Page:Watriquet de Couvin - Dits, édition Scheler, 1868.djvu/269

De son cuer et hors de sa court
^[1]Que je croi, à brief terme et court,
Li plus gros s’en repentiront,
240Car à Dieu jà sanz moi n’iront
Li roy, li prince ne li conte
Qui or ne tiennent de moi conte ;
^[2]Je voi poi qui m’ainme et honneure,
A paines sui entr’eus une heure
245Qu’en bas et à vilté tenue ;
Et meïsmes la gent menue
Me chacent hors de leur maison,
Et pluseur prelat sanz raison
M’ont banie de leur ostel,
250Si que le siecle voi mais tel
Si felon et d’envie plain
Que pluseur ne m’osent à plain
Honnorer ne acompaignier,
^[3]Ne nus ne m’i veult adaignier.
^[4]255Il m’ont près tout le dos tourné,
Si voi si le mont bestourné
^[5]Que plus n’i puis estre, ainz m’en fui
Ensus d’eus en aucun refui,
Où la gent aient de moi cure ;
260Car avec Fausseté l’oscure,
Qui toute honneur fait reverser,
Ne puis estre ne converser.
Et tout ce me fait Couvoitise
Mauvaise, qui touz maus atise ;
265Elle m’a ceste œvre brassée ;
Par li sui je si deboutée

1. B. terme court.
2. AB. G’i voi.
3. ne me.
4. A. Ainz m’ont. — B. les dos.
5. 256-57 AB:
   
   Et quant si le voi bestorné,
   Ne puis estre au monde, ains m’en fui.