Ronsard - Œuvres, Buon, 1587/Quand tu n’aurois autre
Vand tu n’aurois autre grace
Ny autre preſent des cieux,
Sinon ſortir de la race
De tant de Rois tes ayeux,
I’aurois encor trop de lieux
Pour te baſtir vne gloire.
Car ſi ie veux raconter
De ton grand Buillon l’hiſtoire,
Qui peut les Turcs ſurmonter
Par vne heureuſe victoire :
Ou la fameuſe memoire
De ſes freres, ou les Rois
Tes ayeux, dont la Sicile
A leur obeyr docile
Eſcouta les fainctes lois :
Leur nom qui le temps ſurmonte,
Te feroit ſeul immortel :
Mais ta vertueuſe honte
Rougiroit d’vn honneur tel.
Ie te veux faire vn autel,
Où maugré l’an qui tout mange,
Ton propre loz ie peindray,
D’vne encre qui ne ſe change :
Et là ce vœu ie prendray,
Qui au pelerin eſtrange
Racontera ta louange,
Et la vertu qui reluit
Par les ans de ta ieuneſſe,
Comme l’or ſur la richeſſe,
Ou la Lune par la nuit.
Tout l’honneur qui ſeul en France
Du ſein des Dieux s’eſcoula,
Pour illuſtrer ton enfance
Deſſus ton front s’en-vola,
Et depuis s’eſt planté là.
Donques Prelat de bon-heur,
Qui tiens le ſommet d’honneur,
En qui noſtre Roy contemple
Des vertus le vray exemple,
Sois content d’vn ſi grand bien,
Et ne ſouhaite plus rien.
Car toy qui ta vie arroſes
Du miel des heureuſes choſes,
D’auantage à qui ie donne
Ceſte Hynne que ie moiſſonne
Des Charites au milieu,
Ceſſe de plus rien attendre,
Et ne vueilles point apprendre
A te faire vn nouueau Dieu.