Orig. autographe. — Arch. de M. le comte H. C. de Meslon. Envoi de M. le secrétaire général du département de la Gironde.
Monsr de Meslon, Je me suis acheminé en ce lieu pour adviser sy je pourrois ramener le Casse à son debvoir ; mais je le ay treuvé si obstiné et plein de mauvais voulloir, qu’il n’a voulleu nullement obeïr à aulcun advis que je luy ay donné pour son profit ; et sa rebellion est cause que le Roy mon seigneur a commandé à mon cousin le mareschal Matignon de lever une armée et mener le canon pour le forcer. Et prévoyant combien cela nous est suspect et dangereulx pour toutes les Eglises, j’ay deliberé d’arrester ceste eslevée d’armée et assembler le plus que je pourray de ceulx de la Religion, esperant que le dit Casse par ce moyen se remettra plus librement, et aussy que l’on ostera tous les moyens à ceulx qui auroient envie de nous nuyre, sur ce pretexte de ne le faire poinct. Par ainsin je vous prie de le faire entendre à toutes les Eglises de vos quartiers, et de tenir le plus d’hommes prests que pourrez pour me venir treuver lorsque je vous manderay. Et d’aultant que je suis adverty que Minyac pourroit esmouvoir aulcuns de ce pays-là, asseurez tout le monde qu’il n’y agit aulcune querelle particuliere, ny du general ; et ayez l’œil à tout ce qui se passera, pour m’en advertir. Manderez aussy aulx capitaines de Monsegur de tenir leurs compagnies prestes. Qui est l’endroit où je prie Dieu, Monsr de Meslon, vous tenir en sa garde. De Castet, ce vendredy.
- ↑ Date fixée d’après les deux lettres qui suivent, de même que par le témoignage des comptes originaux manuscrits de la dépense ordinaire du roi de Navarre, où nous voyons que ce prince dîna à Castets le 20 juillet 1583.