A ces autres par de dechà,
Pour l’example oïr qui piecha
Est au monde manifestés.
Biaus est li misteres et tés
Qu’il est à touz ceulz profitans
Qui en ce lieu sont habitans.
Si te dirai, or escoutons,
Pour quoi seur ces maigres moutons,
Pourchelez, brebis et aignel,
Sont chien si cras et cil oisel,
Et il mainent si bonne vie
Qu’il n’ont d’autre mengier envie.
Frere, ainssi vivent ou service
De Dieu gent sanz mal et sanz vice,
Sanz convoitise et sanz amer,
Ne n’ont soing que de Dieu amer.
Il ne croient pas en leur pances
N’en leur avoir, mais em penances,
En jeuner et en oroisons.
Là gist toute leur garisons ;
Ce leur souffit ; de ce se paissent,
Miex que d’autre avoir s’en encraissent.
Ces maigres charoignes petites
Que cil oisel cras ont eslites,
Se tu de moi entendre esploites,
Ce sont les griés voies estroites
Que li cors sueffre, et li martire
Pour l’ame espurgier, qui s’atire,
Quanqu’elle puet, à Dieu servir
Pour sa grant gloire deservir ;
Ou desir de sa grace avoir
S’encraissent et non d’autre avoir ;
- ↑ Je laisse la faute aignel (p. aigniaus) par considération de la rime oisel, qui est correcte.
