant somme
Fait Gavains ch’ai je oi retraire
Mais bien voi qu’il le m’estuet faire
Et qu’o vous aler me couvient
Quant ainsi a plaisir vous vient
Salemons dit en mi son livre
Que chil n’est pas du tout delivres
Qui compagnie a femme prent
Et chil qui le tient et sousprent
Puis qu’il est souspris de s’amor
Mout a de quoi faire clamor
Et s’il avoit itant de cuer
Qu’il s’en osast plaindre a nul fuer
Mais nus ne s’en ose clamer
Et chil qui plus couvient amer
Et qui plus est d’amor en paine
Et chil qui plus tous jours se paine
De servir a se volenté
En est plus tost a foleté
Autre oevre li cuers me tire
Revenir veul a ma matere
Car assés ai des femmes dit
Nis n’i a mais nul contredit
Qu’il en ja se petit non
Qui ne soient de tel renon
Espingre fait Gavains lor
Or m’est bel que avés .II. cors
Chascun de vous en a .I. boin
Sonnés le vostre et il le sien
Tant que on l’oe .IIII. mos
Et je vous sievrrai les escloz
Des que j’arai tant esploitié
Que la puchele ara mengié
Mais ainz m’estuet tant porcachier
Que la puchele ait a mengier
Que je faiche nule autre rien
Nous le veons fait il mout bien
Qui ne puet pas autrement estre
Lors tournent .I. poi sor senestre
Entre Gavain et le puchele
Si oirrent par une sentele
Tant qu’il sont el chastel venus
Qui n’iert pas clos de peus menus
Mais de haut mur et de fossé
Si ot .I. grant bos adossé
Et .I. plasseis tout entor
Qui clooit le porte et le tor
Si qu’il n’i ot fors une entree
Le puchele iert laiens entree
Qui bien connissoit le pais
Et chil qui n’en iert pas nais
Ne nul homme n’i connissoit
Entra par le porte tout droit
Si ala vers le tour amont
Tout a cheval par mi le pont
Sans chou que nul homme veist
Qui de riens le contredeist
Le puchele remest dehors
Et chil qui sans non estoit fors
Entra tantost dedens le sale
.I. doublier qui n’iert mie sale
Mais blans estoit comme une nois
Vit estendu deseur un dois
Une coupe y ot de fin or
Toute plaine de boin vin for
Flans gastiaus wauffres et pastés
Poivre chaut y vit et lardés
Dedens une blanke escuele
Et si vit une damoisele
Qui au disner estoit assise
Et se biauté puet sans franchise
Nule damoisele garder
Dont se puet ele bien vanter
C’onques nature ne peut faire
Plus bele se fust deboinaire
Mais tant iert orguelleuse et cointe
Que nus qui ne fust son acointe
N’en peust bien dire a nul fuer
Pour l’orguel qui est en son cuer
A courtoisie et loiauté
Si vous di pour voir que biauté
A en orguel mout malvais oste
Biauté qui a orgueul s’acoste
Est a mon dit toute perdue
Et li chevaliers le salue
Mout boinement puis li demande
Qu’ele li doigne de sa viande
Or entendés fait il puchele
La hors a une damoisele
Tout a cheval en chele court
Et s’ele tost n’en a secourt
Et a mengier on ne li porte
Jamais n’istra de cheste porte
Ains sera morte sans retor
Ele estoit devant le tor
Et si vous pri par grant franchise
Par guerredon et par serviche
Que vous m’aidiés a chest besoing
Sire se je ja riens vous doing
Dont soie je fait ele honnie
Ains me sanle grans estoutie
Si estes mout outrequidiés
Quant vous si folement quidiez
Que je doie pour vous riens faire
N’estes pas de si grant afaire
Que seul penser le deussiés
Vous estes mout outrequidiés
Se mes freres fussent chi tous
Dont j’ai .VII. mout hardis et prouz
Mais il sont en chele forest
Puchele fait il si vous plaist
Que je pour .I. mout petit don
Vous doie mout grant guerredon
Il iert mout bien guerredonnés
Se vous seulement me donnés
.I. seul gastel ou .I. pastés
N’iert pas ainsi le mien gastés
Fait le puchele par mon chief
Je n’en trairés ainsi a chief
Fait .I. nains qui devant li fu
Sa parole hauche et son hu
Souventes fois qu’il keurt as chienz
Ja n’esploiterés vers li rienz
Par franchise ne par priere
Je connois mout bien se maniere
Mais par orguel et par forfait
Seroit tout vostre plaisir fait
Dites moi qui en court hantés
N’est par orguel orguel dontés
Metés orguel encontre orguel
Je vous lo issi et si veul
Quant vous avés si grant besoig
La viande n’est mie loig
S’en poés a grant plenté prendre
On doit mout douter a mesprendre
Que je craindroie trop meffaire
Si volroie si en pais faire
Fait chil sans non se je peusse
Que je nul mal gré n’en eusse
Che n’iert ja fait li nains hui més
Et chil est lors alés plus prés
Si prinst .I. pasté et .I. pain
Et .I. lardé en l’autre main
Dont l’escuele est toute plaine
Et li nains par le frain l’enmaine
A le puchele qui l’atent
Et il la viande li rent
Si li prie de soi haster
Car n’iert pas lieu du sejourner
Grant haste estoit qu’il se hastast
Et grant besoing que il alast
A la rescousse au chevalier
A qui il doit aler aidier
Si com il li a couvenant
Et chele li dist maintenant
Sire dist ele se Dix me voie
Je serai mout tost a le voie
O vous mais il m’estuet penser
Anchois de ma vie tenser
Dont j’ai en grant espreuve esté
Chest mengier qui est apresté
M’a rendu maintenant la vie
Nel tenés pas a vilenie
De men grant besoing ramentoivre
Il m’est ains avoir a boire
Je suis de si grant soif sousprise
Qui des geuy matin m’est prize
Si ne porroie pas durer
Que je ne le puis endurer
Longuement si je n’ai a boire
Et j’erch sans ensonne a la voie
O vous des que j’arai beu
Lors s’est chil sans non esmeu
Or m’estuet faire autre priere
Si revint en la sale arriere
Puis va avant la coupe prendre
Mais quant il y vaut la main tendre
Chele qui la estoit assise
Ains de lui a le coupe prize
Si li a mout fierement dit
On y mesist ja contredit
Et el vin et en la viande
Se chil qui sont en chele lande
Et en chu bois en lor deduit
Fussent en cheste sale tuit
Mais vous m’avés sole trouvee
Si avés sor moi esprouvee
Vostre proeche et grant honnor
Vous estes de faire deshonnor
A une seule damoisele
Et li nains par ire l’apele
Si a dit Sire chevalier
Ja n’arés de lui sans dangier
Vaillant .I. seul quartier de pain
Il prist lors le coupe en se main
Veulle ou ne veulle si l’enporte
A chele qui est a le porte
Et l’autre qui siet a le tavle
Li dist vous n’estes pas raisnable
Sire vassal ne bien apris
Qui chi avés seur men pois pris
Mon mengier se chil fust en vie
Dont tout li mont avoit envie
Por le bien qui en li estoit
En eusse encor mout haut droit
Hay mort tant par estes ose
Felenesse et contraliose
Que ja n’espargneras prodome
N’a damoisele jusqu’a Romme
Ne dela dessi qu’en Espagne
Qui esgaree n’en remagne
Ahi ! Ahi ! dist ele Gavain
Ne fu pas traitié de ma main
Ma coppe si vous fussiez vis
Ne mon mengier devant moi pris
Je n’en eusse nul regart
Or n’est il mais nus qui nous gart
Ne qui i meche contenchon
Chil qui n’ot soig de sa tenchon
A au naim le coupe livree
Et chele qui s’iert delivree
De la viande et du vin
Se rest o lui mise au chemin
Il n’ont mie grantment erré
Puis qu’il ot le pont avalé
Qu’il a trouvé le chevalier
Qu’il li donna le boin destrier
A le crois et le paleffroi
Avec le sele et le conroi
Dont il avoit mout grant besoig
Si fist l’esprevier seur son poig
Qu’il li avoit ilec donné
Et si iert si trés bien armé
Et si adroit qu’en nule terre
Miex achesmé ne peust querre
Il le salue si li quiert
Com chil qui le besoig le quiert
C’ore li rende son guerredon
Et si li ramentoit le don
Dont li guerredons est deus
Et si n’est orendroit rendus
Et s’il veut tant ne quant atendre
Jammais n’ara pooir du rendre
Si vous dirai fait il pour quoi
Chel chastel laiens est tout quoi
Il n’i a orendroit nului
Qui faire nous peust anui
Li chevalier de laiens tuit
Sont en chu bois en lor deduit
J’en sai des geuy la nouvele
Et laiens a une puchele
Dedens chu chastel enfremee
Qui j’ai plus de .III. anz amee
Si vous pri que le me donnois
Par foi fait il che est bien drois
Que vous l’aiés se onques puis
Et se en chel chastel la truis
Ja m’en trouverés tout loial
Lors torne arriere son cheval
Si revint arriere en la sale
Et chele qui forment le male
Par parole et mout le maldit
Li a mout estoutement dit
Que mal y soit il retournés
Et il s’est lors vers li tornés
Si l’a par le destre bras prise
Puis si l’a devant li assise
Seur son cheval et puis s’en torne
Qu’en la sale plus ne sejourne
Et chele qui tenrement plore
Le maldit et si prie ore
Que Dix mal entente li doigne
Quand ele voit que s’esloigne
Et qu’ele est ja hors de la porte
A merveille se desconforte
Lors tort ses poins et brait et crie
Et dit en haut aie aie
Lasse fait ele tant Dix me het
Ha hi ! lasse c’or ne le set
Mes freres li preuz Cardoain
Ahi ahi dist ele Gavain
Tant avons de vous grant damage
Ja ne fust pensé chest outrage
Chest grant orguel et chest fourfait
Qui chest chevalier chi m’a fait
Se vous fussiés seur et delivre
Et chil toutes voies la livre
Et tent a cheli qui tant l’aime
Et ele tout a Dés reclaime
Et si afiche bien et jure
Que ja chele grant desmesure
Ne fust faite se il vif fust
.I. sien frere qui a mon fust
Estoit lors afusté pour traire
Oy la damoisele braire
A grant paine l’a tresoie
Et le puchele autre fois crie
Il ne set quoi quar trop iert loing
Mout bien entent qu’ele a besoing
Chest Cardoain qu’ele reclamoit
Et le chevalier qui l’amoit
Qui or l’avoit en sa baillie
Li a dit bele douche amie
Je sui Ragudel de la garde
Et quant vous estes en me garde
Mout en devés grant joie avoir
A enscient poés savoir
Car de lonc tans sui vos amis
Ja m’avés vous tous jours promis
Que vous n’amiés riens fors moi
Se on vous croit par vostre foi
Que j’en ai par vostre main destre
Dont en doi je asseur estre
Quant la damoisele l’oi
A merveille s’en esjoi
Si a dit Sire chevalier
A qui je veay le mengier
