Par le tirant qui les destruit
Et eulz à tout mal faire estruit
Et les embat en grant meschief.
Diex l’a fait de son pueple chief
Pour lui ou droit chanel tenir
De raison et droit maintenir
Et eulz bons examples moustrer,
Mais assez poi li chaut d’outrer
Les commans de son creatour ;
Lou se fait en lieu de pastour.
Garder les doit, or les deveure,
Et poi ens ou chanel demeure
Où Diex l’a mis : c’est de droiture.
Poi l’en chaut et poi met sa cure
A bien faire, ne point n’estrive
A pechié, mais tost se desrive
De raison faire où Diex l’a mis.
Poi li chaut d’estre à Dieu amis,
Ne s’en fait pas drus ne privez.
Li princes qui est desrivez
Ainssi de droiture et d’onnour,
Qui n’entent raison ne clamour
Ne ne met soi n’autrui à point,
C’est la riviere où il n’a point,
Si con tu vois, de seürté.
Moult est en grant maleürté
Li hons qui souz tel voisin maint ;
Moult s’en duelent maintes et maint.
N’est riens tant grieve au pueple ou monde
Que mauvais chiés où il habonde
Plenté d’avarice et d’orgueil ;
Car quant il s’est mis en l’escueil
Page:Watriquet de Couvin - Dits, édition Scheler, 1868.djvu/298
Cette page a été validée par deux contributeurs.