Thresor de la langue françoise/Caque
Caque, m. penac. Est vne espece de futaille qui contient le quart d’vn muid, & est à vin, à eau, à poisson salé, à poix noire, à poix resine, & autres choses comme on s’en veut seruir, Cadus, duquel on estime ce mot François estre venu. Mais le Cadus des Latins estoit fait à la façon d’vne pomme de pin, & de terre cuitte, comme on peut comprendre du li. 27. cha. 4. & du 32. liu. en Pline, selon la description duquel le Cadus estoit de la façon de la Tinaja des Espagnols, ou de la Vettina de Rome. Aucuns ont pensé que ce mot Caque vient de Cacabus, d’autant paraduenture que l’Allemand dit Kakhel pour Cacabus. Mais les significations des deux mots Cacabus & Caque n’ont rien de commun. La mesure & iauge dudit Caque est de dixhuit septiers par l’ordonnance des iauges.