Poème de la prison/Ballade XXX
Belle, bien avez souvenance,
Comme certainement je croy,
De la tresplaisant aliance
Qu’Amour fist entre vous et moy ;
Son secrétaire Bonne Foy
Escrist la lectre du traictié,
Et puis la scella Loyauté
Qui la chose tesmoingnera.
Quant temps et besoing en sera.
Joyeux Désir fut en presence.
Qui alors ne se tint pas coy,
Mais mist le fait en ordonnance,
De par Amour, le puissant roy ;
Et, selon l’amoureuse loy.
De noz deux vouloirs, pour seurté,
Fist une seule voulenté ;
Bien m’en souvient et souvendra,
Quant temps et besoing en sera.
Mon cueur n’a en nully fiance
De garder la lettre, qu’en soy ;
Et certes ce m’est grant plaisance,
Quant si tresloyal je le voy,
Et lui conseille, comme doy,
De tousjours haïr Faulseté ;
Car quiconque l’a en chierté.
Amour chastier l’en fera,
Quant temps et besoing en sera.
Pensez en ce que j’ay compté,
Ma Dame, car en vérité
Mon cueur de foy vous requerra,
Quant temps et besoing en sera.