Orig. — Arch. du canton de Genève. Copie transmise par M. Rigaud, premier syndic, et par M. L. Sordet, archiviste.
Capne la Briolle, Vous avez peu entendre comme les sindic et conseil de Geneve ayant employé liberalement la somme de quinze mille livres pour les Eglises de ce royaume durant les troubles passez et lorsqu’elles estoient en affliction et necessité, il feust advisé, à l’assemblée tenue à Montauban de tous les depputez des dictes Eglises, de faire payer et rembourser les dicts sindic et conseil, pour la premiere fois, de la somme de huict mille livres, à cause de la pouvreté des dictes Eglises ; de sorte qu’en vertu de la commission du Roy mon seigneur, par laquelle il est permis d’imposer la somme de six cens soixante et treze mille livres sur tous ceulx de la Religion et catholiques uniz de ce dict royaume, pour l’acquict des debtes des estrangiers, les dicts sindic et conseil ont esté assignez de la dicte somme de huict mille livres sur les Eglises de Provence. Ce qui me faict vous prier, Capne la Briolle, de vous employer de tout vostre pouvoir en un œuvre si bon et si juste, et tenir la main à ce qu’il en ait prompte satisfaction et contentement. Vous ferés chose qui me sera agreable, et que je reputeray comme faicte à moy-mesme : et sur ce prieray Dieu vous tenir, Capne la Briolle, en sa saincte garde. De Pau, ce iiije jour d’octobre 1583.