Orig. — Arch. de la préfecture de la Haute-Garonne. Copie transmise par M. Belhomme, archiviste.
Messrs, J’ay esté presentement adverty comme ayant depuis quelques jours trouvé en vostre ville de Thoulouse un de mes serviteurs, nommé le cappitaine Mercier, vous l’auriés faict constituer prisonnier en haine de ce qu’il est de la Religion, et soubs pretexte d’un meurtre auquel il se trouva inopinement il y a deux ou trois ans. Pour ce que c’est chose qui est de pernicieuse consequence et directement contre l’intention du Roy mon seigneur, portée, [tant] par ses susdicts eedicts que par l’adveu qu’il a, je vous prie bien affectueusement, et en considerant ce que dessus, et en ma faveur, le faire mettre en liberté, et ne permettre qu’aulcun tort luy soit faict. Duquel je me pourrois justement plaindre, comme je m’asseure que ne m’en voudrés donner occasion. Et sur ceste asseurance je vous prieray aussy de croire que je seray tousjours disposé à recognoistre le plaisir qu’il recevra de vous à ma recommandation, et de pareille affection que je prie le Createur vous donner, Messrs, ses sainctes graces. De Nerac, ce iije jour de decembre 1581.