Thresor de la langue françoise/Ars
Ars, m. En singulier est particip. qui est fait du verbe Ardre ou ardoir, & est pur Latin de Arsus, par apocope, & signifie bruslé, comme, Le palais est tout Ars, Palatium igne absumptum est. Et en pluriel, les Ars signifie les espaules d’vne beste cheualine, Armi. Ainsi dit-on, Il a saigné le cheual des Ars, Ex armis sanguinem equo eduxit, & pourroit-on dire qu’en cette signification, Il vient dudit pluriel Latin Armi, que le François prend aussi en pluriel, auec sa lettre cataristique d’iceluy nombre qui est, S. Ars aussi est verbe, venant du Latin Ardeo, & est la seconde personne du present de l’indicatif, qui est actif, comme, Tu ars ma robbe, tu brusles ma robbe. Et de signification passiue, comme, Ie ars d’amour, Amore ardeo.
Arse, f. penac. Bruslée, Quae igne conflagrauit, Combusta.
Arsacide, m. penacut. Nicole Gilles en la vie de Philippe Dieu donné : En l’an mil cent quatre vingts & treze, apres ladite execution faite par le Roy, il s’en alla à Pontoise, & là luy vindrent nouuelles que le Roy Richard, qui estoit encores outre mer, auoit enuoyé vn Arsacide par deçà pour le tuer. Il entend vn assassin. Car autrement Arsacide, est vn surnom dont tous les Rois de Parthie, en faueur & memoire d’Arsaces Roy Parthien, furent appelez, ainsi que Sylues, les Rois d’Albe, & Ptolomées, les Rois d’Egypte. Et que Arsacide soit prins en mauuaise part, la raison peut estre prinse de ce, que comme Strabon recite és liures 11. 12. & 15. de sa Cosmographie, ledit Arsaces Scythien de nation, Roy des Daes appelez Parnes, nation viuant de la picorée, enuahist par sur-saut le pays de Parthe, & partie de la Bactriane, emblant sur ses voisins, & viuant de rapt & de grip, hommes de mœurs & conditions Scythiennes & Barbares. Et que pour cette cause au pays d’outre-mer, les matois sont appelez Arsacides, à cause de la vie rapineuse & prompte à toute damnable entre-prinse qu’ils menent, & comme estans meurtriers & assassins à loüage. Qui voudroit tirer Assassin de Arsacide, ils pourroit dire que le changement de r, en s, est frequent, (car on trouue Papirius & Papisius, & ; on oit dire ma mese, pour ma mere, & bairer pour baiser, ) mais il le faudroit escrire, par c. Assacin. Ledit Nicole Gilles en la vie du Roy Saint Loys, se deffait dudit mot Arsacide, en ces termes. L’an mil deux cents trente six, le Roy des Arsacides, nommé le Vau des montagnes, qui habitoit és montagnes d’Antioche & Damas, qui estoit Payen d’outre-mer, enuoya en France aucuns de ses Arsacides, qui sont gents nourris & introduits pour tuer ceux que leur Roy leur commande, ayants charge de tuer le Roy Saint Loys. Car autrement Arsacide, comme Iosephe le marque au chap. 3. du 18. liur. des Antiquitez, est le sur-nom de ceux qui sont du sang Royal, au pays de Parthie. Et que les Arsacides ayent esté de leur origine de telle vie sanguinaire que dit est, Iustin historien au 41. liure le monstre, en ce qu’il dit les Parthes auoir esté les bannis de Scythie, Et qu’en langage Scythique, Parthe signifie Banny.