Je vous en doing gage et merchi
Et de cheste oevre vous merchi
Que mout m’avés a gré paiee
J’estoie forment esmaiee
Mout dolente et mout esgaree
Car je quidoie estre livree
A homme que je pas n’amaisse
Jammais a nul jour ne mengaisse
S’il me fust ainsi avenu
Bien soit chest chevalier venu
Qui si m’a hui paié a gré
Je otroi volentiers et gré
Se il li plaist c’a vous me doigne
Si li priés qu’il me pardoigne
Et que il pas ne prengne a pris
Che que j’ai tant vers li mespris
Bele fait il jel vous pardoig
Et si vous reng et si vous doig
A chu chevalier qui vous tient
Ma damoisele et si couvient
Que de che que je vous ai fait
Je sai bien que je ai meffait
Que m’en pardoigniés le mal gré
Sire dist ele je le vous gré
Sen frere qui oie l’ot
Au plus tost que il onques pot
Est venus au chastel poignant
A le court trouva .I. sergant
Si li demande qui faisoit
Le noise que oie avoit
Et chil sans nule demouree
Li a le verité contee
Onques ne l’en menti de riens
Or n’est mie chis pais miens
Fait il se il l’enmaine ainsi
Maintenant d’une estable issi
Mout vistement .I. sien vallet
Qui li mist hors le gringalet
Si li mist le frain et le sele
Puis monta en une tourele
Qui estoit seur le maistre porte
Mout delivrement li aporte
Sen escu s’espee et sa lanche
Et il yst hors si prent se lanche
Des qu’il fu montés el destrier
Qui estoit a chu chevalier
Qui laissa a Gavain s’amie
El bois pour se grant galousie
Et qui lors chevaus enmena
De l’esploitier mout se pena
Puis qu’il fu du chastel issus
Qu’il a les chevaliers veus
Et les damoiseles ensamble
Et se il ja ne les dessamble
Et il ne depart chele route
Et desconfist justement toute
A che qu’il est chevalier boin
Et le cri du pais et soin
Il ne se prise .I. angevin
Chil sans non l’oi le chemin
Venir poignant par mi .I. val
Et quant il connut le cheval
Que le chevaliers chevauchoit
Onques mais si grant joie n’oit
D’angousse riens ne li enquiert
Mais hardiement le requiert
Et chil laist courre contre lui
Si s’entrefierent ambedui
Le chevalier le fiert avant
El quartier de l’escu devant
Que le lanche en asteles vole
Com se che fust une venvole
Et chil sans non l’a aprés feru
Deseur le boucle de l’escu
Com chil qui ne l’espargne point
Que l’escu li a au braz joint
Et le bras au costé li sere
Si qu’estendu le porte a tere
Puis a mis le main au costé
Le teste li eust copé
Quant la damoisele li prie
Et requiert que pas ne l’ochie
Sire dist ele il m’est avis
Que se vous l’aviés ochis
Jammais nul jour joie n’aroie
Et li chevaliers li otroie
Et dist qu’il fera tout son bon
Par tel qu’ele faiche le son
Sire dist Cadroain le Rous
Tant a proeche et bien en vous
Franchise et deboinaireté
Que ne devés estre resté
De riens nule que m’aiés fait
Car ch’a esté par mon fourfait
Et por che vous otroi et gré
Que je faiche tout vostre gré
Sire dist il voste merchi
A cheste damoisele chi
Vous pri que pardonnés vostre ire
Et si vous veul encor plus dire
Et si vous veul forment prier
Que veuilliez que chu chevalier
Ait par vostre otroi vostre seur
Car il l’aime de tout ceur
Et je quit bien qu’ele l’aime aussi
Et si vous acordés andui
Entre vous et le vostre amie
Sans rancune et sans vilenie
Je vous offri des avant ier
Quant je montai pour l’esprevier
Que je seur sains vous juerroie
Mout volentiers que je n’avoie
A le puchele chose dite
Se je iere enclus ou hermite
Le plus saint et le plus prodomme
Qui soit de chi desi qu’a Romme
Dont je fusse resté de rien
Je vous en croi fait il mout bien
C’ains n’en fu mot par li parlé
Ainsi com il fu pourparlé
Et la chose fu devisee
Fu la concorde creantee
Lors a repris le gringalet
Chil sans non qu’il n’i eust ret
Jamais de nule contenchon
Et si li fist du sien .I. don
Si vous di je bien que li siens
Estoit assés et biaus et boins
Ses freres qui le noise oirent
Tantost des esperons ferirent
Si passerent teres et vaus
N’espargnierent pas lor chevaus
Qu’il n’ont pas trouvé lenz ne fainz
Au chastel vienent que ainz ainz
Puis ont demandees nouveles
Ancois qu’il widaissent les seles
A .I. vallet qu’il ont trouvé
Chil a qui il l’orent rouvé
Lors dist ainsi com il avinrent
Et il lors en la sele vinrent
Si ont les armes demandees
Chil a qui furent commandees
Lors livra si se sont armés
Puis resont es chevax montés
Si sont issu par grant desroy
Si jurent que se ch’iert le Roy
Qui eust emprins tel fourfait
Si seroit il de lui tost fait
En tel guise qu’il en morroit
Que riens garandir ne porroit
Ne targent gaires qu’il les voient
Lors se pourfichent et desroient
Si ont les lanches alongiés
O les enarmes en poigniés
Des escus pour courre lor seure
Cadrouains li Rous en is l’eure
Qui lors iert el cheval montés
Lait courre s’il a encontrés
Si lor a mout fierement dit
S’un deuz iert par eux desconfit
Que jammais .I. n’en ameroit
Et si jure que il feroit
Pour eux che c’onques ne fist nus
Car se chiex en faisoient plus
Il se tourneroit ja vers eus
Et si se combatroit pour eus
Seigneurs dist il or entendés
J’ai chi deuz chevaliers trouvés
Preuz et courtois et enseigniés
Et chil de cha est tant prisiés
Qui a moi a changié cheval
Tant l’ai trouvé preu et loial
Que nus ne vous diroit pour riens
Seulement le moitié des biens
Que on porroit trouver en lui
Mais che est travail et anui
De reconter vous tout le conte
Si com Cadroain li reconte
Qui lor a dit et reconté
Com il el chaine avoit monté
Et comment il l’avoit souspris
Ains qu’il eust l’esprevier pris
De chief en chief lor conte l’oevre
Puis lor dist aprés et descoevre
Com il ont fait leur acorde
Tant lor a dit qu’il les acorde
Et que l’oevre fu creantee
Ainsi com ele iert devisee
Lors l’ont prié de remanoir
Et qu’il s’en aille a lor manoir
Ensamble o eux et si soit Sire
Et il lor commencha a dire
Mout boinement qu’il ne puet estre
Car il laissa or sor senestre
.I. chevalier .II. lieues loig
Qui a d’ayde grant besoig
Lors lor a l’oevre recontee
Si comme chil li ot contee
Qui aloit rescourre s’amie
Et il jurent qu’il n’ira mie
Se il n’i vont ensamble o lui
Et il lor dit seignor je sai
Que j’ai ichi trop sejourné
Mieus me venroit estre acouré
Quant ainsi l’ai couvenenchié
Qu’il ne fust par moi avanchié
Car j’en seroie en fin trais
Si vous rent graces et merchis
De che que vous m’avés offert
Et il vous iert mout bien souffert
Que vous vegniez ensamble o moi
Et je vous promech et otroi
S’o moi vous i plaist avenir
Qu’a vostre me poés tenir
Il li prometent qu’il iront
Et s’affichent que il feront
Tout lor pooir de la rescousse
Cardoain a la teste rousse
Li dist Sire ne vous poist mie
J’enmenrai arriere m’amie
Et se Ragudel le m’otroie
J’enmenrai le sieue et la moie
Que eles n’ont o moi que faire
Et che ne leur doit pas desplaire
Se je les maing quar je vous di
Et loiaument le vous afi
Que bien en iert tenu le don
Et tantost com nous revendron
Je li rendrai sans contredit
Puis lor a devisé et dit
Qu’il n’a en la forest trestor
Sentele ne adrecheor
Qu’il ne saiche et qui les sievrra
Tantost com il armés sera
Mais il iert ainz d’armes garnis
Que se il estoit desgarnis
Ja endroit ariés afaire
A tel besoig iert de bien faire
Jammais nul jour liez ne seroit
De le honte qu’il aroit
Chil retourne et si s’en vont
En tel guise com je vous cont
De chou a moi n’estrives pas
Car de bien faire ne sui pas las
Or est chil sans non a grant aaise
Et tout che mout forment li plaise
Puis qu’il a pourcachié tel gent
Dont li pourcas est bel et gent
Qui tant est bien appareillié
Et de bien faire encouragié
Issirent les elmes enclins
Trespassent sentes et chemins
Et oirrent tous les grans galos
Tant qu’il ont trouvé les esclos
Par mi une lande des deuz
Qui chevauchoient devant euz
Sereement crient aprés
Et Espinogres et Cadrés
Qui esroient plus que le pas
Estoient ja venu au pas
O eus atendent le venue
Del chevalier et de sa drue
Sachiés bien que Cadrés a non
Bon chevalier de haut non
Chil a qui chest oevre apendoit
En itel maniere atendoit
Et Espinogre ensamble o li
N’estoient encore que dui
Quant il ont le route veue
Et chil qui conduisoit sa drue
Et le premier entre el pas
Cadrés laist courre isnel le pas
Tant com cheval pooit randir
Si l’a feru par tel air
En l’escu seur le boucle amont
Que il abati en .I. mont
Lui et son cheval tout ensamble
Et Espinogre ce me samble
A si aprés l’autre feru
Qu’il l’a du cheval abatu
Tout en vers en une sentele
Devant les piés a le puchele
Puis les escrie durement
Si retourne menuement
Et fiert de lanche et d’espee
Onques mais ne fu tel mellee
Pour seul .II. chevaliers soufferte
Sans encombrier d’euz et sans perte
Mout souffrirent d’armes grans fais
Si vous di bien que onques mais
A deux chevalier che n’avint
Qu’il fussent assamblé a vint
De tel fais d’armes soustenir
D’un mal pas a forche tenir
Que nus des .XX. passer n’i puet
Cadrés mout hardiement muet
Si a fait .I. trop grant encontre
Et fiert le premier qu’il encontre
El pis entre les .II. mameles
Que sa lanche vole en asteles
Chil cay jus tout a .I. drois
Et fiert .I. autre del retrois
SI grant cop par mi le visiere
Qu’il l’abat seur l’archon arriere
De son cheval si qu’il chaist
S’uns esquiers nel retenist
Ne fu pas geté li tronchons
Ains a feru des esperons
Si fiert le tierch et puis le quart
Et Espinogre de sa part
Ne li doit de bien faire rien
Chascuns d’euz le fait si trés bien
Que li autre ne s’esbaissent
Neporquant si se ravertissent
Si se tienent mout a honnis
De che qu’il ont esté laidis
Par .II. chevaliers seulement
Car il cuident seurement
Qu’il n’i ait .I. tout seul des .XX.
