Et à l’ame sauver te tien,
Ne la lai mie desconfire
A la char, qui adès la tire
Et enorte à faire pechié.
Et s’ensi te voi entechié,
La compaignie o moi t’otrie.
Or me di, et si ne ment mie,
Ton non et de ton couvenant,
Puis s’irons querir maintenant
Lieu où je puisse demorer. »
— « Dame, bien doi Dieu aourer,
Qui par sa grace o vous m’avoie.
Or en alons, toute la voie
Le dirai et sanz refuser ;
D’autre mestier ne sai user
Que de conter biaus dis et faire ;
Je ne me mesle d’autre affaire.
Watriquet m’apelent aucun
De Couving, et près que chascun,
Et sui sires de Verjoli. »
Tout ainssi en parlant o li
M’acheminai et sans arest,
S’entrames en la grant forest
Sitost que de l’ostel partimes,
Et la voie à destre tenimes,
Tout en parlant, le grant sentier,
Chascuns moult liez de cuer entier :
Elle moult lie quant le voir
De mon non li oi fait savoir,
Et je liez pour sa compaignie
Que nus preudons n’a desdaignie,
Page:Watriquet de Couvin - Dits, édition Scheler, 1868.djvu/275
Cette page a été validée par deux contributeurs.
