Thresor de la langue françoise/Banniere
Banniere, ou Baniere, Vexillum, Signum. Aucuns estiment ce mot venir de Bann Allemāt, qui vaut autāt que feld, & signifie champ & consequemment fief, ou champ fieffé, & l'estiment d'autant que nul ne portoit bannieres anciennement sinon les Banneretz, Barons, Contes, Marquis, Ducs, Princes, Rois, & Connestables, Admiraux, maistres des Arbalestriers, & Mareschaux, iaçoit qu'ils ne fussent Barons ou Banneretz, & ce par dignité de leurs offices, & ne portoient que pennons, comme si nul gentil-homme sans fief de tiltre n'eust anciennement droit d'auoir bannieres. Mais il est plus prochain voisin de Baner ou Banner aussi mot Allemant, signifiant Vexillum, Enseigne, que de Bann. Außi de Baner à Baniere, le passage en est plus court & plus aisé. Anciennement l'vsage des bannieres estoit des gents de cheual : mais depuis que ces mots de Cornette & Guidon sont suruenus, s'estant aneanty le mot de Bannieres parmy les gens de cheual, il a esté rauallé aux gens de pied, ce que monstre ce mot Bande, prins pour vne compagnie de gens de pied, qui vient de Banniere, parce que chaque compagnie de gens de pied a sa Banniere particuliere. Außi tant le Picard, que le Prouençal, & le Languedoc, pour Banniere disent Bandiere. Ainsi que fait l'Espagnol aussi, disant Vandera, pour ce mesmes. Duquel le diminutif Banderole est encores vsité entre les cheuaux legers, & és ornemens des galeres, galions & nauires. Mais lesdits gens de pied n'vsent à present que de ce mot Enseigne, tant pour Banniere que pour Bande, c'est à dire, tant pour signifier le drappeau, que pour signifier la compagnie, estant demeuré ledit mot de Baniere en vsage aux Eglises & processions, voyez Pennon.
Aller contre ou sur aucuns à Bannieres desployées, est les aller combatre, leur liurer bataille, parce que se presentant l'occasion de la bataille, toutes les Banieres sont desployées & mises au vent, pour l'ordonnance des compagnies, és bataillons & esquadrons, & du combat mesmes. Nicole Gilles en la vie de Philippe de Valois. Mais quand ceux de la ville sceurent sa venuë, ils s'armerent & allerent au marché. Et lors le Conte & Messire Robert de Fiennes vindrent contre eux à Bannieres desployées audit marché, & s'entre-batirent tres-bien, & y eut mout de gens tuez.
Banniere de France, est celle qui est portée deuant le Roy és cheuauchées militaires, armées & batailles, Francicum Liliorum vexillum. Laquelle est semée de fleurs de Lys sans nombre, ainsi que l'ancien Escu des armes de France le fut auparauant l'an 1380. que Charles sixiéme les reduit au nombre de trois. Nicole Gilles en la Chronique dudit Roy, semblablement voulut & ordonna, que là où ses predecesseurs Rois auoient porté en leurs armes vn Escu d'azur, tout semé de fleurs de Lys sans nombre, deslors en auant n'y eut que trois fleurs de Lys seulement.