Nis li pires qui o euz vint
S’il trouvast orains .I. de cheux
S’il fussent cors a cors amdeuz
Qu’il ne quidast ochirre ou prendre
Que ja ne se peust deffendre
Por la vergongne qu’il en ont
Du grant anui que chil lor font
Ont tuit ensamble .I. poindre enpriz
Si ont sor euz le pas pourpriz
Si que deguerpir lor couvient
Et Espinogre lors sourvient
De che que ses compains lor dist
Anchois que de lui departist
Lors a prins son cor et si sonne
Si que tous li bos en resonne
Et chil qui souvent l’ot oi
Chil sans non mout s’en esjoi
Qu’il au corner a entendu
Qu’il se sunt mout bien deffendu
Et tant se porront bien tenir
Qu’il y porra a tans venir
Lors a feru des esperons
Si a dit a ses compagnons
Seigneur dist il or en venés
Car a chu cor c’oi avés
Sonne .I. de cheuz qui vous atent
Qui a grant meschief se deffent
Lors laissent les chevaus aler
Quant vint au tertre avaler
Si ont les chevaliers veus
Espinogre iert au frain tenus
S’iert trestoute le mellee
El vauchel sor lui arrestee
Et Cadrés a bien conneu
Chelui sans non qu’il a veu
Qu’il li vient aidier sans faintise
Le lanche sor le sele a mise
Si ont les escus embrachiés
D’aidier lor tous apareilliés
Quant il ont veu lor secours
Qui en poi d’ore lor iert sours
Mout par en ont grant joie eue
Pour la forche qui iert creue
A chascuns getee la main
Si emprinst .I. par le lorain
Chil sans non hardiment muet
Tant com cheval durer li puet
Si se fiert en le gregneur presse
Qui forment s’aguise et apresse
Des .II. chevaliers retenir
S’en fiert si .I. au sourvenir
D’une lanche qui mout iert forte
C’a tere du cheval le porte
Li autre qui aprés venoient
Tes y ot qui les depechoient
Et tiex i ot qui abatirent
Les chevaliers qu’il en ferirent
Mout hardiement les requirent
Par forche a le voie les mirent
Ferant ferant en lor venue
C’onques n’i ot regne tenue
Pour .I. petit qu’il ne passerent
Outre le pas si reculerent
Par forche et par armes tuit .XX.
Et ainsi tant d’onnor lor vint
Qu’il estoient avant venu
Qu’il les ont des lor retenu
Prison lor firent fianchier
Puis se painent de l’avanchier
Si se revont meller a eux
Bien aidierent les .XX. as deux
Qu’il trouverent si encombrés
Et si ont chiex desbaretés
Et quant les fuians au pas vinrent
A l’entree les frains retinrent
Puis ont arriere regardé
Si ont veu et esgardé
Que chiex qu’en cachié les avoient
Que .X. sans plus ileuc n’estoient
Si garderent et loins et prés
Nus secours qui venist aprés
Mout se tinrent a entreprinz
Si ont lor hardement reprins
Puis requierent mout durement
Et se li livres ne me ment
La u je trouvai le conte escrit
Onques nul chevalier ne vit
Si boin estor pour tant de gent
Car si lor vinrent radement
Li .X. qui preu et seur ierent
Hardiement les encontrerent
La ot dessus l’erbe nouvele
Maint trons de lanche maint astele
Et maint chevalier pris au frain
Cadrés qui n’ot pas le cuer vain
Qui grant pieche s’estoit pris garde
Et vit que s’amie l’esgarde
Poinst le cheval par grant air
Si va cheli au frain saisir
Qui le jor prendre le devoit
Et chil sans non qui tout che voit
Qui avoit brisié sa lanche
Broche le cheval si se lanche
Entre lui et les chevaliers
Lors esperonnent les destriers
Si compagnon qui erent prés
Si se sont tuit lanchié aprés
Si ont les chevaliers fors clos
Ne lor ont pas tourné le dos
Si compagnon qui bien veoient
Que il lor seignor forcloient
Ses anemis qui son frain tienent
Hardiement jusqu’a lui vienent
Por lui delivrer et secourre
Grant paine ont mis en lui rescorre
Mais il n’en pueent traire a chief
Car Cadrés li ot ja du chief
Le hiaume osté et esrachié
Si fort par le col embrachié
Com chil qui mout savoit de guerre
Si se laissa cheir a terre
Quant Cadrés a tere le tint
Prison fianchier li couvint
Car de deffendre n’i ot point
Bien fu l’estor en itel point
Que vous m’oés conter et dire
De lor seignor qui voient prins
L’ont mout hardiment emprins
A faire pour lui delivrer
Miex se veulent a lui livrer
Qu’en prison le maint Cadrés si
Estes vous qui du bos issi
Cadroain le Rous qui venoit
Si durement com il pooit
Radement entra en l’estor
Si fiert .I. chevalier des lor
Tel cop que lui et le destrier
Fist a le tere trebuchier
Hardiement outre sa lanche
Si fiert du retrous de la lanche
.I. des autres qu’il encontra
Si c’a poi qu’il ne l’en fondra
A tere tous pasmés chai
Cadroains li tiers s’en issi
Si qu’il li a copé le poing
Et qu’il vola el camp bien loing
O s’espee que il tenoit
Quant virent qu’il se maintenoit
Si outrageusement vers eux
Ne quident pas que il soit seus
Ains criesment bien c’aprés li viegnent
Si grant gent qui la le retiegnent
Et que nus escaper n’en puisse
Pour quel camp font si grant presse
Auques leur font les cuers falis
Si quident estre maubaillis
Se chil en vienent el dessus
De la deffense n’i ot plus
Lor seigneur ont el camp laissiés
Si s’en va chascuns eslaissiés
Tant com il pueent des chevax traire
Et chil sans non qui voloit faire
Le bonté qu’il avoit emprinse
A la damoisele au frain prinze
Qui gaires ne s’est deffendue
Si l’a loes a Cadrés rendue
Or a Cadrés joie trop grant
Que s’amie qu’il amoit tant
Et qui tant iert bele et courtoise
A rescousse par sa proeche
Et du chevalier qu’il a pris
Qui avoit sor son pois empris
Amener le en sa contree
Mout a bien aieue trouvee
Qui si li a couvent tenu
Lors sont li .VII. frere venu
Qui cachié orent longuement
Chiex qui s’en vont vilainement
Mout l’ont tuit prié et requis
Quant il orent son estre enquis
Qui sejornast ensamble o eux
Et il lor dit que par eux deux
Par son cors et par l’Espinogre
Par tout le Roiaume de Logre
Sera tant l’aventure quise
Qu’il ont devisee et emprise
Qu’en aucun lieu le trouveront
Et quant il trouvee l’aront
Si lor pramet que sans trestor
Sera par ilec sen retor
Et qu’il en fin ne se mouvra
Au revenir ains lor dira
Son contenement et son estre
Car il ne porroit por rien estre
Que son estre lor fust conté
Desi qu’il ait son non trouvé
Et la verité que il quiert
Et chascuns li prie et requiert
Que il les laist aler o lui
Et il afiche que il dui
Il ne puet estre autrement fait
Or ne le tiegnent a sorfait
A orguel ne a vilenie
Il ira tout sans compagnie
Puis les a priés tous ensamble
Que il sejournent tuit ensamble
Et el castel Cadroain soient
Sejournent tant que il le voient
Et qu’il oent parler de lui
Car mout grant joie et grant anui
De l’aventure que il quiert
Ont tuit ensamble si affiert
Qu’a ses quemandemens se tiegnent
Ensamble tuit qu’il reviegnent
Ensamble tant qu’il le revoient
Et il boinement li otrient
En tel maniere l’atendront
Mais mout lor poise qu’il ne vont
Ensamble o eux si li pleust
Car se il nul besoing eust
Mout li aidaissent volentiers
Atant se part des chevaliers
Gavains qui va querant son non
Entre lui et son compagnon
Entre Cadrés et Ragidel
Ensamble alerent au chastel
Et Cadroain les emmena
Qui d’eux grant joie demena
Et qui mout grant honnor lor fist
Et chascuns des freres i mist
Son pooir qu’il n’en fali rien
A faire leur honnor et bien
Mout orent envoisié le jor
Car onques ne passa nul jor
Que chascuns d’euz ne fust a cois
D’aler en riviere ou en bois
A lor plaisir puent bien faire
A courre a chiens ou aler traire
Car li Sires fu posteis
Et sachiés bien que son pais
Estoit mout plentiex de tous biens
Mout y avoit oisiaus et chiens
Liemiers saietes et ars
Rivieres et forés et pars
Qui tout lor est abandonné
Et le don qui estoit donné
Et Ragidel qu’il averoit
S’amie quant il revenroit
Li fu tenus mout loiaument
Or me restuet dire comment
Chil qui aloit por son non querre
En aventure par le terre
Puet traire a chief de son afaire
Je ne vous porroie retraire
Com il l’ala ne com il vint
Ne mais qu’a .I. jor li avint
Que il erroit par .I. boscage
Et qu’il trouva .I. hermitage
Et de l’hermitage issoit
.I. chevalier qui y avoit
Le messe a l’ermite escoutee
Si ot une cappe affulee
D’escarlate a penne d’ermin
Ouvré bien d’un vert sebelin
A chu tans n’i avoit pas manches
Et ot chemises et braies blanches
A le guise de Gale ouvrees
En unes cauches decopees
Dessus unz esperons dorés
Qui mout estoient bien ouvrés
Et sachiés que li chevalier
Seoit seur .I. mout boin destrier
Tous desarmés s’espee chainte
Si ot une puchele atainte
Qui mout iert avenans et bele
Si li contoit une nouvele
Qui el pais iert avenue
Et chil boinement le salue
Qui de son non mie avoit
Sire fait il Dix vous avoit
De che que vous alés querant
Puis li a dit je vous demant
Si vous plaist que vous me doigniés
.I. don qu’ensamble o moi vegniés
Entre vous et chu chevalier
Hui mais deduire et herbeguier
Et vous arés hostel mout boin
Et viandes et vin mout boin
Car il iert a vostre devise
Sire dist il je ai emprise
Une aventure que je quier
Pour che si vous pri et requier
Qu’il ne vous poist se je m’en vois
Par chastel par viles par bois
Je querrai tant que l’ai trouvee
Chevalier s’il ne vous agree
Fait il a prendre mon ostel
Dont vous pri je et requier d’el
Et de che que je vous veul dire
Ne me poés pas escondire
Qu’il n’i eust grant mesproison
Sans l’aide et sans trayson
Fait il quant vous tant nous priés
Vous en iert li dons otriés
Et chil respont vostre merchi
J’ai .I. chastel mout prés de chi
.I. petit outre chel vauchel
Si est orendroit mout bel
Men disner prest et atourné
Vous n’en serés pas destorné
Le trait d’un arc de vostre voie
Et por che que je vostre soie
Vous prie que sans demourer
Vous mengerés o moi disner
Et il li dit jel vous otroi
Atant s’en tornerent tuit troi
Si sont dusqu’au chastel venu
Anchois qu’il fussent descendu
Estoient ja les tables mises
Et li sergant avoit prises
Les touales et les bachins
Les doubliers le pain et le vin
Fu tout appareillié et mis
Puis se sont au disner assis
Des que l’iaue lor fu donnee
Qu’il n’i ot autre demouree
Et sachiés bien que li mengiers
Fu biaus et riches et pleniers
Et liement donné et pris
Quant longuement i orent sis
Chil qui Sires iert de le maison
Mist les deux hostes a raison
Seigneur dist il je vous veul dire
