Thresor de la langue françoise/Train
Train, m. C'est la suite, famille & bernage d'vn grand seigneur, Comitatus principis. Train en Venerie est vn chemin fait aposté pour faire passer vne beste parmy. Selon ce on dit, faire train à vne beste, qui est couchant quelques rameaux d'vn costé & d'autre du chemin, à fin qu'elle s'arroute par le milieu. Train aussi se prent pour les routes & passées d'vne beste, au 3 liur. d'Amad. Neantmoins il se mit en si grand deuoir d'entendre qu'il estoit deuenu, qu'il cogneut au train de la lyonne qu'elle l'auoit emporté. Train en outre se pred pour le derriere de la croupe d'vne beste. Selon ce on dit, vne beste auoir le train estroict ou large. Et Train signifie l'allure d'vn cheual. mule, ou mulet, Selon ce on dit, vn cheual auoir ou aller grand train, c'est à dire, grandes allures. Train aussi est la claye ou instrument de gros bois en quarré, trayné à terre, sur lequel on trayne par la ville vne piece de vin, ou vne bale de marchandise, ou vn malfaicteur condamné au gibet. Selon ce on dit trayner, c'est tirer par terre, ce que l'Espagnol dit en mesme signification Arrastrar, vsant du simple Rastro pour train. On le dit aussi Trayneau.