Ce les paist et ce les souffit
Dont uns mauvais se desconfit.
Leur souffisance et leur clamour
Toute ont mise en la Dieu amour ;
Tout sont de la grace Dieu plain.
Aussi con nous veons à plain
Ces cras chiens seur ces maigres bestes,
Qui point n’ont tournées les testes
Vers les crasses ne tant ne quant,
Ainssi se paissent li auquant
Pour la Dieu amour, et aucunes,
De griés penances et de junes
Et font, d’orer et d’abstinence,
De gloire en paradis semence,
Et ont si plaine souffisance
De toute riens, qu’il n’ont doutance
De tourment mondain ne de mort.
Touz leur cuers en Dieu se remort
Et d’abstinences se norrissent,
Ne point leur pourpos ne guerpissent ;
Ens ou Dieu service ont touz mis
Leur cuers, et le monde sousmis,
Ne d’autre avoir ne leur souvient.
Mais poi sont cil cui il avient ;
Dont c’est domages et pitez
Que touz li mondes n’est itez
Que je t’ai dit de celle gent,
Car bel se gouvernent et gent
Et je prise moult leur maintien.
Compains, prens i garde et te tien
Au meilleur pour l’ame sauver ;
Cis examples te puet laver
De couvoitise et d’avarice ;
- ↑ B. De granz ; A. penances et jeünes.
