Thresor de la langue françoise/Sceptre
Sceptre, vient du Grec σκήπτρον, comme fait auβi le Latin, Sceptrum, & signifie proprement vne iaueline ou pertuisane dont les Roys vsoyet anciennement & peu auant le regne de Romulus pour diademe & marque de leur royauté, comme recite Iustin au 43. liur. de son abregé : & ce d’autant que dés la plus grande ancienneté les premiers hommes Payens adoroyent & tenoyent à dieux immortels telles armes, dont audit temps elles estoyent apposées tout ioignant des idoles, qu’ils tenoyent à dieux. Auβi eut pour ce ledit Romulus le nom de Quirinus mot Sabin, qui signifie hastalis ou hastatus despuis sa canonization entre les dieux, cōme dit Ciceron au 1. li. de legib. & de là vient le mot de Subhastatio extraict du Latin Subhastatio, pour l’expositiō en vente des biens d’aucū au plus offrāt & dernier encherisseur faite par authorité & cōmission du Prince ou officier d’iceluy, d’autāt qu’en tels inuentaires la iaueline ou pertuisane estoit esleuée pour marque de ladite authorité & commission, par laquelle ladite vente se faisoit. Mais auiourd'huy les sceptres des Rois ne sont ainsi faits, ains sont plus courts & semez de diuers fleurons, celuy de France d'vne fleur de Lys, & autres d'autres choses. Quoy que soit les archers des gardes des Rois, Princes, Vicerois & lieutenans de Roy, Seneschaux, Preuosts de l'hostel & autres qui ont droict de les auoir, portans deuant eux la hallebarde, ou pertuisane, comme en Espagne, ne furent anciennement introduicts que pour indice & marque de la maiesté, ou authorité publique de ceux deuant lesquels ils les portoyent, combien que apres ils ayent esté appelez, comme sont encor, Gardes.