S’en disoie la verité,
Tant estoient à grant vilté
Et au destroit mis et tenus,
Et si très maubailli, que nus
A paines le saroit conter.
Il se lessoient desmonter
Si vilment jus de leur destriers
Que li aucun par leur estriers
Se traïnoient à la terre ;
Ce sembloit une mortel guerre.
Cil qui plus fier erent com roy
Ne metoient en euls conroy
De desfendre ne achoison,
Ainçois fianchoient prison
Ou il se laissoient morir.
Et quant ainssi vi seignorir
Celles qui obeïr devoient
Et qu’ensi leur seigneur avoient
Aterré et au dessouz mis,
Grant merveille à mon cuer en mis
Et i pensai moult longuement
Que ce pooit estre et comment
Une dame sans autre esfort
Metoit à outranche .i. si fort
Chevalier et desconfisoit ;
Ceste œvre moult m’esbahissoit
Comment ce pooit avenir.
Tant i pensai que soustenir
Ne me poi plus, ançois me couche
Seur mon bras (n’i oi autre couche),
Si fui si qu’entre dor et veille
Touz raviz. Or orrés merveille
Qu’ilec en ce penser m’avint.
- ↑ Ne desfendre.