Cop. – Biblioth. de Tours, ancien manuscrit des Carmes, coté M, n° 50, Lettres historiques, p. 93. Communiqué par M. le préfet.
Monsieur, Encores qu’il vous ayt pleu me donner plusieurs fois asseurance que vous vous rendrez intercesseur envers le Roy pour les affaires de mon cousin, monsr de Chastillon, me confiant en vos tres veritables promesses, j’ay bien voulu rendre cest office à mon dict cousin par le sr Constant, que je vous envoye expres pour vous supplier tres humblement vous en ressouvenir, et vouloir par le premier gentilhomme qu’envoyerez à la Court faire la depesche expresse pour obtenir ce que nous advisasmes à Coutras ensemble. Ce luy sera moyen de continuer le tres humble service qu’il vous a voué ; et luy donnant ce contentement il aura plus d’occasion de s’employer à l’establissement de la paix, auquel il peut grandement servir, que s’il se voit tant mesprisé que l’on [ne] veuille mettre en consideration les remonstrances et les justes demandes qu’il faict. Je crains que ce soit luy diminuer la bonne volonté de bien faire, où, en le contentant, on pourroit tirer du fruict de beaucoup de belles parties qui sont en luy ; desquelles, Monsieur, vous serez le premier servy : voulant despendre entierement de vos commandemens, et recevoir ce bien de vostre main, pour vous en estre, et non à aultre, perpetuellernent obligé,
Monsieur, je supplie le Createur vous donner, en parfaicte santé, trez heureuse et longue vie. De Castillon[1], ce xiije janvier 1581.
- ↑ Castillon-sur-Dordogne en Périgord, aujourd’hui du département de la Gironde.