Le doleur et l’anui de l’ire
Qui avenu est nouvelement
Dont tout li mont iert en torment
Quant il sera par tout seu
Iere l’autre soir esmeu
Pour aler en .I. mien afaire
S’on le peust cheler et taire
Che que je vous veul chi conter
Nus hom ne deust raconter
Mais l’ovre est tant par tout seue
Qu’ele ne porroit estre teue
Che poise moi que on le set
He Dix tant fortune les het
Ches dames et ches damoiseles
Quant eles saront ches nouveles
Que vous m’orrés ja raconter
Mout se porront desconforter
Car chil en qui Dix avoit mises
Loiauté proeche et franchise
Qu’il avoit fait courtois et sage
Sans vilenie et sans outrage
Sans orguel et sans desmesure
Il n’avoit point de soufraiture
Ains amoit honnor et raison
Est mort par malvaise acoison
Et quant je tant vous en ai dit
Savoir poés sans contredit
Dont le mesaventure sourt
Quant on le sara a le court
Mout en ara le Roi grant ire
Ha las qui li osera dire
Du boin chevalier qui est mort
Et decopés a si grant tort
Ch’est son neveu dont je vous cont
Hostes pour tous les sains du mont
Fait chil sans non que savés vous
Je sai dist il tout a estrous
Et vous comment jel vous dirai
Ne ja de mot n’en mentirai
Je voloie aler l’autre soir
En deduit pour mes boins avoir
Ainsi que je devoie issir
Si vi .III. chevaliers venir
Mout bien armés seur les destriers
Vers moi vint poignant li premiers
Tout seul aval une chariere
Et si laissa le dos arriere
Il me salue et je lui
Aprés me dit Sire je cuit
Que estés de chel ostel sire
Pour che vous veul prier et dire
Si serai vostres a tous jours mais
Que vous nous herbegiés hui mais
Et je li dis jel vous otroi
Lors s’en vint chaiens avec moi
Li chevaliers si descendi
Si se desarma sans anui
Et fist en sauf ses armes metre
Puis fist .I. vallet entremetre
De son cheval metre a estable
Mais se je fusse bien raisnable
Bien enseigniés et bien courtois
J’eusse demandé anchois
Qui il iert et dont il estoit
Et quel aventure il queroit
Car puis que je herbegié l’oi
Et j’en lui mauvaistié ne soi
Qu’il estoit alés pourcachier
Je ne le poi de chi cachier
Ne jeter de me maison hors
Lors vint chaiens a tout .I. cors
Portoit les membres et la teste
Si demenoient mout grant feste
Et grant joie de l’aventure
Et je demanday a droiture
Qui chel mort iert et que il portoit
Et s’il tel joie demenoit
Pour che qu’il avoient ochis
J’avoie dist li uns promis
Chel chief a une moie amie
Et je se Dix me beneie
Dist l’autre a la moie le cors
Et je tantost demandai lors
Qui il iert et pour quoi il l’avoient
Ainsi ochis comme il disoient
Lors commencha li unz .I. conte
Dont j’ai grant deul et ire et honte
De raconter le a nul homme
Ostes pour tous les sains de Romme
Fait chil sans non dites le moy
Car je vous di en boine foy
Ch’est l’aventure que je quier
Pour che si vous pri et requier
Que vous me contés tout le voir
Je vous ferai mout bien savoir
Fait li hostes n’en doutés ja
Si comme chil le me conta
Les deux des chevaliers avoient
Deus damoiseles qu’il menoient
A grant merveillie ierent beles
Trois anz prierent les pucheles
Si c’onques riens n’i esploiterent
Il lor avint que les prierent
Mout boinement de tous lors cuers
Les damoiseles ierent suers
Et les chevaliers compagnons
L’ainsnee si dist que li dons
De s’amor estoit ja donnés
Si n’iert pas chevaliers nés
Pour ele li fust tolue
Car tant iert biaus par aventure
Chil a qui donné ot s’amour
Qu’ele n’ameroit a nul jour
Nul chevalier se cheli non
Lors li demanda chil sans non
Qu’il se devoit de deul et d’ire
Je puis bien en toutes cours dire
Qu’il est tant dis et renommés
Qu’il ne puet estre en court chelés
Car che est Mesire Gavains
Qui les courtois et les vilains
Et chil qui sont par tout le mont
Loent sor tous chiex qui or sont
Li autres enquist maintenant
A chele que il amoit tant
Le sien cuer et le sien pensé
Men cuer en est bien pourpensé
Dist ele je n’i conte rien
Je ne sai pas nommer le mien
Qui il est ne quant je le ferai
Mais une cose de voir sai
Si l’avés vous trés bien oy
Que me seur a fait son ami
De Monseigneur Gavain sans faille
Si ne gart l’eure que ele aille
A la court le Roy pour l’i querre
Pour sa druerie conquerre
Et je yrai ensemble o li
Une cose de voir vous di
Que se ma suer li a graee
Ainsi comme ele si est donnee
Que je meismes m’i dourrai
En tel guise que j’amerai
.I. chevalier par son conseil
Et ch’iert le chevalier vremeil
De qui je ferai mon ami
Et sachiés bien que je vous di
Du boin chevalier du seur
Qui a la court le Roy Artur
Vint anten estre chevalier
Qui les armes et le destrier
Conquist par son cors seulement
Des armes par grant hardement
Que li Rois Artus li donna
Du chevalier qui emporta
Le coupe d’or devant lui
Mout furent angousseus li dui
Qui les pucheles requeroient
Puis lor dirent que il estoient
Meillors chevalier que chix n’ierent
Et les pucheles si jurerent
Que se lor dis n’en iert provés
Et qu’il se fussent esprouvés
Et qu’il les eussent vaincus
Cors a cors par lor .II. escus
Que jammais nul n’en ameroient
Et se il issi nel faisoient
Dedens .I. terme qui iert court
Eles iroient a la court
Si nous dirent que les vaincons
Qui tant priees les avons
Dont aront nous vos drueries
En fin devenrons vos amies
Dirent eles quant che sera
Mais se Dix plaist ja n’avenra
Car che seroit trop grant damage
Par tel fourfait par tel outrage
S’esmurent il pour Gavain querre
Tant errerent par cheste terre
Un jour avint qu’il l’encontrerent
Seul et desarmé le trouverent
Chil qu’il queroient pour ochirre
Grant damache est qu’il l’estuet dire
Deffense riens ne li valut
Par itel acoison morut
Li niés le Roy et sachiés bien
C’onques n’oi si grant duel de rien
Ne jammais pour qu’il m’en souviegne
Ne quit que si grant duel m’aviengne
Quant il fu ainsi avenu
Et chil furent chaient venu
Qu’issi l’avoient detrenchié
Le destre bras qu’il ot trenchié
Lor demandai s’il me donnerent
Et quant fu jours puis s’en alerent
Par matinet en lor pais
Et sachiés bien que il iert mis
Se je puisse vivre longuement
Si bien en or et en argent
Se li orfevres ne se faint
C’onques nul bras de nul cors saint
Ne fu mais si richement mis
Je l’ai bien voué et promis
Si m’en devroie bien entremetre
De faire le netement metre
Quar li prodoms fist mout d’onnor
As chevaliers de cheste tour
Si devroit bien aucun entendre
Qu’il porroit au guerredon rendre
Biaus dous hostes dist chil sans non
Pour Dieu et pour se raenchon
Connissiés vous bien Gavain
Je vous mousterrai ja sa main
Fait li hostes se Dix me voie
Maintenant mist la main en voie
Qui en .I. un coffre iert enfremee
D’un drap de soie envolepee
Et le bras s’est avant venu
Qui estoit enclos d’un bos fu
Puis si l’a avant aporté
A merveille l’ont regardé
Puis ont prié qu’il soit seu
La u le cors iert la u il fu
Il lor pramet qu’ainsi iert il
Ja riens de li n’iert tenu vil
La ou il soit ne bras ne main
Car bien set que ch’est de Gavain
Si doit estre mout chier tenu
Et chil qui iert sans non venu
Li dist Sire se Dix me gart
Je vi n’a pas quart jour Gavain
Vers Cardoil tout delivre et sain
Si aloit aventures querre
Or vous veul prier et requerre
Par amor et par guerredon
Que vous me creantés un don
Dont ne vous querrai nul sourfait
Li hostes dist dont iert il fait
Pour che que je faire le puisse
Enseigniés me dont la u je truise
Fait il chil qui se sont vanté
Que par eux est Gavains alés
Et que il l’ont tué et mort
Car sachiés que il est mort
Et mout laidement il l’ochirent
Sans chou c’onques mot ne li dirent
Ne qu’il n’avoit d’eux nul regart
N’a sous chiel homme qui les gart
Qui ait en lui sens ne raison
Qui l’ochirent en traison
Quant il iert desarmés et seus
Il n’avoit nul regart d’eus
Fust che proeche si l’ochirent
Aprés s’avanchierent et dirent
Qu’il avoit Gavain ochis
Je l’ai ja mainte fois enquis
N’onques encor n’en poi savoir
Du chevalier pour nul pooir
Son non ne de quel tere il fu
Fors qu’il portoit .I. tel escu
Comme Mesire Gavains porte
A merveille se reconforte
Li hostes qui ot ches nouveles
Qui mout li sont plaisans et beles
Puis dist Sire se Dix me voie
Je vous metrai bien a la voie
Mout volentiers quant vous vaurrois
Et che est bien raisons et drois
Que de che vous doie avoier
Je vous vaurrai ja convoier
Tant que je vous assenerai
Et pour chou vous convoierai
Que je vous mousterrai la voie
Maintenant du tout les avoie
Et de lors nons et de lor terre
De quant que il vaurrent enquerre
Sire dist il veistes vous
Onques le Faé Orgueillous
Je ne sai mie son droit nom
Bien sachiés vous que son sournon
Si est de la Roche Faee
Ainsi est sa vile apelee
Li uns d’euz est ainsi nonchiés
Et li autres est apelés
Par trestout Gomert sans Mesure
De chestui sournon n’ai je cure
Fait chil sans non qu’il ne vaut nient
Et il est bien par raison sien
Fait li hostes qu’il est assés
Orgueillous et desmesurés
Et si ai je malement dit
Je meismes i met contredit
Si est bien che dist esprouvés
C’onques nul trop ne fu assés
Li tiers ne sai je pas qui fu
Ne mais qu’il iert o eux venu
Che li oy dire et retraire
Qu’il n’i ala pour nul mal faire
Fors pour tenir lor compagnie
S’ot la saisine de s’amie
Biaus dous hostes fait chil sans non
Nul des deuz par cheste acoison
N’en dist il che me fu dit
Qu’eles metoient contredit
Et si dirent a lor amis
Que il lor avoient promis
Le cors Gavain ou mort ou vis
Si ot entr’eux mout grant estris
Car les damoiseles disoient
Que autre fois veu l’avoient
Que che n’iert mie ileuc son cors
Et li chevalier dirent lors
Que si iert et si prouveroient
Car as marchiés crier feroient
Par tous les chastiaus du pais
Qu’il avoient Gavain ochis
Et se nus osoit che desdire
Qu’il feroient crier et dire
Qu’il seroient prest du prouver
Si ne porroit encor trouver
Qui y meist nul contredit
Et de ches deux qui che ont dit
Il n’i a nul qui mout ne vaille
S’il voloit prouver par bataille
Or est la chose alee tant
S’aucuns venoit demain avant
Qui desist que ce n’est pas voir
Enfin lor convenra avoir
Les pucheles sans nul delai
