Orig. – Arch. de famille de M. le marquis Édouard de la Grange.
Monsr de la Force, N’ayant jamais doubté de vostre bonne volonté à l’endroict de la Royne ma mere et de moy, je m’estois persuadé que sans quelque grand empeschement nous vous eussions veu en ces quartiers. Mais estant tel que nous l’avez escript, j’advoue vostre excuse legitime, et suis aultant marry des inconveniens qui en sont cause comme vous avez justes occasions de vous en douloir et plaindre. Toutesfois j’estime que vous sçavez constamment supporter telles afflictions (encores qu’elles soyent grandes et bien à coup redoublées[1]), avec une vertu et patience chrestienne ; considérant la main de celuy qui les envoie, lequel seul sçayt et cognoist ce qui nous est necessaire. Dont vous pouvez prendre la consolation que sçavez tres bien donner à ceulx qui en ont besoing. Qui me fera laisser ce propoz pour vous prier, Monsr de la Force, mettre peine de recouvrer vostre santé, avec laquelle je vous puisse voir quand vostre commodité le pourra permettre ; demeurant par deçà jusques et selon les nouvelles que j’entendray de la Royne ma mere, lorsqu’elle sera pres de Leurs Majestez ; vous asseurant que serez le bienvenu, et receu d’aussy bon cueur que je prie Dieu, Monsr de la Force, vous avoir en sa tres saincte et tres digne garde. Faict à Nerac, le vije jour de decembre 1571.
HENRY.
- ↑ M. de la Force venait de perdre un fils et une fille, et relevait à peine d’une grave maladie. Ce renseignement nous est fourni par M. le marquis Éd. de la Grange.