Thresor de la langue françoise/Pandore
pandore, Nom propre de femme, Pandora. Apres que Promethée eut desrobbé le feu du ciel, Iupiter pour se venger des hommes. donna charge à Vulcan, qu'il fist de terre vne statuë de femme la plus belle qu'il pourroit, & qu'il l'animast, luy donnant ame & vie : ce qui fut faict. Apres qu'elle fut animée, par commandement de Iupiter vn chacun des Dieux luy donna ce qu'il auoit de plus excellent : comme Venus la beauté, Pallas la sagesse, Mercure l'eloquence, & les autres Dieux de mesmes. Or en ce temps là les hommes viuoient sans peine & sans souci : d'autant que la terre, sans estre labourée, leur produisoit toutes choses necessaires à viure. Iamais n'estoient malades : iamais n'enuieillissoient. Mais Iupiter mit à Pandore (ainsi se nommoit cette femme) vn vase en main, dans lequel estoient encloses les maladies, la vieillesse, les soucis, & telles autres malheuretez : puis l'enuoya vers vn frere de Promethée, qui se nommoit Epimethée, homme de peu de sens : lequel (combien que son frere l'auoit bien aduerti de ne receuoir aucun present
qui vint de Iupiter) toutesfois se laissa par elle abuser, & la receut. Estant receuë, elle ouurit son vase, & remplit tout le monde des drogues que t'ay cy dessus nommées. La raison de son nom est telle. Pan en Grec signifie Tout : & Doron est à dire vn don ou present. Elle fut donc nommée Pandore, parce que chacun des Dieux luy fit vn don ou present.
Pandorin, Qui est de Pandore, Pandorinus. Le vase Pandorin. Ronsard.