Poème de la prison/Ballade XIV
Quelles nouvelles, ma Maistresse,
Comment se portent noz amours ?
De ma part je vous fais promesse
Qu’en un propos me tiens tousjours,
Sans jamais penser le rebours :
C’est que seray toute ma vie
Vostre du tout entierement,
Et pource de vostre partie
Acquittés vous pareillement.
Combien que Dangier et Destresse
Ont fait longuement leurs séjours
Avec mon cueur, et par rudesse
Lui ont monstré d’estranges tours,
(Helas ! en amoureuses cours,
C’est pitié qu’ilz ont seigneurie)
Si mettray paine que briefment
Loyaulté sur eulx ait maistrie,
Acquittés vous pareillement.
Quoy que la nue de Tristesse
Par un long temps ait fait son cours ;
Après, le beau temps de Lyesse
Vendra qui donnera secours
À noz deux cueurs, car mon recours
J’ay en Espoir, en qui me fie,
Et en vous, belle, seulement,
Car jamais je ne vous oublie ;
Acquittés vous pareillement.
Soyez seure, ma doulce amye,
Que je vous ayme loyaument.
Or, vous requier et vous supplie,
Acquittés vous pareillement.