Ronsard - Œuvres, Buon, 1587/Ny la fleur qui porte
Y la fleur qui porte le nom
D’vn mois, & d’vn Dieu, ny la Roſe
Qui deſſus la cuiſſe d’Adon
D’vne playe ſe vit eſcloſe :
Ny l’aſtre des iardins, l’Œillet,
Ny l’vne & l’autre Gyroflée,
Ny l’Hyacinthe au teint d’œillet,
Le Gayeul, ny la Gantelée :
Ny celle qu’Aiax enfanta
De ſon ſang vermeil empourprée,
Lors que furieux il planta
En ſon cœur la Troyenne eſpée :
Ny celle qui iaunit du teint
De la fille trop enuieuſe,
En voyant le Soleil atteint
D’vne autre plus belle amoureuſe :
Ny celle qui deſur le bord
D’vne belle ſource azurée
Naſquit ſur l’herbe apres la mort
De la face trop remirée :
Ny les fleurons que diffama
Venus alors que ſa main blanche
Au milieu du Liz enferma
D’vn grand aſne le roide manche :
Ny la blanche fleur qui ſe fiſt
Des larmes de la belle Heleine :
Ny celle que Iunon blanchiſt
Du laict de ſa mammelle pleine:
Quand faiſant teter le Dieu Mars
Du bout de ſa fraize eſgoutée,
Le laict qui s'eſcouloit eſpars
Fiſt au ciel la Voye laictée:
Ne me plaiſent tant que la fleur
De la douce Vigne ſacrée,
Qui de ſa nectareuſe odeur
Le nez & le cœur me recrée.
Quand la Mort me voudra tuer
( A tout le moins ſi ie ſuis digne
Que les Dieux me daignent muer )
Ie le veux eſtre en fleur de Vigne:
Et m'esbahis qu'Anacreon,
Qui tant a chery la vendange,
Comme vn Poëte biberon,
D'elle n'a chanté la loüange.