Eles en sont el tel esmai
De che que ne pueent trouver
Qui che lor ost a faus prouver
Ne par bataille contredire
Qu’a poi que ne sont mortes d’ire
Et savés pour quoi il s’esmaient
Eles doutent trop que chix n’aient
En tel guise com je vous cont
Si dient bien que s’ochiront
Se sevent par nule raison
Que eles soient acoison
Que Gavains fu par eles mort
Jammais n’aroient nul confort
Ostes dist il ne vous anuit
Porrons nous tant errer anuit
Et demain dedens miedi
Une chose de voir vous di
Si ne di je pas pour vantanche
Se Dame Dix tant nous avanche
Je ai talent que nous alons
Si que demain a cheus vegnons
Le grant fourfait que chil ont dit
Nous deux y metrons contredit
Car vraiement comment qu’il aille
Ne puet remanoir sans bataille
Lors dist li hostes che me samble
Vous ne trouverés pas ensamble
Les chevaliers que vous querés
Se par armes nes conquerés
Mout avés grant honor conquise
De cheste euvre c’avés emprise
S’or ne faites trop grant demeure
Vous y venrés mout bien a eure
Et si vous dirai bien comment
Gomeret sans Mesure atent
Il a son paveillon tendu
Si a longuement atendu
Pour cheste afaire en une lande
Si enquiert ileuc et demande
Savoir se nus vaurroit desdire
Et si a fait crier et dire
Que par eus .II. est Gavains mort
Tant est preus et hardi et fort
Qu’il ne treuve qui l’en desdie
Si quide avoir demain s’amie
Le Faé Orgueillous atent
A son chastel tout ensement
Pour savoir se ja vendroit nus
Qui de cheste euvre feist plus
Et qui osast vers li emprendre
Ou a prouver ou a deffendre
Che qu’il dist qu’il a mort Gavain
S’aucuns ne vient avant demain
Qui par armes le contredie
Enfin ara la soie amie
Lors se levoient du mengier
Puis monta chascuns el destrier
Et si se mirent a le voie
Et li hostes tant les convoie
Comme courtois et enseigniés
Qu’il lor a mout bien enseigniés
Tous les pas et tous les asens
Qu’il ne faurroient a nul sens
A trouver chix qui vont querant
Et quant il orent erré tant
Que li hostes retourner dut
Espinogre lors s’aperchut
Qu’il avoient forment mespris
Si s’en tint tant a entrepris
Et si dist a son compagnon
Qu’il n’avoient enquis son non
Lors l’ont mout bel a raison mis
Sire nous sommes vos amis
Et che est bien raisons et drois
Car bien avés a cheste fois
Deservi que nous le soions
Biaus dous ostes si vous prions
Que vostre non nous soit nommés
Preudons estes et renommés
Si avions vostre acointement
Et sachiés bien seurement
Ja mar en serés en doutanche
Que nous en la vostre acointanche
Sommes tous et sans contredit
J’ai non Tristran je le vous dit
Ja fait il cheler ne vous quier
Seigneur si vous pri et requier
Par amour et par guerredon
Que vous me creantés .I. don
Et je ne vous querroie mie
Desmesure ne vilenie
Ja mar de che vous douterois
Par foi fait et ch’est bien drois
Que nous faichons vostre plaisir
Bien vous devés o nous tenir
Tous jours mais des ore en avant
Seigneur fait il je vous demant
Par guerredon et par amour
Que par moi soit vostre retour
Je ne sai ne vous ne savés
De l’aventure que querés
Que vous en estes a avenir
Mais savoir veul au revenir
Comment il iert de cheste afaire
Tout m’en conterés au repaire
Qui vous estes et de quel tere
Et l’achoison qui vous fait querre
L’aventure que vous querés
Se par armes cheus conquerés
Que vous avés longuement quis
Mout par ariés grant pris conquis
Boinement li ont otroié
Quant il ot assés convoié
Si s’en va li ostes arriere
Et chil oirrent en tel maniere
Comme li ostes lor ot dit
Tant ont erré que li uns vit
En .I. val un mout bel atour
Qui estoit a .I. vavassour
Mout estoit riches li pourpris
Et li Sires mout posteis
Et mout prodom que il estoit
A son contenement paroit
Qu’il estoit de mout grant pooir
La se herbegierent le soir
Tous deux chiés le boin vavasour
Si grant joie et si grant honor
Li faiche Dix com il lor fist
Mout s’esjoi et mout lor dist
De ses aventures la nuit
Et il a lui si com je cuit
Li conterent assés des lor
Et l’endemain quant il fu jour
Et on ot armé les vassaus
Si monterent seur leur chevaus
Et quant il orent congié pris
Si se sont a le voie mis
Quant furent el chemin entré
N’orent mie grant pieche erré
Qu’il iert encore assés matin
Qu’il trouverent .I. fort chemin
Que Tristran enseignié lor ot
L’un des .II. chel chemin aloit
Si com Tristran dit lor avoit
La ou Gomeret atendoit
Et li autres au chastel vait
La u li Orgueillous crier fait
Que il a mort Gavain sans faille
Si quide le jour sans bataille
Estre de s’amie saisis
Lors ont entr’eus .I. geus partis
Et si parti chelui sans non
Boinement a son compagnon
Sire fist il vous coisirés
L’un de ches .II. chemins irés
Pour cheste besoigne furnir
Et quant venra au revenir
Se Dix nous donne si ouvrer
Que par armes puissons prover
Qu’il ont menti de cheste afaire
A Tristran iert nostre repaire
Et chil qui anchois y venra
Son compagnon y atendra
Tant qu’il oie parler de lui
Quant je fait Espinogres sui
A cois de l’une de ches voies
A faire l’estuet toutes voies
Si qu’il ne puet autrement estre
Je yrai ceste a senestre
Qui me menra a Gomoret
Et je en cheste autre ensement
Fait chil sans non si vous commant
Au Glorieus au Tout Poissant
Qu’il vous gart de honte et de mal
Lors broche chascuns le cheval
Si oirrent mout grant aleure
Et Espinogre a droiture
N’ot pas lieue et demie erree
Qu’il a une forest trouvee
Puis oirre longuement issi
C’onques de la forest n’issi
Tant qu’il a trouvé une lande
Ou Gomeret est qu’il demande
Si com la parole est contee
Pour noient seroit recontee
Car ele est bien dite et seue
Si quide avoir le jour sa drue
Sans contredit que nus i meche
Ne quide que nus s’entremete
De prendre encontre li desraigne
Et quant il issi de sen raisne
Et il dit ses riches paroles
Si orgueillouses et si foles
Com vous m’avés oy conter
Nes couvient mie reconter
Car assés bien vous en souvient
Estes vous que priveement
Courtoisement li dist en pais
Dans chevaliers ne dites mais
Que vous aiés Gavain ochis
Vous avés laidement mespris
De che que le deistes onques
Sire vassaus et pour coi donques
Fait Gomerés quant je dis voir
Ne l’os je bien faire savoir
Nenil dist il onques n’avint
Il s’en combatroit a tel vint
L’un aprés l’autre com vous estes
Si trencheroit a tous les testes
Et Gomerés respondi lors
Par foi fait il j’en ai le cors
Mais il n’i a ne bras ne quisse
Et si sui prés que je le pruisse
Que je l’ai et que li Faés
En a les membres aportés
Et Espinogre respondi
Apertement avés menti
Je sui prés que je l’en deffende
Et que mort ou pris vous en rende
Ains que je issi de cheste lande
Et Gomerés tantost demande
Ses armes et on li aporte
Cauches de fer a mailles forte
Plus blanches qu’argent esmerés
Puis fu li auberc aportés
Fort et legier chier et treslis
Et elme qui fu de Senlis
Boine iert toute l’autre armeure
Gomerés s’arma a droiture
Que il ne quiert nule demeure
Son cheval iert plus noir que Meure
Et quant il fu mout bien armés
Si est sor son cheval montés
Tout prest de prouver esraument
Tantost li autres le desment
Il n’ot entr’eus tere ne vaus
Il laissent courre les chevax
Tant com chascuns se pot haster
Si s’entrefierent au jouster
Si grans cops par mi les escus
Que troés les ont et fendus
Outre firent passer les fers
Si se fierent seur les haubers
Qu’il ont trovés tenans et fors
Si se fierent par tels esfors
Et par tel ire des espiés
Qu’il n’i remest cheval en piés
Et de che ne doit nus blasmer
Quant les chevax couvient verser
Si chairent tous des destriers
Guerpir lor estuet les estriers
Si sont tantost en piés sali
Puis a l’un l’autre asali
Mout tost et mout hardiement
Et sachiés bien seurement
Ja nus ne esgardast l’estour
Qu’il nes clamast apeleor
Chascuns apeleor se fait
Et Espinogre le resvaist
Si fiert et refiert abandon
.C. cops li donne d’un randon
Et chil qui de riens ne s’esmaie
Hardiement li rent et paie
Tous les cops qu’il li a paiés
Frais est li hiaumes et quassés
Et tous detrenchiés li haubers
Ne garandist ne fust ne fers
Que li sans en .C. lieus ne faille
Tant par fu fiere le bataille
Que nus ne vous seust a dire
Qui est li mieudres et qui li pire
Mais sachiés qu’en itel maniere
Dura le bataille si fiere
Desi qu’a l’eure de midi
Qu’il se furent forment laidi
Quant li estour ot tant duré
Et chil orent tant enduré
Qu’il orent les hiaumes fendus
Et les haubers tous derompus
Si que par mi le sanc en saut
En plusieurs liex vermaus et chaut
Au derrain ainsi avint
Que Gomerés les saus li vint
Et que il le fiert de s’espee
Si qu’ele est en l’escu coulee
Che m’est avis pié et demi
A poi qu’il ne trencha par mi
Car mout i feri par grant forche
Au retraire tire et s’esforche
Mais ains qu’il l’eust issi traite
Fu s’espee tantost torte et fraite
Si que le pumelet des lor
Qui estoit trestous de fin or
Li remest en la main sans plus
Et Espinogre li keurt sus
Si fiert et refiert par grant ire
Et Gomerés li prinst a dire
Sire dist il or n’i a plus
Ne soiés pas mal el dessus
Quant je ne m’ai de quoi deffendre
Par estouvoir me couvient rendre
Je me met en vostre merchi
Et Espinogre respondi
Mout franchement et jel creant
Mais che iert par tel couvenant
Que vous vous en venrés o moi
Orendroit a le court le Roi
Si vous metés en sa prison
Et connistrés la mesprison
Du chevalier que ocheistes
Or sachiés que vous mespresistes
Qui deistes que ch’iert Gavain
Fort et preus et delivre et sain
Che sachiés de voir le venrés
A la court quand vous y venrés
Gomerés ainsi li otroie
Atant se metent a la voie
Quant il orent lors chevax pris
Et chil sans non qui ot empris
A querre l’Orgueillous Faé
A tant chevauchié et erré
Qu’il est venus a son chastel
Ou il faisoit tout de nouvel
Crier mout hautement son ban
En tel guise comme Tristran
Le courtois chevalier lor dist
Et il tantost le contredist
Sans che c’onques n’i dist outrage
Chevaliers dist il sans outrage
Seroit se chil estoit ochis
Qu’il n’a de riens vers vous mespris
Ne vers autre qu’aie oi dire
Onques ne fu en si grant ire
Que pour che plus tost en feist
Un outrage que on veist
