Poésies attribués à Charles d’Orléans/Ballade VIII

Charles d’Orléans

Poésies attribués à Charles d’Orléans

Poésies complètes, Texte établi par Charles d’Héricault, Ernest Flammarion, 1915 (p. 220).

BALLADE.

     Je deffy Tristesse
Et tout son povoir,
Car Plaisant Léesse,
Par joyeux Espoir
M’a fait assavoir
Me faisant promesse
Que de bon vouloir,
Sans me decevoir,
Me sera maistresse,
Et fera avoir
Des biens à largesse.
     C’est ce qui redresse
En confort, pour voir,
Le mal qui me blesse
Et me fait douloir
Souvent main et soir
Et sy fort me presse,
Que, par nonchaloir,
Je laisse manoir
Mon cuer en destresse,
Loings de recevoir
Des biens à largesse.