Thresor de la langue françoise/Aulne quarree
Aulne quarree, ou aulne en quarré, est le mesurage de l'aulne en tous sens, c'est à dire en long, & en large, & non en long seulement, Vlna quaquauersus ducta, vel prorsum deorsumque directa. De laquelle façon de mesurage sont aulnées les tapisseries de haute lice. Bailler à aucun tout du long de l'aulne, est vne maniere prouerbiale de parler, vsitée par le François, semblable à cet autre de mesme liurée, Ie luy ay baillé toutes ses façons, quand il veut dire qu'il n'a laissé rien en derriere pour bien trauailler aucun. Car ces manieres de parler se prennent tousiours en mauuaise part, & par indignation. Comme si l'vn de deux plaidants menaçoit sa partie de la bien chicaner, & promener en procez, luy diroit, Ie vous en bailleray tout le long de l'aulne : ou, Ie vous bailleray toutes vos façons. Nihil molestiæ tædiique reliquum faciam, ita te miserè litigando pessundabo. La premiere maniere de parler est prinse de l'aulnage, lequel est tout à bout, quand l'aulne entiere y est & la seconde, du labourage des terres & vignes, qui consiste en trois ou quatre façons, lesquelles leur estans entierement baillées, elles sont tout à bout cultiuées.