Ne que nus hom peust veoir
N’estes mie de grant savoir
Qui vous vantastes de tel cose
Je sui chil qui desdire l’ose
Et qui par armes prouverai
Qu’il est vis et si mousterrai
Et li Faés li respondi
Je prouverai che que je vi
Et a qui qu’il doie desplaire
Lors fist avant ses armes traire
Si s’est mout vistement armés
Mout fu cointes et achesmés
Quant il fu montés el destrier
Il n’avoit sous chiel chevalier
Et trés grant tort vers li eust
Que il bien vaintre ne deust
Grant joie ont fait la gent menue
Lors n’i ot plus resne tenue
N’il n’i ot de manechier point
Chascuns d’eux le boin chevalier point
Tant comme il puet plus esploitier
Le Faé le feri premier
Du boin espi en mis le pis
Qu’il en fist voler les esclis
Chil sans non le feri aprés
Qu’il trenche des escus les es
Si qu’il fist le hauberc fausser
Par mi l’espaulle fist passer
Jusques a moitié le boin espié
Si qu’il en parut bien plain pié
Et plus encor devers le dos
Tout trenché fust et fer et os
Si l’enpainst par si grant vertu
Qu’il l’a tout ensamble abatu
En .I. mont lui et sont destrier
Lors mist le main au branc d’achier
Si va ireement requerre
Et chil qui gesoit a la terre
Mout blechiés li dist erraument
Sire chevalier je me rent
Quant si preu et si fort vous truis
Que je deffendre ne me puis
Je me met en vostre merchi
Et chil sans non li respondi
Mout volentiers et je vous preng
Mais itant vous di et apreng
Ains que vous veulle rechevoir
N’ai talent de vous dechevoir
Que vous en venrés avec moi
En prison a le court le Roi
Si merrés o vous vostre amie
Et se li Rois le vous otrie
Vous l’arés che sachiés de voir
Que vous ne le poés avoir
S’au Roy de nule riens desplaist
Et li chevaliers lors se taist
Que chele parole li grieve
Et chil sans non l’espee lieve
Si fait de lui ferir samblant
Et chil qui blechiés estoit tant
Qu’il n’a pooir de li deffendre
Li va la soie espee rendre
Frans chevaliers dist il merchi
Faites tant que je vous merchi
Et que je soie vostres quites
De cheste oevre que vous me dites
Se je perdoie ainsi m’amie
Je perderoie avec le vie
Car je n’aim riens el siecle tant
Tant par vous voi preu et vaillant
Si enseignié et si courtois
Que je sai de voir que li Rois
Le me rendra se l’en priés
Chevalier ne vous esmaiés
Fait chil sans non c’a vo amie
Che sachiés ne faurrés vous mie
Mout en a chil grant joie eue
Lors a tourné soi a sa drue
Et si fist sa plaie atourner
Puis va a la court retourner
O le chevalier qu’il a pris
Lors l’a mout bel a raison mis
Ainsi qu’il oirrent le chemin
Biau Sire fait il ja devin
Ne sai se ma pensee est fine
Mais men cuer ainsi la devine
Au samblant que je pens et voi
Vous estes de la gent le Roy
Pour che vous pri s’il pooit estre
Que vous me deissiés vostre estre
Tant que j’en fusse auques chertain
Par foi fait il je sui Gavain
Ja men non ne vous iert chelé
Puis que j’ai par armes prouvé
Et que je sui Dieu grace sains
Jammais ne serai jour vilains
De men non nommer a autrui
Ne chelerai ja qui je sui
Puis que par tere ai tant erré
Que j’ai le mien non recouvré
Que j’avoie piecha perdu
Il doit estre par tout seu
Le grant orguel c’aviés fait
Il doit estre par tout retrait
Che que fistes au chevalier
Qu’el bois l’alastes detrenchier
Puis en aportastes le cors
Anchois que du bos fussiés hors
Crevastes vous tous deuz les euz
Au vallet qui n’est pas seuz
Il avoit o lui .III. pucheles
Qui mout ierent gentes et beles
Qui mout demenoient grant duel
Chascune d’eles a son veul
Morust ileucques en la plache
Tainte et pale avoit le faiche
Tant avoit chascune plouré
Et quant j’oi le deul escouté
Si ving a eles tout errant
Puis vi devant eles gesant
.I. damoisel qui estoit gent
Mais mout li estoit malement
Car on li avoit de nouvel
Les .II. eux trait hors du chervel
Quant le vi si mal atournés
Qu’il avoit les deuz euz crevés
Si quidai de voir sans doutanche
Que le duel et le destourbanche
Qu’eles menoient fust pour lui
Le grant ire et le grant anui
Le damage pour quoi faisoient
Le grant duel qu’eles demenoient
Le premiere respont avant
Sire .I. chevalier mout vaillant
Avons chi veu detrenchier
Onques ne le peusmes aidier
Je demanday cui il estoit
Et l’autre si me respondoit
Que che iert Mesire Gavains
Qui ichi erroit trestous sains
Mais il n’avoit haubert vestu
Ne nul arme fors son escu
Et une lanche seulement
Ainsi iert eskeriement
Qu’il n’ot sergant ne escuier
Puis si vindrent .II. chevaliers
Armés seur .II. destriers d’Espaigne
A travers par une champagne
Tant qu’il l’atainrent en chu val
Chil tourna vers eux le cheval
Pour lui ochirre et detrenchier
Puis commenchierent a huchier
Estés estez Sire vassal
Chil arresta tout en estal
Qu’il tenoit sa lanche en sa main
Li uns li dist en haut Gavain
Ja n’en irés en fin sans faille
Atant commencha le bataille
Qui n’estoit mie paringal
Li cuivert felon et desloial
C’ont Gavain detrenchié et mort
Ou fust a droit ou fust a tort
Chel vallet i ala courant
Qui mout estoit preuz et vaillant
Que il cuida Gavain aidier
Mais ne li pot avoir mestier
Que il estoit ja decopés
Li vallés ot les eux crevés
Pour che que aidier li cuida
Uns chevaliers le cors toursa
Seur .I. destrier courant se voie
Se mirent errant a le voie
Si s’en vont mout grant aleure
Et je lor promis a droiture
Que le vallet seroit vengiés
Tournai moi quant j’oi prins congié
Que je n’i fui pas conneus
Je vous ai tant quis et seus
Que j’ai seur vous le poosté
Qu’il sera mout bien amendé
Le grant outrage et le desroi
Vous quidastes que che fust moi
Quant vous feistes le meffait
Par foi biau Sire autrement vait
Respont li Orgueillous Faé
De chief en chief li a conté
Le chose com ele fu faite
 Ne doit estre en tel mal retraite
Puis qu’ele puet estre amendee
Voiant chiex de vostre contree
Vous renderai chel chevalier
Et ses armes et son destrier
Tout sain si com onques fu plus
Et si vous di pour voir que nus
Ne vit onques encor plus cler
Que chil dont je vous oi conter
Fera tantost que l’arai fait
Et c’aval ses iex aurai trait
Tant seulement ma destre main
Si sera tout garis et sain
Gavains dist il amis chier
Se vous poés tant esploitier
Que li vallés ses eux eust
Et le chevalier mal n’eust
Le traison que vous fesistes
Encor porriés estre quites
A che que je vous aiderai
N’en soiés vous ja en esmai
Sire fait l’Orguellous Faé
Que onques en si grant santé
Ne fu en cors de chevalier
Ne li vallés biau Sire chiers
Com a la court le vous rendrai
De che ne soiés en esmai
Ainsi com vont parlant la voie
Et qu’il chevauchent par la voie
Ileuc endroit ou il parti
D’Espinogre son boin ami
Si descendent ileuc a pié
Par un chemin qui iert fourchié
Lors i vint poignant sans demore
Seur .I. chevalier plus noir que More
Un chevalier grant aleure
Son destrier iert a desmesure
Isniax qui voir en vaurroit dire
On ne porroit pas tel eslire
En la tere le Roi Artur
Le chevalier iert mout seur
Il estoit si armés sans faille
Qu’il ne cremoit pas une maaille
Cop d’espee ne de nule arme
Il est descendus sous .I. carme
Pour son destrier chengler estroit
Li Orgueillous Faé le voit
Si dist Gavains tout erraument
Sire dist il mon ensient
Que je voi la .I. chevalier
Veés com chengle son destrier
Et lache son elme gemé
Sachiés bien qu’il a enpensé
A faire vous aucun outrage
Je veul entrer en vostre hommage
S’irai vostre message querre
Dont il vient et que il va querre
C’ou que chil parloit a Gavain
Es vous venir par mi .I. plain
Deuz chevaliers mout bien armés
De toutes armes achesmés
Si paroit bien a lors escus
Que forment s’erent combatus
Il ierent tuit couvert de sanc
Li uns fist seur .I. destrier blanc
Et li autres fist seur .I. sor
Chil avoit non Gomoret Mor
Mout estoit chevalier vaillant
Espinogres aloit devant
Qui seur le blanc destrier seoit
Et li noirs chevaliers le voit
Si convenoient traversant
Lors monte el boin destrier courant
S’enbrache l’escu et la lanche
D’esperonner vers eux s’avanche
Si broche pour eux encontrer
A Espinogre va jouster
Quant chil le vit vers li apoindre
Yreement va a lui rejoindre
Sans parler et sans deffianches
Fierent es escus de lors lanches
Et li escu perchent et froissent
Nule de lors lanches ne froissent
Que trop ierent roides et fors
Et chil l’empainst de tel effors
Vausist Espinogres ou non
Que il l’abati el sablon
De son poindre a son col repris
Fiert Gomeret en l’escu bis
Que par le crupe du destrier
Le fait a tere trebuchier
Puis a saisi les deux chevax
Si a guerpi les deux vassaux
Si s’en revient toute la voie
Vers les deux qui sont en lor broie
Qui l’avoient piecha veu
Le cheval blanc a conneu
Mesire Gavains li courtois
Si sot bien trestout demanois
Que che estoit son compagnon
Que chil abati el sablon
Il s’estoit prins au boin destrier
Pour aler au Noir Chevalier
Jouster qui par grant desmesure
Aloit tout seul querre aventure
Car chil ne quidoit pas qu’il fust
Nus hom qui de proeche eust
Si monte par l’estrier senestre
Et prinst sa lanche a la main destre
Puis dist a l’amie au Faé
Damoisele de grant bonté
Vous remaurrés chi sans anoy
Sous chest oumel que je chi voi
Et g’irai vostre ami aidier
Et si li rendrai son destrier
Que chel chevalier la enmaine
Je soufferrais ains mout grant paine
Que il l’en maint se Dix me gart
Sous l’ommel le laist si s’en part
Si vient a lui par mi la lande
Li noirs chevaliers li demande
Qui chele damoisele estoit
Sire fait il si vous plaisoit
Ele seroit et moi et vostre
Ja par saint Pol le boin apostre
N’i arés part avecques moi
Gavains li dist Sire par foi
Vous requier et pri par franchise
Par guerredon et par serviche
Car me rendés chel blanc destrier
Et puis chelui au chevalier
Que abatistes en le lande
Et la damoisele vous mande
Que vous li rendés par amor
Si iert courtoisie et honnor
Sire encore vous veul prier
Que me rendés l’autre destrier
Si m’ares mout grant honnor faite
L’onnor iert en tel lieu retraite
Dont vous loera maint prodome
Par trestous les cors sains de Romme
A fait donques chu chevalier
Vilains estes et pautonnier
