Cette page a été validée par deux contributeurs.
Se le voir en veuls enquester.
Alons ent sans plus arrester
Tout ce chemin la droite coste,
Lonc la riviere ; enchiés .i. oste
Qui moult a le cuer esbaudi,
Vendrons à l’eure de midi,
Que il sera temps de disner. »
— « Dame, bien me doi acliner
A faire tout vostre voloir,
Jà mais riens n’aroie à doloir
Tant que fusse en vostre conduit,
Ainz y ai joie et grant deduit,
Et si puis moult de bien aprendre,
A ce que je vous oi reprendre,
Pour avoir vie pure et monde.
Poi vaut li bobans de cest monde,
Bien l’ai par l’aignelet prouvé
C’avons sus le lyon trouvé ;
Foulz est qui pour ce Dieu oublie.
Qu’il a force et grant seignorie.