Qui est desconfis. Et li hons
Qui à son droit maintenir pense
Et Dieu apele en sa desfense
Et du tout sa fiance i met,
Si que de riens ne s’entremet
Que droiture et raisons n’i soit,
Ne orgueilz point ne le deçoit
Qu’adès ne soit humbles et douz
Envers son seigneur et à touz
Ceuls qui droit et raison entendent,
Ne tout si fait à el ne tendent
Fors au plaisir de Dieu touz dis, —
Cilz est li drois aignelez dis
Et comparez, qui par fortune
A desconfit mille contre une
Ce grant lyon qu’il a outré.
Bel moustre nous en a moustré
Diex, qui à point en sait ouvrer
Et force au foible recouvrer.
Or a cis aignelez estort
Le lyon, qui à son grant tort
L’assailli de fole aatise,
S’a tant ses drois de grace aquise
Envers Dieu, qu’il est au desseure ;
Si con tu vois, il le deveure
Devant nous et a desconfi.
C’est drois examples, ce t’afi,
A touz grans princes et à roy,
Qui, sans mesure et sans arroy,
Sanz atemprance et à tort fait,
Ont moult tost entrepris tel fait
Par leur sorcuidance et leur force,
Que Diex, em poi d’eure d’esforce,
Leur force a tost au bas tornée ;
Par fortune l’a bestornée,
Page:Watriquet de Couvin - Dits, édition Scheler, 1868.djvu/291
Cette page a été validée par deux contributeurs.