Peintre qui veux avoir une œuvre façonnée
Seconde partie des Muses françoises, Texte établi par Despinelle, chez Matthieu Guillemot, (p. 218).
SONNET.
Peintre qui veux auoir vne œuvre façonnée,
Sur toutes les beautez de la terre & des Cieux,
Garde toi d’imiter le foudre de ſes yeux,
De peur d’eſtre puni comme fut Salmonée :
Peints ſa bouche en bouchant ton oreille eſtonnée,
De peur d’eſtre enchanté par ſon chant gracieux :
Son ſein est vn Gibel cachant fallacieux,
Vn feu par qui ta main doit eſtre guerdonnée :
Mais lors que tu auras parfait tout le tableau,
Garde toy d’eſtre faict toi-mefme ton tombeau,
Empierré ſans mercy de ſon regard habile :
Mon penſer la peignit iadis dedans mon cœur,
Et receut pour loyer le rocher ſon vainqueur,
Dont il eſt demeuré pour iamais immobile.
A. D. V.