Thresor de la langue françoise/Dame
Dame, f. penac. Signifie proprement celle qui a droit autorité & commandement sur quelque chose, Domina, Selon ce on dit Dame de tel lieu, la Dame du logis, & le mari appelle sa femme la Dame de nos biens, ou la Dame de ceans, & ne vient pas pourtant de δάμαρ ou δάμαρζ,mots Grecs signifiants Espouse, comme aucuns pensent. ains de ce Latin Domina, duquel l’Italien fait Donna par syncope de la voyele i, & nous par plus grand reiect de lettres, & changement des voyeles premiere & derniere, Dame, & l’Espagnol plus corrompuément, Duenna, est aussi vsurpé pour vn simple titre d’honneur, sans importance de tel droict & authorité que dit est, quand par courtoisie on le donne à vne femme de moyen estat, parlant à elle ou d’elle, comme, Dame Iane irez vous-là ? Dame Marie a dit cela, &c. Car à celles de grand estat & haut parage, on dit Madame, aussi par simple titre d’honneur, l’Italien en vse sans ces differents respects, disant Donna Camilla, & Madonna Camilla, parlant à vne femme de moyenne qualité, & Madama quand il parle aux grandes Dames de titre, empruntant en cela ledit mot François, car vsant du sien il dira Signora, Mais l’Espagnol n’vse de ce mot Donna, si n’est par attribution de respect & grandeur à celle à qui il le donne. Le masculin Dam (qu’aucuns escriuent Damp, mais sans raison) est pareillement vsité pour simple titre d’honneur, comme Dam cheuallier. Ce que l’Italien & l’Espagnol font aussi, disans Dom Pietro, Dom Sancho, Mais ils ne l’attribuent si n’est à grands seigneurs de titre, à Princes & à Rois, Dom Alfonso Deste, Dom Iuan d’Austria, Dom Carlos Principe de Castilla, Dom Phelippe Rey de Castilla. Les Religieux de S. Benoist & tels Ordres s’en intitulent en Italie, Dom Massimo, & les marchands & banquiers de grand fonds & capital, mais ceux-ci vsent du mot Latin Dominus.
Dame ou maistresse, Domina.
Grandes dames, de grand renom, Principes fœminæ.
Mal gracieux aux dames, Inuenustus, B.
Estre dame de soy, en vsant de ses droits, Esse suæ tutelæ, Bud.