Thresor de la langue françoise/Casaque
Casaque, f. penacut. Est vne maniere de saye, qui a l'espauliere de la manche froncée, large & beant, & n'a nul manchon ou mancheron, qui est l'ancienne facon d'icelle casaque, habillement vsité és compagnies d'hommes d'armes & archers & costiliers d'iceux, & est bigarrée par demy losanges, ou de diuerses estoffes de deux ou plusieurs couleurs, ou d'vne mesme estoffe de plusieurs couleurs, seruant de sur-vestement à l'homme armé, pour cognoissance de la compagnie dont il est. Lesquelles couleurs estoient & sont la liurée, cognoissance, ou enseigne, qu'on disoit anciennement, des chefs & capitaines de telles compagnies, pour s'entre-discerner les vnes des autres en vne armée ou bataille, se rallier plus aiséement, & veoir par le chef & general de l'armée, quels estoient les bien ou mal-faisans en vne iournée, assignée, ou forcée, & en vne rencontre. Ces casaques, comme la proüesse des anciens hommes d'armes de France, a prins mutation en pis en leurs successeurs, ont changé aussi de facon pour la pluspart pour le regard des manches, qu'on fait estroites, longues & pendantes, retroussées par derriere en la ceinture, en cornetes, manches ou queües de chapperons. Les hocquetons retiennent l'ancienne facon des casaques. De ce mot Casaque est Casaquin diminutif, qui est, vn habillement non pas d'ordonnances, mais commun, vil & plebeie.