Se tu n’as moult le cuer novice,
Assez i pues de biens aprendre.
Or t’en vien et, sans plus atendre,
Tu verras en celle autre lande
Une merveille assez plus grande
Et à veoir moult desguisée.
— Bien estes sage et avisée,
Dame Verité, et sans doute
Moult très volentiers vous escoute,
Et bel vous fait oïr parler.
Or nous esploitons de l’aler,
S’il vous plest, et hastons nostre oire ;
Bons est vostre conseuls à croire.
Ci commence la parabole du lyon et de l’aignel, comment l’aignel estrangle le lyon.
Atant d’ileuc ainssi tornames ;
Sans arrest nous acheminames
Devant nous la voie tout droit,
Et à ces choses là endroit
Tout en alant pensai assez,
Mais ains qu’il fust prime d’assez
Ne matinée auques creüe,
Enmi une grant lande herbue,
Tout le chemin que nous preïsmes,
Une bataille illeuc veïsmes
D’un aignel encontre .i. lyon ;
Ce fu droite amiracion
De resgarder celle merveille,
Qu’ains mais n’oi veü la pareille.
Grant piece s’erent combatu,
