Encor verras, or ne t’anuit,
Maintes choses ainçois la nuit ;
Nous n’avons plus ichi que faire,
Je t’en ai tout conté l’afaire. »
Ci commence la parabole de la riviere qui est hors de son chanel.
Ainssi celle grant voie et lée
Errames, tant c’une valée
Assez près d’ilecques trouvames,
Et tout belement l’avalames,
Tant que nous venismes ou fons,
Qui moult estoit biaus et parfons
Et larges de très grant maniere.
Si trouvames une riviere
Moult très grande et si bien corant
Roidement, que li demorant
Entour lui s’en doloient touz ;
Tant estoit roides et estous
Ses cours que tout engloutissoit ;
Si tost que hors de rive issoit,
Ne laissoit biaus prez à destruire
Ne grans vignobles, et moult nuire
Pooit as terres ahannables ;
Tant iert ses cours adomagables
C’on n’osoit entour demorer,
Vingnes ne terres labourer,
Tout ne destruisist sanz atendre.
Pour qu’elle s’i peüst estendre,
Partout vouloit prendre et partir,
N’on ne pooit si fort bastir
Entour li moulins ne estans,
Que ses roides cours conquestans
