Cette page a été validée par deux contributeurs.
Congé lor dona, cil s’enmurent
Que onques puis véu ne furent.
Cil qui les miracles aperceurent
En Jesu-Crist, notre Deu, crurent
Et dirent tuit, por la provance,
« Li Deu de Jorge a grant puissance. »
aciens d’ire à poi ne crieve,
Se que il veit forment li grieve.
D’angoisse brisa sa sainture,
Pasmé chaï à terre dure,
Ileuques brait et forment crie :
« Tot est ma hautesse perie.
Jorge a fait ma gent renéer
Por son Deu, se ne puis néer.
Destruit a mes deus et ma loi ;
Or l’estuet morrir sans delloi.
Ou le cors me destrencherai,
Ou ardeir en un feu ferai,
Tormenté en mainte manière,
Si son cors avant et arière.