Vous m’avés tel chose requise
Je ne feroie en nule guise
Pour vous ne pour vostre priere
Ja saurés en tel maniere
Mais tant sachiés dant chevalier
Que se vous li volés aidier
A moi vous convenra combatre
Ou je les enmenrai tout quatre
Si iert la vostre en la compagnie
Et si enmenrai vostre amie
Que je voi la dessous chel omme
Si arés sollers en la fourme
Ou les autres ont eus
Qui la gisent tous estendus
Si serés tout .IIII. asamblés
Lors dist Gavains vous me samblés
Mout feus et de mout male chiere
Si sai trés bien que par priere
Ne m’en feriés mie plus
Mais se de vous vieng au dessus
Je les quit bien trestous vengier
Laissiés ester le manechier
Fait le noir chevalier vassal
Si nous combatons paringal
Il n’i a chi que vous et moi
Li autre sont tuit en requoi
Qui la gisent tout abaubi
Or saichiés que je vous deffi
Et sans point de demouranche
Puis prent chascun escu et lanche
Si s’en vienent par tel angousse
Que l’un et l’autre la lanche froisse
Seur les escus devant les pis
Volent des lanches les esclis
Quant chascuns ot sa lanche frete
Vistement a l’espee traite
Si commenchent lor envaie
Que mout sevent de l’escremie
Et mout orent de hardement
Chil qui iert noir comme arrement
Va fort seur Monseigneur Gavain
Amont seur l’iaume tout de plain
Tout le fent dusc’au checle d’or
Li cops descent desus le cor
De l’escu a sinople taint
Et chil de tel air l’empaint
C’ambedui li cheval cheirent
Li dui chevalier sus salirent
Gavains sali sus vistement
De lui vengier ot grant talent
Seure li keurt par grant vertu
Et chelui est vers li couru
Li uns d’eux veut l’autre empirier
Mais Gavains pour le cop vengier
Que chelui li avoit donné
L’en a rendue le bonté
Il l’a feru tout abandon
A escremie de tel don
Sus seur le hiaume tout amont
Que tout li trencha en roont
Jusc’au chapeler l’a fendu
A poi qu’il ne l’a abatu
Li noirs chevaliers li passa
Tout l’escu li trenche et quassa
Si vint le cop de tel vertu
Quant fu partis de l’escu
Qu’il trencha le pan du hauberc
Et del braier li fist .I. merc
Qu’il li embati plaine paume
En mi le plache seur le hiaume
S’il l’eust droit aconseu
Le vis li eust abatu
Et Gavains ne resorti pas
Ains va vers li plus que le pas
Si fiert seur le hiaume abandon
Si li donna .I. si grant don
Amont seur le hiaume fourbi
Et chil l’a mout bien recueilli
Qui savoit toute la maistrie
Ne crient nul de chievalerie
Il fiert Gavain par outrage
Seur l’escu li fait tel damage
Que il li rompi maintenant
.C. mailles de l’auberc luisant
Et que de la cote a armer
Li fist contreval devaler
Bien plain pié jusc’a la chainture
Mout fu bele chele aventure
Quant ne li fu li cors trenchié
Tant est le branc escoulourgié
Par entre la sele et l’escu
Et Gavains a lui referu
Par grant ire seur l’escu noir
Nus hom qui le peust veoir
N’en seust prendre le meillor
Jusqu’au vespre que faut le jour
Se combatent ainsi sans faille
Ains le mieudre de la bataille
N’en sorent eslire li troy
Qui ierent a pié en l’annoy
Vinrent vers eus grant aleure
Et chil qui jusques a la chainture
L’avoit tout desarmé errant
Li dist franc chevalier vaillant
Arai je garde de chil troi
Qui vienent chi armé seur moi
Gavains li dist isnel le pas
Par foi amis nenil sans gas
Bien loiaument le vous plevis
Puis revienent tous aatis
Si fierement par tel angousse
 
Qu’anchois que l’un l’autre connoisse
Se sont il mout forment grevé
Gavains li a .I. cop donné
Amont seur son hiaume vergier
Que l’espee li a trenchié
L’iaume desi en la chervele
Et est coulés lés le mamele
Son cop estoit de grant air
A le tere le fist venir
A .II. genous mout laidement
Mais il relieve isnelement
Si est Gavains alés requerre
Onques encore en nule terre
Deuz hommes tant ne se greverent
Et li troi chevalier qui erent
Ilec prés d’euz qui esgardoient
Dient que merveille faisoient
Qui se combatent a chele heure
Li noirs chevaliers sans demeure
A dit a Monseigneur Gavain
Vassaus ne soiés pas vilain
Or soions hui mais a repos
Quant le jour iert demain esclos
Si resoions chi a pié
Veés com il est anuitié
Si menrons ches chevax o nous
Par .I. couvent que entre nous
Les ramenrons demain yci
Et la damoisele autresi
De che veul je estre chertains
Par foy che li a dit Gavains
Je n’en veul ja nis .I. mener
Se vers vous ne puis conquester
Que trop vous voi fel et gagnart
Dant chevalier il est trop tart
Fait li noirs chevaliers obscur
Mais soiés trestout asseur
Que je vendrai le matin cha
Dist Gavains che n’avenra ja
Se Dix plaist que nous departon
Desi que je sarai ou non
Se je enmerrai les chevaus
Et le puchele et les vassaus
Sans calenge et sans contredit
Et vous me prisiés mout petit
Dant chevalier che m’est avis
Pour che que je vous ai requis
De la trieve premierement
Jammais ne me trouverés lent
Ains vous trouverés mout bataille
Ja du mien qui .I. denier vaille
N’en averés en tout mon aage
Se par forche ou par vasselage
Ne poés conquerre vers moi
Et si sai mout bien et si croi
Que estes courtois et vaillant
Pour che vous requier et demant
Que me deissiés vostre non
Que che est bien drois et raison
Que je le sache et vous le mien
Et puis vous pri seur toute rien
De faire tout vostre pooir
Que je veul vostre non savoir
Et itant savoir de vostre estre
Car ainsi m’enseigna mon maistre
C’a homme ne me combatisse
Que son non ne li enquisisse
Si ne serés fox ne vilains
Par foy fait il j’ai non Gavains
Gavains voire neveu le Roi
Ainsi ai je non par ma foi
Fait Gavains vous avés bien dit
Jammais mon non se Dix m’ait
Ne chelerai a chevalier
Et chil se vaut agenoullier
Devant lui pour merchi crier
Bien porroie fait il jurer
Que jammais homme n’en creisse
Ne a mes eux ne vous veisse
C’on dit que l’Orgueilleus Faé
Vous avoit mort et decopé
Par orgueil et par estoutie
Ne tenés pas a vilenie
Franc chevalier preus et courtois
Foy que je doi Artur li Rois
Qui est mes Sires et mes amis
Vous m’avés vaincu et conquis
Veés m’espee je le vous rent
Mout sui courouchiés et dolent
De che que je ne vous connui
Bien sai que je vous ai fait anui
Si m’en repent se Dix me saut
Je vous di bien de chest assaut
Sui je tous matés et conquis
Si vous di bien che m’est avis
Que pour .C. mars ou encor plus
N’en porroie je souffrir plus
Et pour che que je sui matés
Je me rent a vous rechevés
M’espee que je le vous rent
Et Gavains li dist erraument
Biaus amis or gardés l’espee
Qu’ele est en vous bien assenee
Car hardis estes et osés
Que Hardis estes apelés
Sire j’ai non li Lais Hardis
De lait ne sui je pas fardis
L’autre soir m’esmuch de ma tere
Pour aler cherquier et enquerre
Se de vous nouveles oisse
Saichiés bien que tant vous quisisse
Que bien en oisse parler
Ains que vausisse retourner
Or me sui a vous combatu
Si m’en est mout bien avenu
Que seust plus dure l’estour
J’eusse de ma mort paour
Quant Gavains a che entendu
Que ch’iert son ami et son dru
Gete l’escu l’iaume deslache
L’un deux a l’autre acole et embrache
Si s’entrefirent mout grant joie
Je ne quit mais que nus hom oie
Deux chevaliers si bien aprins
Chascuns d’eux iert de mout grant prins
Orains estoient l’un vers l’autre estous
Or sont mout paisible et mout dous
Si vinrent ambdui erraument
A chele qui encor l’atent
Si l’ont delivrement montee
Puis si ont lor voie atournee
Entre Gavain et le Faé
Et Espinogre ont amené
Gomoret et sa damoisele
A Gavain conte la nouvele
Comment il estoit conbatu
Et com chil iert a lui rendu
Et doit venir tantost yci
Et Gavains li a dit ami
Mout m’avés grant serviche fait
Et ainsi mout boine aventure ait
Vostre cors comme je vaurroie
Ainsi chevauchent toute voie
Car il estoit mout prés de vespre
L’un d’euz conte a Gavain son estre
Tant que chascuns li a conté
Com il ont fait et ont erré
Tant ont lor parlement tenu
Qu’il sont tuit ensamble venu
A l’ostel Tristran que il quist
Qui a Gavain grant honnor fist
Et Espingres ensement
Tristrans saut sus isnelement
Maintenant qui les ot veus
Seigneur bien soiés vous venus
A fait Tristran qui mout fu sages
Et n’iert pas de trop grant aages
Ains iert chevalier bel et gent
A l’estrief sali erraument
A Gavain si le fist dessendre
.I. vallet vint sen cheval prendre
Dont mout y avoit de courtois
Les damoiseles toutes trois
Firent descendre isnelement
Assés ot ileuc qui descent
Les damoiseles ambedeuz
Et sachiés bien que avec cheuz
Estoit a pié li Lais Hardis
Qui n’iert couart ne alentis
De servir Monseigneur Gavain
Et Gavains le prent par le main
Si se m’amie el palais amont
Si com franchise le semont
Si s’est du servir mout penés
Le nuit eurent a grant plentés
Pain et vin et oisiax rostis
Plouviers et faisans et perdris
Et grans chisnes a lor mengier
Puis si les mena el vergier
Tristran qui bien garni estoit
De quainque prodom covenoit
Lors a la nuit tele honor faite
Ne l’aroie a pieche retraite
L’onnor qu’il a fait a chascun
Bien les cocha par un et un
Pour dormir et pour reposer
Qui estoient las de l’errer
Et traveilliés et confondus
Il paroit bien a lor escus
Qu’il orent souffert grant estor
Grant joie ot Tristran de l’ounor
Qui de l’estre Gavain aconte
Vers le Lai Hardi se racoste
Qui mout estoit gentil et frans
Sire fait il je croi et pans
Que vous estes mout traveilliés
Bien sai que vous estes plaiés
Et blechiés sous la coiffe blanche
Et j’ai une fille mout franche
Qui tel entrait vous y metra
Que la dolour vous en traira
Ja puis angousse n’i arois
Que il yert mis une fois
Sempres iert la plaie garie
Li noirs chevaliers l’en merchie
Qui de la promesse a grant joie
Et Mesire Gavains li proie
Qu’il li ait s’il onques puet
Et Tristran maintenant s’esmuet
En la chambre ou la fille estoit
Si li prie s’ele savoit
Bien aidier a chest chevalier
Qu’il li ait sans demourer
Et chele qui n’est pas vilaine
Li dist la plaie n’iert pas saine
Se Dix m’ait hui en chest jour
Une herbe de mout grant valour
Qui estoit toscane apelee
Sor la plaie li a bendee
Puis s’endormi a grant loisir
Tant que Dix fist le jour venir
Qu’il se lievent et atournerent
El chastel ambdui sejournerent
