Recueil général et complet des fabliaux des 13e et 14e siècles/CXLV
CXLV
DU PRESTRE ET DU LEU
n prestre maneit en Chartein[2] ;
S’amoit la fame à .I. vilein.
Le vilein, qui garde s’en prist,
En la voie une fosse fist
Par où cil seut venir laienz.
.I. leu vint la nuit et chiet enz,
Car la nuit estoit trop oscure.
Le prestre, par mesaventure,
Si con soleit est revenuz,
Einz ne sot mot : s’est enz chaüz.
La dame, cui il anuioit
Du proverre qui tant tarjoit,
A sa meschine dit : « Cha va
Savoir se cel sire vendra. »
La meschine est par là venue :
En cele fosse rest cheüe.
Li vilein par mein se leva,
Vers sa fosse droit en ala :
Ce qu’il queroit trueve, et jura
Que chascun son loier avra.
Le leu tua, et esbourssa
Le prestre, et la garce enchaça.
A ceus avint grant meschaance,
Et au vilein bele chaance.
Li prestres honte li fesoit ;
Li leu ses bestes estrangloit ;
Chascun d’eus acheta mout chier,
Cil son deduit, cil son mengier.