Thresor de la langue françoise/Au
AV
Au est tantost preposition locale portant energie d’article masculin, & partant n’est mise si n’est auec les dictions masculines, & encores non auec toutes, ains auec celles seules qui commencent par consonante & sont de qualité appellatiue, In, comme, Il est au sommet, In vertice est, Et qu’elle ait ladite energie d’article masculin, & qu’elle recerche les dictions masculines & d’icelles les començans par consonante, il appert par ce qu’on dit, Le vin est au pressouër, Le vin est en la caue, la boucle est au bassinet, la boucle est en la capeline, Le seau est au plancher, Le seau est en l’euuier. Car l’article se monstre apparemment auec la preposition, deuant les dictions auec lesquelles Au, ne peut compatir, & tantost se prend pour Ad, comme Au mieux que puisse faire, Au pis aller, peindre au vif, & semblables.