Trestout le jour jusc’au demain
Puis parla Monseigneur Gavain
Comme par courouch et par ire
A l’oste commencha a dire
Biaus dous ostes frans deboinaires
Vous savés bien tout nostre afaires
Ainsi com nous avons erré
Or veul que il nous soit moustré
Et l’escrin et le brach ensanle
Que me moustrates che me sanle
La nuit que primes chaiens jui
Et Tristran regarda chelui
Qui Orgueillous Faé a non
Sire il vous dist droit et raison
Che respont l’Orgueilleus Faé
Tant m’a par armes demené
Qu’il m’estuet en sa seignourie
Contenir et moi et m’amie
Mais il y a tel couvenant
Se je pooie vivre tant
Que le cors que je vous baillai
Tout sain et sauf le vous rendrai
Tel couvenant ai a Gavain
Si li rendrai et fort et sain
Si que j’arai sa druerie
Et me rendra quite m’amie
Mais que je li ferai itant
Le vallet trestout cler veant
Li rendrai et tout sain sans faille
Couvenant l’oi en la bataille
Et Gavains le m’a creanté
Chertes fait il ch’est verité
Que issi le vous creantai
N’en soiés ja point en esmai
Sire dist l’Orgueillous Faé
Isnelement soit aporté
Le cors et le bras et l’escrin
Et Tristran se mist au chemin
Si li aporte maintenant
L’escrin li avoit mis devant
Et le Faé l’a desceusu
Et l’escrin estoit ja venu
Ou li bras iert au chevalier
Et li Faés sans delaier
A le brach de l’escrin osté
Et el cors arriere posé
Puis fu plus sains que nul poisson
Et chil s’en orent fait le don
A l’Orgueillous qui iert faé
Li chevaliers lor a conté
Comme chil el bos le trouva
Et comment a lui se mella
Et comment il se combati
Com il morut ains ne senti
Com il a esté en repos
Dedens le cuir de chief enclose
Mout s’en est Gavains merveillié
De la merveille s’est seignié
Et le Lait Hardi ensement
Et Tristran et toute sa gent
Qui ont la merveille veue
De demander forment s’argue
Qu’il li donna tel destinee
Et chil dist el me fu donnee
En chele nuit que je fui né
Et Gavains a lors demandé
Le non du chevalier ochis
Sire fait il je vous plevis
Que le Courtois de Huberlant
M’apeloient mi connissant
Grant joie font il tout ensamble
Toute la tour de joie tramble
Et demainent mout grant deduit
Tout le jour dessi a la nuit
A la nuit se sont tuit couchié
Au matin quant fu esclairié
Il metent les frains et les seles
Si montent les deux damoiseles
L’une iert amie Gomoré
Et l’autre a l’Orgueillous Faé
Puis se mirent tuit a la voie
Tristran lor hostes les convoie
Desi que outre le vauchel
Et dist Sire s’il vous iert bel
G’iroie a court ensamble o vous
Et si merrai avoecques vous
Ma fille qui est bele et gente
Ou nature a mise s’entente
Et je l’ai ja bien atournee
Ves la seur la mule montee
Gauwain l’entent s’en a grant joie
Sire fait il se Dix me voie
Mout avés or dit que courtois
Or sont les damoiseles trois
Et li chevalier .VII. par conte
Si com l’estore nous reconte
Tant ont erré et chevauchié
Qu’endroit midi ont aprochié
Le chastel Cadroain le Rous
Qui mout est fiers et courajous
Ileuc estoient a sejour
Ychil qui furent en l’estour
O Cadrés quant rescoust s’amie
Qui ot secours et boine aie
Si fu Raguidel de l’Angarde
Chelui la puchele regarde
Chele qui vea a Gavain
Le vin le char le pain
Et tuit chil l’orent conneu
Tantost com Gavains fu venu
Qui l’atendoient au chastel
Savoir poés mout li fu bel
Tout son conte lor a conté
Si com je vous ai reconté
Comment il a puis esploitié
Et comment il se combatié
Encontre l’Orgueilleus Faé
Et Espinogre a Gomoré
Comment lor acorde fu faite
Chascun d’eux forment s’en rehaite
Et mout li firent grant honnor
Et dit que pour la soie amor
Sejourneront .I. jour tout plain
Seigneur che lor a dit Gavain
Vous dites bien vostre merchi
Mais ains que soit demain midi
Vaurrai je estre a Carlion
Entre mi et mi compagnon
Si merrai avec mes pucheles
Qui mout sont courtoises et beles
Sire Sire che dist Cadrés
Je vous herbegerai hui més
En chest chastel a Cadroain
Quant je vous verrés le jour demain
S’irons en vostre compagnie
Dist Gavains je n’en refus mie
Tel compagnie ne tel route
Je vous aconterai ja toute
La joie qu’il ont demenee
Quel lus y ot et quel peuree
Quel pain ne quel poisson de mer
Quels vins il burent au souper
La nuit furent a grant deduit
Au matin sont monté trestuit
Sor leur chevax delivrement
Cadroains fait monter sa gent
.LXIIII. chevaliers
Trestous armés seur leur destriers
Pour l’amor Monseigneur Gavain
Li chevalier oirrent a plain
Au chevauchier ont entendu
Tant qu’en la forest sont venu
Yloec la u l’Orgueillous Faez
Ot au vallet les iex crevés
Tant enquist Gavains des nouveles
Qu’il a trouvees les pucheles
Qu’il li conterent du Faé
Si com li contes a conté
En la forest iert lor manoir
Chascune iert le cuer tristre et noir
Du duel de Monseigneur Gavain
Tuit quidoient estre chertain
Qu’il estoit mors et decopés
Et Gavains lor a demandés
Du vallet comment il aloit
Sire fait il ainsi voit
Com chil qui ne voit chiel ne tere
Alés le moy dist Gavain querre
Si l’amenés delivrement
Et chele y ala erraument
Ele a le vallet amené
Qui mout estoit bien atorné
Il estoit sages et courtois
S’il fust fix de conte ou de rois
Et bel de cors et avenant
Et l’Orgueillous Faé errant
Li traist la main aval sa chiere
Si li a rendu sa lumiere
Si vit plus cler que cherf ne dain
Si le connut tout erraument
Tout maintenant qu’il l’ot veu
Sire bien soiés vous venu
Fait li vallés mout douchement
Je quidoie se Dix m’ament
Que vous fussiés tout detrenchié
Mais bien sai que fustes changié
A chel chevalier la devant
Ch’est le Courtois de Huberlant
Qui onques de court ne vaut estre
Li vallés conte tout son estre
Si com li livres l’a raconté
Madame Dix l’a regardé
Qu’il li a rendu sa veue
Ne fist iloec plus atendue
Anchois s’en va plus n’i demeure
Mesire Gavains ens en l’eure
Fist les trois pucheles monter
Et si n’i vaut plus oublier
Le vallet qui ot non Martin
S’il fait monter seur .I. ronchin
 Puis chevauchent a grant esploit
A Carlion vinrent tout droit
A l’eure que on doit souper
On ot ja fait l’iaue corner
Et si assirent au mengier
Atant es vous un chevalier
Qui lor avoit dit ches nouveles
Au Roy furent boines et teres
Et a trestous chix de la court
Tous li pueples contre li court
Li Rois i keurt et la Royne
N’i ot puchele ne meschine
Qui de li n’ait joie mout grant
Et li Rois l’a baisié errant
Qui de sa venue a grant joie
Et chil li conte toute voie
Comment il avoit puis erré
Tout li a le conte conté
Comment il li iert avenu
Il sont tuit a pié descendu
Il n’i ot conte ne baron
Ne roy ne prinche en la meson
Qui ne se paine de servir
Chiex qu’o Gavain virent venir
Li Rois a forment honnerés
Les chevaliers a apelés
Et la Royne d’autre part
Et la damoisele s’en part
Si les en a toutes menees
En ses chambres encourtinees
Si lor a fait mout grant honnor
Pour la franchise et pour l’onnor
Qu’ele a a Monseigneur Gavain
Chele nuit jusqu’a l’endemain
Furent trestuit paisible et quoi
Au matin se leva le Roy
Si est venus devant la sale
Et Gavains les degrés avale
Si s’est jouste li acosté
Si li a dit et reconté
Com il a de grant paine traite
Ychele que il prinst en l’atre
Puis li dist com il conquesta
Chele qu’Escanor amena
Tout li conte des aventures
Qu’il ot trouvé pesmes et dures
Puis si li prent a aconter
Qu’il li estuent guerredonner
L’onnor que trestuit li ont faite
Qu’il li a conté et retraite
Li Rois en fu liés a merveille
As bontés rendre ne someille
Ains li plaist mout et vient a gré
Quant il a fait honneur et bonté
Et li dist a vostre plaisir
Me veul je du tout contenir
Mais je veul ains estre vengié
De chil qui tant m’a courouchié
Qui as gens se vantoit a tort
Qui vous avoit ochis et mort
De che veul jou venjanche avoir
Gavains respont pour nul avoir
Sire ne volroie je mie
Qu’il vinrent en ma compagnie
Si oy a eux tel couvenant
Dont il ont fait tuit mon creant
Pour quoi il sont tout asseur
Par fois che dist le Roy Artur
Il iert ainsi com vous voldrois
Sire fait Gavains vous rendrois
As deux chevaliers lor amies
Onques puis le tens Geremies
Ne veist deux plus courtois
La soie Espinogre dourrois
S’espousera Cadrés s’amie
Et Raguidel n’i faurra mie
A la soie qui n’i ot mestier
Qui me donna .I. boin destrier
Li Rois li a dit et conté
Du Roy de le Rouge Chité
Com il estoit a lui rendu
Com il fu de court revenu
Qui onques mais n’i ot esté
Et comment il li a juré
Que il tenra chiere s’amie
Et Monseigneur Gavains li prie
Des deuz vallés c’ot amenés
Qu’erraument soient adoubés
Et chevaliers soient nouviaus
Et lor doinst teres et chastiaus
Trestuit ont lor oirre aprestee
Si com il dit l’ont devisee
Si ont les mariages fait
Sans contredit et sans grant plait
Au moustier les mainent errant
Le pourchession fu mout grant
Si comme a tel cose deut estre
L’Eveques Reniés de Cestre
Les a maintenant espousees
As chevaliers qui creantees
Eurent par le conseil du Roi
Le moustier ne fu mie quoi
Anchois y ot joie mout grant
Que font li petit et li grant
Chil jougleor de plusex teres
Chantent et sonnent lors vieles
Muses harpes et organons
Tympanes et salterions
Gigues estives et fleteaus
Et buisines et chalemeaus
Chascuns d’eux grant joie demaine
De joie est toute la court plaine
Car mout iert li Rois Artus riches
Onques ne fu mauvais ne niches
Et mout lor fist trés bien aidier
De quant que il lor fu mestier
Et jut chascuns a s’espousee
Tant comme il li plaist et agree
Au matin quant il fu grant jour
Furent paié li jougleour
Li un orent biaus palefrois
Et li autre au grant harnois
Tous furent paié a lors grés
Li plus povres a grant plentés
Quant li jougleour sont paié
En lor pais sont repairié
Et la court estoit departie
Chascun chevalier o s’amie
S’en va a joie et a baudour
Trestuit li grant et li meillour
S’en repairent en lor contrees
Quant les noches furent finees
Si s’asieent tuit bas et haut
Car li Atres Perilleus faut
Puis que Gavains a tant erré
Qu’il est a court a sauveté
Si fine ichi nostre roumans
Que Dix nous doinst vivre .C. ans
En grant joie et en grant honnor
Et il nous doinst joie et baudour
.Explicit.