Poésies de Marie de France (Roquefort)/Fable LXXIV
Poésies de Marie de France, Texte établi par B. de Roquefort, Chasseriau, , tome II (p. 313-314).
FABLE LXXIV.
Une Singesse aleit mustrant
A tutes Bestes sun Enfant,
Si l’en teneïent tuit pur fole
E par sanlant è par parole ;
Tant k’a un Liun le mustra.
Au commencier li demanda
Se il est biax ; cil li a dit
Qu’ains plus leide beste ne vit ;
Porter li reuve en sa meisun
E si recort ceste rèsun.
Chascuns Houpix prise sa couwe[2]
Si s’esmerveille quele est souwe.
Cele s’en vait triste et dolente,
Un Ors encuntre en mi la sente[3] ;
Li Ors s’estut[4], si l’esgarda
Par cointise l’arèsonna[5].
Voi-jeo, fet-il, illec l’Enfant
Dunt les Bestes parolent tant,
Qui tant parest pruz è gentilx ?
Oïl, fet-ele, c’est mes filx.
Baille le ça tant que jel’ bès[6],
Qar gel’ wol véir de plus près.
Cele li baille et l’Ors le prent
Si l’a mengié hastiwement.
Pur ce ne devrait nus mustrer[7]
Sa priveté ne sun penser ;
Car tel cose puet-hum joïr
Qui ne fet mie à tuz plaisir.
Par descuvrance vient grant max
N’est pas li siècles tuz loiax.
- ↑ Le Grand d’Aussy, Fabliaux, in-8o, tom. IV, p. 189.
- ↑ Chaque renard prise sa queue, il est glorieux qu’elle lui appartienne.
- ↑ Au milieu du chemin.
- ↑ S’arrêta.
- ↑ Il lui parla en termes apprêtés.
- ↑ Que je l’embrasse.
- ↑ J’ai voulu démontrer qu’on ne devoit pas découvrir ses affaires et ses secrets à des étrangers.