Thresor de la langue françoise/Carolus
Carolus, m. acut. Est vn mot pur Latin, mais prononcé aigu par accent Fraçois, & signifie Karles. Il se prend pour vne espece de monnoye blanche, Françoise, valant dix deniers, en laquelle au commecement fut coingnée la lettre K, premiere dudit mot Karles (qui est autant que Charles) nom du Roy qui la mit en auant. Nicole Gilles en la vie de Charles VIII. Et s’en alla ledit Roy Charles visiter son païs de Picardie, où il fut honorablement receu, & fit faire monnoye d’argent nouuelle de dix deniers la piece, qu’on appelle Karolus. Le premier coing de laquelle fut la croix couronnée en ses quatre branches auec vne fleur de Lys, & ce letrier Pro pomœrio (s’il le faut ainsi dire) d’icelle monnoye, Sit nomen Domini benedictum. Et en la pile, ladite lettre K, courronnée & costoyée de deux fleurs de Lys, auec ce letrier, Karolus Francoru Rex. Es regnes successifs de Louys XII. & François I. demeurant ledit nom de Karolus, comme fait encore à ladite espece de monnoye, & lesdits letriers d’icelle, la croix en a esté alterée au coing dudit Roy Louys, en ce que la premiere lettre de son nom a occupé les anglets, droit à haut, & bas à senestre d’icelle croix, & en la pile au lieu desdites deux fleurs de Lys, ont succedé deux lettres. Et au coing dudit Roy François, la croix en a esté alterée en ce qu’elle a esté recroisetée, & sans courone, qui sont toutes mesprinses, ou plustost ignorances & trop hardies licences des maistres des monnoyes, ausquels n’est licite varier le coing premierement imposé par le Prince souuerain à la nouuelle monnoye, sans edit & ordonnance de luy, consideré que ledit coing est la forme publique de la monnoye, dependant de la seule authorité du Prince. En cas de trop moindre importance, n’est-il permis à aucun faire mutation de nom, sans lettres de son souuerain. Auquel cas en ay veu prendre lettres en la Chancelerie de France, nonobstant le rescrit des Empereurs Diocletian & Maximian, Careolus, sub. nummus.