Thresor de la langue françoise/Barres
Barres, en pluriel se prend ores pour exceptions & defenses, par lesquelles on s’eschappe de la demande d’aucun, Exceptio, Selon ce les notaires au pays de Normandie vsoient anciennement de ceste clause és contracts qu’ils passoient : Renocerent chacun pour soy à toutes actions, exceptions, barres & defenses, & à toutes autres choses pourquoy ce qu’a esté passé puisse estre empesché ne destourbé par quelque voye que ce soit, Selon ce, aussi on dit, I’ay barres sur vous, pour, I’ay aduentage & prinse sur vous. tibi praeualeo, Si cela toutes fois ne vient du ieu de Barres, lequel se iouë par deux bandes l’vne front à front de l’autre en plaine campagne, saillans de leurs rangs les vns sur les autres file à file, pour tascher à se prendre prisonniers, là où le premier qui attaque l’escarmouche est sous les barres de celuy de la bande opposite qui sort sur luy, & cestuy sous les barres de celuy qui de l’autre part saut en campagne sur luy, & ainsi les vns sur les autres, tant que les deux trouppes soient entierement meslées, Palaestra, Ayant paraduanture tel ieu prins tel nom par ce que telles bandes estoient retenues de barrieres qu’on leur ouuroit, quand il estoit proclamé qu’on laissast aller les vaillans ioüeurs, que les Latins appellent Carceres, Barres se prend aussi pour l’endroit de la maschoire du cheual où les Escuyers d’escuyrie esperonniers prennent leur mire pour la iuste penture du mors du cheual.
Iouër aux barres, Vacare palaestrae.
Ioueur de barres, Palaestrita.
En iouëur de barres, Palestricè.
L’art de iouër aux barres, Ars palaestrica.
Barrez, plur. num. m. acut. Estoient dits les Carmes, à cause des manteaux billebarrez de noir & de blanc qu’ils porterent iusques à l’an mil deux cens quatre vingts cinq, lesquels ils laisserent, regnant philippe le Hardy, comme dit Nicole Gilles en la vie d’iceluy.