Thresor de la langue françoise/Tabellion
TA
Abellion, m. acut. Est vn mot vsurpé du Latin Tabellio, par la mesme forme que le François dit de Scipio, Cicero, Cato, Scipion, Ciceron, Caton, & vient de Tabella, diminutif de Tabula, qui estoit enuers les anciens Romains vne tablete de bois quarrée plus longue, plastrée de cire, en laquelle auec vn poinçon ou broche de fer ils grauoyent leurs actes d’entre priuées personnes, mesme leurs lettres missiues ; lequel poinçon ils appeloyent style. (car quant aux actes & monuments publiques, ils estoyent en plus commun vsage, grauez ou en des grands & larges tableaux de fonte ou de cuyure auec le burin & l’eauë fort, ou de marbre & autre pierre dure, comme l’est la Tyburtine auec le ciseau,) Or n’y auoit il anciennemet entre les Romains des personnes establies par adueu & auctorité souueraine, pour rediger par style esdites tabletes cirées, les conuenances & contracts qui aduenoyent entre les priuées personnes, fussent ils d’entre viuants ou de derniere volonté. Mais estoyent redigez entre ceux qui contractoyent, presques en la maniere des seellez iadis tant vsitez entre les gentils-hommes François, & desquels les Archifs des Eueschez du pais de Nort sont pleins, & depuis declinant l’Empire ils furent establis en trop plus de grandeur d’office qu’il n’est en France, ou Tabellions sont dits ceux qui passent és villes de moindre importance, & és bourgs & villages, les actes d’entre personnes priuées, nous seruants en cela du diminutif Tabella, dont ce vocable est tiré, ne daignants du nom de Notaires, que ceux qui sont establis és villes de respect.
Tabellionage, m. penac. Est le greffe, bureau ou contour, où selon les Edits du Roy, tels actes sont enregistrez & comme insinuez.
Tabellioner, act. acut. Est rediger par vn tabellion en forme d’escriture authentique les actes que dessus.