Orig. – Arch. de famille de M. le comte H. C. de Meslon, à Rauzan. Communication de M. le secrétaire général du département de la Gironde.
Monsr de Duras, Mes subjects de Castelmoron et jurisdiction de Gironde m’ont faict entendre qu’oultre les foules et oppressions qu’ils reçoivent pour le passage des gens de guerre, sont encore contrainctz de satisfaire à plusieurs contributions de deniers qui se font sur eulx par les garnisons circonvoisines. A ceste cause, je vous ay bien voulu escrire la presente pour vous prier, Monsr de Duras, les vouloir autoriser en tout ce qu’il vous sera possible, pour empescher qu’ils ne soient tant travaillés ni contraintz à aulcunes levées de deniers extraordinaires ; en sorte que pour estre à moy ils se ressentent de quelque support et soulagement, et recongnoissent que ceste mienne lettre leur aura servy en vostre endroict. En quoy me ferez plaisir que j’auray bien agreable, et que je recongnoistray d’aussy bon cœur que je prie Dieu, Monsr de Duras, vous avoir en sa saincte et digne garde.
Escript à Thouars, le xve jour de apvril 1576.
HENRY.